தமிழக சட்டமன்றத் தேர்தல் தேதி நெருங்கி வரும் வேளையில், அதிமுக கூட்டணி இறுதி வடிவம் பெறுவதற்கான நடவடிக்கைகள் முடுக்கி விடப்பட்டுள்ளன. குறிப்பாக தமிழக பாஜக தேர்தல் பொறுப்பாளர் பியூஷ் கோயல் சென்னை வந்திருப்பது கவனிக்கத்தக்கது.
அமித் ஷா – ஈபிஎஸ் பேச்சுவார்த்தை
வேட்புமனு தாக்கலுக்கு இன்னும் 6 நாட்கள் இருப்பதால் நிதானமாக பேசி வருவதாக தெரிகிறது. அதேசமயம் அமித் ஷாவை சந்திக்க அதிமுக தலைமை அடுத்தடுத்து டெல்லி சென்று பேச்சுவார்த்தை நடத்தி கொண்டிருக்கிறது. இதில் போயஸ் கார்டனில் ஜெயலலிதாவின் ஆளுமை மற்றும் அதிகாரத்தை ஒப்பிட்டு எடப்பாடி பழனிசாமி மீது விமர்சனங்கள் முன்வைக்கப்படுகின்றன. அதேசமயம் 5 மாநிலத் தேர்தலை ஒட்டி மத்திய உள்துறை அமைச்சர் அமித் ஷா மிகவும் பிஸியாக இருப்பார் என்று முன்வைக்கப்படும் காரணத்தையும் எளிதாக கடந்து செல்ல முடியவில்லை.
எந்த கூட்டணிக்கு செல்வாக்கு அதிகம்? களத்தில் முந்துவது யார்?
என்.டி.ஏ தொகுதி பங்கீடு
இந்நிலையில் இன்று காலை தமிழக பாஜகவின் தேர்தல் பொறுப்பாளர் பியூஷ் கோயல் சென்னை வருகை புரிந்துள்ளார். இவரிடம் எத்தனை சீட் என்பது தொடர்பாக சில கணக்குகளை அமித் ஷா சொல்லி அனுப்பியிருப்பதாக தகவல்கள் தெரிவிக்கின்றன. அதன்படி, எடப்பாடி பழனிசாமி உடன் பியூஷ் கோயல் பேச்சுவார்த்தை நடத்தவுள்ளார். அதிமுக, பாஜக தரப்பில் இருந்து வெளியான தகவலின் படி, தேசிய ஜனநாயக கூட்டணியில் பாஜகவிற்கு 28 அல்லது 29 தொகுதிகள் இறுதி செய்யப்படவுள்ளது. திமுக கூட்டணியில் இடம்பெற்றுள்ள காங்கிரஸிற்கு 28 தொகுதிகள் ஒதுக்கப்பட்டன.
தமிழக பாஜகவின் வளர்ச்சி சதவீதம்
அவர்களை விட ஒரு தொகுதியாவது கூடுதலாக பெற்று விட வேண்டும் என்ற உறுதியுடன் பாஜக தரப்பு காய் நகர்த்தி வருகிறது. ஆனால் கடந்த 2021 சட்டமன்றத் தேர்தலில் 20 இடங்களில் போட்டியிட்டு 4ல் மட்டுமே வெற்றி பெற்றனர். இந்த விஷயம் எடப்பாடி பழனிசாமி உறுத்தலாக இருக்கிறது. அதேசமயம் அண்ணாமலை மாநிலத் தலைவராக சந்தித்த 2024 மக்களவைத் தேர்தலில் பாஜகவின் வாக்கு வங்கி 11 சதவீதமும், அப்போதைய என்.டி.ஏ கூட்டணிக்கு 18 சதவீதமும் கிடைத்ததை சுட்டிக் காட்டுகின்றனர். 2026ல் தமிழக பாஜக பெரிதும் வளர்ந்திருக்கிறது.
பாஜக போடும் சீட் கணக்கு
இதற்கேற்ப கூடுதல் சீட் ஒதுக்க வேண்டியது தான் சரியாக இருக்கும். அதுமட்டுமின்றி கோயில்கள் நிறைந்த தொகுதிகள் வேண்டும் என்கின்றனர். ஆனால் எடப்பாடி 25 சீட் வரை இறங்கி வந்திருக்கிறார். இதனால் இழுபறி தொடர்கிறது. பாமகவிற்கு ஏற்கனவே 18 சட்டமன்றத் தொகுதிகள் மற்றும் ஒரு ராஜ்யசபா சீட் ஒதுக்கப்பட்டதாக கூறுகின்றனர். இதில் பெரிதாக மாற்றம் இருக்காது. டிடிவி தினகரனை பொறுத்தவரை அமமுகவிற்கு 12 தொகுதிகள் வரை கேட்கிறார்.
ஆனால் அதிகபட்சம் 10 தொகுதிகள் மட்டுமே ஒதுக்க முடியும் என்று அதிமுக தலைமை கறார் காட்டி வருகிறது. இந்த மூன்று கட்சிகளுக்கான இடங்களை இறுதி செய்தால் பெரிய சுமை குறைந்துவிடும். மற்ற கட்சிகளுக்கு ஒன்றிரண்டு தொகுதிகள் மட்டுமே ஒதுக்க வாய்ப்பிருப்பதாக தெரிகிறது. இந்த சிக்கல்கள் அனைத்தும் களையப்பட்டு, இன்று மாலைக்குள் இறுதி உடன்படிக்கை கையெழுத்தாகும் என்று பலரும் நம்பிக்கை தெரிவித்துள்ளனர்.