தமிழகத்தின் தலைநகரில் தொடர்ந்து அதிகரிக்கும் வெப்பம் காரணமாக மக்கள் கடும் அவதி அடைந்து வருகின்றனர். இது தொடர்பாக சமீபத்திய ஆய்வில் வெளியான தகவலால் மக்கள் அதிர்ச்சி அடைந்து உள்ளனர்.
இரவு நேரத்திலும் தணியாத அனல்: ஆய்வின் அதிர்ச்சி முடிவுகள்
திருச்சி என்.ஐ.டி (NIT Trichy) ஆராய்ச்சியாளர்கள் 2001 முதல் 2022 வரையிலான செயற்கைக்கோள் தரவுகளைக் கொண்டு நடத்திய ஆய்வில், சென்னையின் நிலப்பரப்பு வெப்பநிலை (LST) கவலைக்குரிய வகையில் உயர்ந்துள்ளது கண்டறியப்பட்டுள்ளது. கோடையின் உச்சத்தில், நகரின் சராசரி இரவு நேர வெப்பநிலை 25 டிகிரி முதல் 30 டிகிரி செல்ஸியஸ் வரை பதிவாகிறது. கட்டிடங்கள் அதிகமுள்ள பகுதிகளில் வெப்பநிலை 30 டிகிரியை நெருங்கும் வேளையில், மரங்கள் மற்றும் நீர்நிலைகள் உள்ள இடங்களில் இது 23.5 டிகிரி செல்ஸியஸ் என்ற அளவில் ஓரளவிற்கு இதமாக இருக்கிறது.
நகர்புற வெப்பத்தீவு
நகரங்கள் அதன் சுற்றுப்புற கிராமப்புறங்களை விட அதிக வெப்பத்துடன் இருக்கும் இந்த நிகழ்வை ‘நகர்ப்புற வெப்பத் தீவு’ (Urban Heat Island – UHI) விளைவு என்று நிபுணர்கள் அழைக்கின்றனர். சென்னையில் இந்த வெப்ப வேறுபாடு பகலை விட இரவில் அதிகமாக உணரப்படுகிறது. பகலில் சூரிய வெப்பத்தை உறிஞ்சும் கான்கிரீட் தளங்கள் மற்றும் தார்ச் சாலைகள், சூரியன் மறைந்த பிறகு அந்த வெப்பத்தை மெதுவாக வெளியிடுவதால், நள்ளிரவிலும் நகர் தகித்துக் கொண்டே இருக்கிறது.
கான்கிரீட் ஆதிக்கமும் நீர்நிலைகள் சுருங்குதலும்
இந்த வெப்ப உயர்வுக்கு முதன்மையான காரணம் நிலப்பயன்பாட்டு மாற்றம் ஆகும். தாவரங்கள் மற்றும் திறந்தவெளி நிலங்கள் மறைந்து, அந்த இடங்களில் வெப்பத்தை உறிஞ்சும் அஸ்பால்ட் மற்றும் கான்கிரீட் பரப்புகள் அதிகரித்துள்ளன. நீர்நிலைகள் சுருங்குவதும், பசுமைப் போர்வை குறைந்து வருவதும் இயற்கையான குளிர்ச்சி முறையை (Evaporative cooling) சீர்குலைத்துள்ளன. இது குறித்து ஆய்வாளர் அனீஷ் மேத்யூ கூறுகையில், “கட்டிடங்கள் நிறைந்த பகுதிகள் 29 டிகிரி செல்ஸியஸைத் தாண்டி வெப்பமடைகின்றன. ஆனால், நீர்நிலைகள் வெப்பத்தை உள்வாங்கிக் கொள்வதாலும், மரங்கள் நிழல் தருவதாலும் அங்கு வெப்பநிலை குறைவாக உள்ளது” எனத் தெரிவித்தார்.
குளிர்கால இரவுகள்
குளிர்காலத்திலும் இந்த வெப்பத் தீவு விளைவிலிருந்து சென்னைக்குத் தப்ப முடியவில்லை. உண்மையில், குளிர்கால இரவுகளில் நகரின் மையப்பகுதிக்கும் புறநகருக்கும் இடையிலான வெப்ப வேறுபாடு 2 டிகிரி செல்ஸியஸுக்கும் அதிகமாக உள்ளது. கடந்த இரு தசாப்தங்களில் தமிழகம் முழுவதும் இரவு நேர வெப்பநிலை சராசரியாக 1.61 டிகிரி செல்ஸியஸ் உயர்ந்துள்ளது, இது ஒட்டுமொத்த வெப்பமயமாதலின் எச்சரிக்கை மணியாகும்.
தீர்வும் எதிர்காலத் திட்டமிடலும்
இந்த வெப்ப அழுத்தத்தைக் குறைக்க, நகரக் கட்டமைப்பில் அதிரடி மாற்றங்கள் தேவை என ஆராய்ச்சியாளர்கள் வலியுறுத்துகின்றனர். நகர்ப்புற பசுமைக் காடுகளை உருவாக்குதல், எஞ்சியுள்ள ஏரி மற்றும் குளங்களைப் பாதுகாத்தல், மற்றும் கட்டிடங்களுக்கு இடையே காற்று புகுந்து வெப்பத்தை வெளியேற்றும் வகையிலான திட்டமிடல் ஆகியவை காலத்தின் கட்டாயமாகும். வாகனங்கள் மற்றும் குளிரூட்டிகள் (AC) மூலம் வெளியேறும் செயற்கை வெப்பமும் இதற்குக் கூடுதல் சுமையாக இருப்பதால், கட்டிடங்களின் வடிவமைப்பில் இயற்கையான காற்றோட்டத்திற்கு முக்கியத்துவம் அளிக்கப்பட வேண்டும்.
சென்னை நீண்ட நேரம் வெப்பம்
சூரியன் மறைந்த பின்னரும் சென்னை நீண்ட நேரம் வெப்பமாக இருப்பதைத் தவிர்க்க, ‘காலநிலைக்கேற்ற நகரத் திட்டமிடல்’ (Climate-responsive planning) ஒன்றே நிரந்தரத் தீர்வாக அமையும். இல்லையெனில், வருங்காலக் கோடைக் காலங்கள் மனித ஆரோக்கியத்திற்குப் பெரும் அச்சுறுத்தலாக மாறும் என்பதில் ஐயமில்லை.