சென்னை மெட்ரோவில் பயணம் செய்த முதலமைச்சர் முகஸ்டாலின். அது தொடர்பான அனுபவங்களை எக்ஸ் தளத்தில் பதிவிட்டுள்ளார்.
நெகிழ்ச்சியுடன் பதிவு
சென்னை மெட்ரோ ரயில் திட்டத்தின் தொடக்கம் என்பது தற்போதைய முதலமைச்சர் மு.க. ஸ்டாலின் துணை முதலமைச்சராக இருந்த காலத்திலேயே வேரூன்றிவிட்டது. அப்போது ஜப்பான் நாட்டிற்கு நேரில் சென்று, அந்நாட்டின் பன்னாட்டு ஒத்துழைப்பு நிறுவனமான ‘ஜைக்காவிடம்’ (JICA) பேசி, நிதி உதவியைப் பெற்று வந்ததில் அவரது பங்கு மிக முக்கியமானது. இன்று நாம் அனுபவித்து வரும் முதற்கட்ட மெட்ரோ ரயில் சேவைக்கு அவர் அன்று போட்ட அடித்தளமே காரணம். அந்த நினைவுகளைச் சுமந்து கொண்டு, பொதுமக்களோடு மக்களாகப் பயணம் செய்த தருணத்தை அவர் நெகிழ்ச்சியுடன் பதிவு செய்துள்ளார்.
பரங்கிமலை வரையிலுமான வழித்தடங்கள்
தற்போது மக்கள் பயன்பாட்டில் உள்ள விம்கோ நகர் முதல் சென்னை விமான நிலையம் வரையிலும், அதேபோல் சென்னை செண்ட்ரல் முதல் பரங்கிமலை வரையிலுமான வழித்தடங்கள் சென்னையின் பயணக் கலாச்சாரத்தையே மாற்றியுள்ளன. இதுவரை பல கோடிப் பயணங்கள் இந்த வழித்தடங்களில் மேற்கொள்ளப்பட்டுள்ளன என்பது இத்திட்டத்தின் மாபெரும் வெற்றியைக் காட்டுகிறது. அலுவலகம் செல்வோர், மாணவர்கள் என அனைத்துத் தரப்பு மக்களும் நெரிசலற்ற, குளிரூட்டப்பட்ட பாதுகாப்பான பயணத்தை உறுதி செய்ய இத்திட்டம் பெரிதும் உதவுகிறது.
இரண்டாம் கட்ட மெட்ரோ பணி
சென்னை மாநகரம் நாளுக்கு நாள் விரிவடைந்து வருவதால், அதற்கேற்ப இரண்டாம் கட்ட மெட்ரோ பணிகளும் அதிவேகமாக நடைபெற்று வருகின்றன. மாதவரம் முதல் சிறுசேரி வரை, கலங்கரை விளக்கம் முதல் பூந்தமல்லி வரை மற்றும் மாதவரம் முதல் சோழிங்கநல்லூர் வரை என நீண்ட தொலைவுகளை இணைக்கும் இந்தப் பணிகள் விரைவில் மக்களின் பயன்பாட்டுக்கு வரும் என்று அரசு உறுதியளித்துள்ளது. இந்தப் புதிய வழித்தடங்கள் செயல்பாட்டுக்கு வரும்போது, சென்னையின் போக்குவரத்து நெரிசல் பெருமளவு குறைந்து, பயண நேரம் பாதியாகக் குறையும் என்பதில் ஐயமில்லை.
பல விரிவாக்கத் திட்டங்கள்
மேலும், சென்னையின் பிற பகுதிகளையும் மெட்ரோ வலையமைப்பிற்குள் கொண்டு வரும் நோக்கில் பல விரிவாக்கத் திட்டங்கள் தயார் நிலையில் உள்ளன. விமான நிலையம் முதல் கிளாம்பாக்கம் வரையிலும், கோயம்பேடு முதல் பட்டாபிராம் வரையிலும், பூந்தமல்லி முதல் சுங்குவார்சத்திரம் வரையிலும் பல புதிய பாதைகள் திட்டமிடப்பட்டுள்ளன. இவை மட்டுமின்றி தாம்பரம் – கிண்டி, கலங்கரை விளக்கம் – உயர்நீதிமன்றம் மற்றும் சிறுசேரி முதல் கலைஞர் பன்னாட்டு அரங்கம் வரையிலான இணைப்புகளும் சென்னையை ஒரு முழுமையான உலகத்தரம் வாய்ந்த நகரமாக மாற்றும்.
விரிவாக்கப் பணி
இந்த அனைத்துக் கட்ட விரிவாக்கப் பணிகளும் முழுமை அடையும்போது, இந்தியாவிலேயே மிக நீண்ட தொலைவிற்கு மெட்ரோ ரயில் இணைப்பைக் கொண்ட நகரங்களில் ஒன்றாக சென்னை முதலிடம் பிடிக்கும். சென்னையை நவீனமயமாக்குவதும், அதன் பொருளாதார வளர்ச்சியை மேம்படுத்துவதும் அரசின் நீண்டகாலக் கனவாகும். ‘வெல்வோம் ஒன்றாக’ என்ற முழக்கத்தோடு, சென்னையின் வளர்ச்சிக்காக முன்னெடுக்கப்படும் இந்தத் திட்டங்கள் அனைத்தும் எதிர்கால சந்ததியினருக்கு ஒரு மிகச்சிறந்த சொத்தாக அமையும். மக்களின் பங்களிப்போடும், அரசின் தீவிர செயல்பாட்டோடும் சென்னையின் மெட்ரோ கனவு மெல்ல மெல்ல நனவாகி வருகிறது.