புதுச்சேரியில் ரூ. 1,250 கோடியில் தகவல் தொழில்நுட்ப சிறப்பு பொருளாதார மண்டலம் அமைக்க மத்திய அரசு ஒப்புதல் அளித்துள்ளது.
‘பிளக்-அண்ட்-பிளே’
இந்தத் திட்டத்தின் சிறப்பம்சமாக, மொத்தப் பரப்பளவில் 70 சதவீத இடங்கள் ‘பிளக்-அண்ட்-பிளே’ (Plug-and-Play) எனப்படும் உடனடிச் செயல்பாட்டு அலுவலகங்களுக்காக ஒதுக்கப்பட்டுள்ளது. இதன் மூலம் நிறுவனங்கள் உடனடியாகத் தங்களது பணிகளைத் தொடங்க முடியும். எஞ்சியுள்ள 30 சதவீத நிலப்பரப்பு அங்கு பணிபுரியும் ஊழியர்களின் நலனுக்காகப் பயன்படுத்தப்படும். இதில் பணியாளர்களுக்கான குடியிருப்புகள், வணிக வளாகங்கள், மருத்துவ மையங்கள், வங்கி வசதிகள் மற்றும் தீயணைப்பு நிலையம் உள்ளிட்ட அனைத்து அடிப்படைத் தேவைகளும் ஒரே இடத்தில் அமையவுள்ளன. ‘வேலை-வாழ்க்கை-விளையாட்டு’ (Work-Live-Play) என்ற நவீனக் கோட்பாட்டின் அடிப்படையில் இந்த வளாகம் வடிவமைக்கப்பட உள்ளது.
இளம் தலைமுறை பொறியாளர்கள்
புதுச்சேரியின் இளம் தலைமுறை பொறியாளர்கள் மற்றும் தகவல் தொழில்நுட்பப் பட்டதாரிகள் வேலைவாய்ப்பிற்காக நீண்டகாலமாக சென்னை அல்லது பெங்களூரு போன்ற பெருநகரங்களுக்கு இடம்பெயர்ந்து வந்தனர். இந்தப் புதிய தகவல் தொழில்நுட்பப் பூங்கா அந்தச் சூழலை முற்றிலுமாக மாற்றியமைக்கும் என எதிர்பார்க்கப்படுகிறது. உலகத்தரம் வாய்ந்த பணிச்சூழலைத் தங்களது சொந்த ஊரிலேயே உருவாக்குவதன் மூலம், புதுச்சேரி இளைஞர்கள் இனி வெளியூர்களுக்குச் செல்லாமலேயே தங்களது எதிர்காலத்தை வளமாக்கிக் கொள்ள முடியும். இது மாநிலத்தின் மூளைத் தட்டுப்பாட்டை (Brain Drain) தடுப்பதில் முக்கியப் பங்காற்றும்.
30,000 பேருக்கு வேலை
வேலைவாய்ப்பைப் பொறுத்தவரை, அடுத்த பத்து ஆண்டுகளில் சுமார் 30,000 பேருக்கு இந்தப் பொருளாதார மண்டலம் வேலை வழங்கும் என்று கணிக்கப்பட்டுள்ளது. இது மென்பொருள் பொறியாளர்களுக்கு மட்டுமல்லாமல், கட்டுமானப் பணி, பராமரிப்பு, பாதுகாப்பு மற்றும் உள்ளூர் சேவைத் துறைகளிலும் ஏராளமான வாய்ப்புகளை உருவாக்கும். பொருளாதார ரீதியாகப் பார்க்கும்போது, அடுத்த தசாப்தத்தில் சுமார் 10,000 கோடி ரூபாய் மதிப்பிலான சேவைகளை ஏற்றுமதி செய்ய அரசு இலக்கு நிர்ணயித்துள்ளது. இதன் மூலம் கிடைக்கும் வருவாய், புதுச்சேரியின் சாலைகள், குடிநீர் வசதி மற்றும் பள்ளிக் கல்வித் தரத்தை மேம்படுத்தப் பயன்படுத்தப்படும்.
உழவர்கரை நகராட்சி
இந்தத் திட்டத்திற்கான நிலம் ஏற்கனவே உழவர்கரை நகராட்சிக்குச் சொந்தமானது என்பதால், நிலம் கையகப்படுத்துவதில் ஏற்படும் காலதாமதங்கள் இன்றிப் பணிகள் விரைவாகத் தொடங்கும். மேலும், இந்தப் பூங்கா முற்றிலும் சுற்றுச்சூழலுக்கு உகந்த முறையில் ‘பசுமைக் கட்டிடங்கள்’, நவீனக் கழிவு மேலாண்மை மற்றும் திறன்மிக்க மின்சாரக் கட்டமைப்புகளுடன் உருவாக்கப்படும். கனரகத் தொழிற்சாலைகளுக்குப் பதிலாகத் தகவல் தொழில்நுட்பம் சார்ந்த மென்மையான தொழில்களுக்கு முக்கியத்துவம் அளிக்கப்படுவதால், புதுச்சேரியின் இயற்கை எழில் மாறாமல் பாதுகாக்கப்பட்டும்.