தமிழ் சினிமா மட்டுமின்றி இந்திய சினிமாவே திரும்பி பார்க்கும் அளவுக்கு முன்னணி இயக்குனராக வலம் வருகிறார் அட்லீ.. இயக்குனர் ஷங்கரிடம் உதவியாளராக இருந்த அட்லீ ராஜா ராணி படத்தின் மூலம் இயக்குனராக அறிமுகமானார். இந்த படம் மிகப்பெரிய வெற்றி பெற்றது. முதல் படத்திலேயே கவனம் ஈர்த்த அவர் நடிகர் விஜய்யை வைத்து தெறி, மெர்சல், பிகில் ஆகிய படங்களை இயக்கினார். இந்த படங்களும் மிகப்பெரிய ஹிட்டானது.
இதை தொடர்ந்து பாலிவுட் சென்ற அட்லீ, ஷாருக்கானை வைத்து ஜவான் என்ற பிளாக்பஸ்டர் ஹிட் படத்தை கொடுத்தார். இந்த படம் ரூ.1000 கோடிக்கு மேல் வசூல் செய்து சாதனை படைத்தது. தற்போது அட்லீ, அல்லு அர்ஜுனை வைத்து சயின்ஸ் ஃபிக்ஷன் ஃபேண்டசி படத்தை இயக்கி வருகிறார். சன் பிக்சரஸ் நிறுவனம் இந்த படத்தை தயாரித்து வருகிறது.
இதனிடையே இந்த படத்தின் போஸ்டரை வெளியிட்ட படக்குழு அல்லு அர்ஜுனின் பிறந்த நாளை முன்னிட்டு படத்தின் டைட்டில் போஸ்டரை வெளியிட்டது.. இந்த படத்திற்கு ராக்கா எனப் பெயரிடப்பட்டுள்ளது; இது ரசிகர்கள் மத்தியில் பெரும் பரபரப்பை ஏற்படுத்தியுள்ளது. இந்த நிலையில் ராக்கா படத்தின் பட்ஜெட் விவரங்கள் வெளியாகி உள்ளது.. இப்படம் பிரம்மாண்டமான முறையில், சுமார் ரூ. 800 கோடி பட்ஜெட்டில் தயாரிக்கப்பட்டு வருகிறது.
அல்லு அர்ஜுனின் ராக்கா படத்திற்காக ஒதுக்கப்பட்ட ரூ. 800 கோடி பட்ஜெட்டைத் தயாரிப்பாளர்கள் எவ்வாறு செலவிடவுள்ளனர் என்பது குறித்த விவரங்கள் தற்போது வெளியாகியுள்ளன. செலவினங்களை எளிதாக்கும் வகையில், மொத்த பட்ஜெட்டையும் பல்வேறு பிரிவுகளாகப் பிரித்துள்ளதாக தகவல்கள் தெரிவிக்கின்றன.
படத்தின் தயாரிப்புப் பணிகளுக்காகப் படக்குழுவினர் ரூ. 300 கோடியைச் செலவிடவுள்ளனர். சர்வதேச நிபுணர்களால் கையாளப்படவுள்ள பிரம்மாண்டமான விஷுவல் எஃபெக்ட்ஸ் (VFX) பணிகளுக்காகவே ரூ. 250 கோடி தனியாக ஒதுக்கப்பட்டுள்ளது. அல்லு அர்ஜுன் தனது சம்பளமாக ரூ. 175 கோடியைப் பெற்றுக்கொள்வதுடன், படத்தின் லாபத்திலும் ஒரு பங்கைச் சொந்தமாக்கிக்கொள்ளவுள்ளார். இப்படத்தை இயக்கும் இயக்குனர் அட்லீ, ரூ. 100 கோடி சம்பளம் வாங்குகிறார்.
அதேவேளையில், கதாநாயகியாக நடிக்கும் தீபிகா படுகோன் ரூ. 20 முதல் 25 கோடி வரை சம்பளமாகப் பெற்றுள்ளார். ராக்கா படத்தில் அல்லு அர்ஜுன் மூன்று வெவ்வேறு கதாபாத்திரங்களில் நடிக்கவுள்ளதாக தகவல்கள் தெரிவிக்கின்றன. அவர் படத்தின் கதாநாயகனாகவும், வில்லனாகவும், மேலும் ஒரு அனிமேஷன் கதாபாத்திரத்திலும் தோன்றவுள்ளார் என்று கூறப்படுகிறது.. இயக்குனர் அட்லீ குமார் பல ஆண்டுகளாகத் திட்டமிட்டு உருவாக்கி வரும் ஒரு சயின்ஸ் ஃபிக்ஷன் திரைப்படமாக இது அமையும் என்றும் கூறப்படுகிறது.
‘ராக்கா’ படத்தில் அல்லு அர்ஜுனுக்கு ஜோடியாக ஐந்து கதாநாயகிகள் நடிக்கவுள்ளனர். தீபிகா படுகோன், ரஷ்மிகா மந்தனா, மிருணால் தாகூர் மற்றும் ஜான்வி கபூர் ஆகியோர் இப்படத்தின் நட்சத்திரப் பட்டியலில் இடம்பெற்றுள்ளனர். இவர்களுடன், பாக்கியஸ்ரீ போசரேவும் இப்படத்தில் ஒரு முக்கியக் கதாபாத்திரத்தில் நடிக்கக்கூடும் என்றும் எதிர்பார்க்கப்படுகிறது.