கிரெடிட் அட்டைகளின் (Credit Cards) பயன்பாடு தற்போது சர்வ சாதாரணமாகிவிட்டது. அனைவரின் கையிலும் ஒன்று அல்லது அதற்கு மேற்பட்ட அட்டைகள் காணப்படுகின்றன. வங்கிகளும் வங்கி சாரா நிதி நிறுவனங்களும் (NBFCs) பல்வேறு சலுகைகளை அறிவித்து, வாடிக்கையாளர்களைக் கடன் அட்டைகளைப் பெற ஈர்த்து வருகின்றன.
உண்மையில் இதற்கான தேவை இல்லாவிட்டாலும், சிலர் தள்ளுபடிகள், சலுகைகள் மற்றும் வெகுமதிப் புள்ளிகளுக்காகவே இவற்றை வாங்குகின்றனர். வேறு சிலர், அவசரத் தேவைக்கு பணம் தேவைப்படும்போது பயன்படுத்திக்கொள்ளலாம் என்ற நோக்கத்துடன் இவற்றை வாங்குகின்றனர். இருப்பினும், கடன் அட்டைகளை எவ்வாறு பயன்படுத்துவது என்பது தெரியாததால், பலர் சிக்கலில் மாட்டிக்கொள்கின்றனர். எனவே, இவற்றை பயன்படுத்தும்போது சில முன்னெச்சரிக்கை நடவடிக்கைகளை மேற்கொள்ள வேண்டும். இல்லையெனில், உங்கள் அட்டை முடக்கப்படக்கூடும்.
இத்தகைய பரிவர்த்தனைகளைச் செய்யாதீர்கள்
கிரெடிட் கார்டு தொடர்பாக இந்திய ரிசர்வ் வங்கி (RBI) சில விதிமுறைகளை வெளியிட்டுள்ளது. கடன் அட்டையை எதற்காகப் பயன்படுத்த வேண்டும்? எதற்காகப் பயன்படுத்தக்கூடாது? என்பது குறித்து அது சில கட்டுப்பாடுகளை விதித்துள்ளது. முக்கியமாக, இவை தனிப்பட்ட தேவைகளுக்கு மட்டுமே பயன்படுத்தப்பட வேண்டும். பங்குகள், பரஸ்பர நிதிகள் (Mutual Funds) மற்றும் கிரிப்டோகரன்சி போன்றவற்றில் முதலீடு செய்யும் பரிவர்த்தனைகளை இந்த அட்டைகள் மூலம் மேற்கொள்வது முற்றிலும் தடைசெய்யப்பட்டுள்ளது. இத்தகைய தடைசெய்யப்பட்ட பரிவர்த்தனைகளை நீங்கள் மேற்கொண்டால், வங்கிகள் உடனடியாக உங்கள் அட்டையை முடக்கிவிடும். மேலும், பந்தயம் கட்டுதல், இணையவழி சூதாட்டம் போன்றவற்றுக்கும் இந்த அட்டையைப் பயன்படுத்தக்கூடாது.
ஒரே நேரத்தில் அதிகப்படியாகப் பயன்படுத்தினால்…
உங்கள் கிரெடிட் கார்டில் இருந்து ஒரே நேரத்தில் லட்சக்கணக்கில் பரிவர்த்தனைகளை மேற்கொண்டாலும், அந்த அட்டை முடக்கப்படுவதற்கான வாய்ப்புள்ளது. உதாரணமாக, நீங்கள் ஒவ்வொரு மாதமும் சுமார் 20 ஆயிரம் ரூபாய் என்ற அளவில் சிறிய தொகையைச் செலவிட்டு வருகிறீர்கள் என்று வைத்துக்கொள்வோம். ஆனால், திடீரென ஒரே நேரத்தில் 2 லட்சம் ரூபாயைப் பயன்படுத்தினால், வங்கி அதை ஒரு சந்தேகத்திற்குரிய அல்லது மோசடியான நடவடிக்கையாகக் கருதும். இதன் விளைவாக, பாதுகாப்பு காரணங்களுக்காக உங்கள் கடன் அட்டை முடக்கப்படலாம். அறிமுகமில்லாத அல்லது நம்பகத்தன்மையற்ற இணையதளங்களில் பரிவர்த்தனைகளை மேற்கொள்வதன் மூலமும் அட்டை முடக்கப்படுவதற்கான வாய்ப்புகள் உள்ளன.
கட்டணத்தைச் செலுத்தத் தவறினால்…
தொடர்ந்து மூன்று மாதங்களுக்கு உங்கள் கடன் அட்டையின் குறைந்தபட்ச நிலுவைத் தொகையை (Minimum Due) நீங்கள் செலுத்தத் தவறினால், நீங்கள் ‘கடன் தவறியவர்’ (Defaulter) எனக் கருதப்படுவீர்கள். இக்காலகட்டத்தில், உங்கள் அட்டை முடக்கப்பட்டு, அதன் மூலம் எந்தவொரு பரிவர்த்தனையையும் மேற்கொள்ள இயலாத நிலை ஏற்படும். நீங்கள் கடன் தவறியவர் என CIBIL அமைப்பிற்குத் தெரிவிக்கப்படும். இது உங்கள் கடன் மதிப்பீட்டை (Credit Score) வெகுவாகக் குறைத்துவிடும்.