ரூப் டாப் ஓபன் டபுள் டெக்கர் பேருந்துகள் திட்டத்தை கைவிடும் எம்டிசி முடிவால் மக்கள் ஏமாற்றம் அடைந்துள்ளனர்.
ஏசி பேருந்துகள்
இதற்கு மாற்றாக, பயணிகளின் வசதியையும் குளிர்ச்சியான பயணத்தையும் உறுதி செய்யும் வகையில் 20 புதிய இரட்டை அடுக்கு குளிர்சாதன (AC) மின்சாரப் பேருந்துகளை இயக்க முடிவு செய்யப்பட்டுள்ளது. அடுத்த நான்கு மாதங்களுக்குள் இந்தப் பேருந்துகள் பயன்பாட்டிற்கு வரும் என எதிர்பார்க்கப்படுகிறது. இந்தப் புதிய பேருந்துகள் நவீன தொழில்நுட்பத்துடன் வடிவமைக்கப்படவுள்ளன. குறிப்பாக, மாற்றுத்திறனாளிகள் மற்றும் முதியவர்கள் எவ்வித சிரமமுமின்றி ஏறி இறங்கும் வகையில் தாழ்தள வசதிகளுடன் (Low Floor) இவை உருவாக்கப்பட உள்ளன. இதற்கான டெண்டர் நடைமுறைகள் ஏற்கனவே மாற்றியமைக்கப்பட்டு, தனியார் நிறுவனங்களுடன் ஒப்பந்தங்கள் மேற்கொள்ளப்பட்டுள்ளன. இந்தப் பேருந்துகளை இயக்குவது, பராமரிப்பது மற்றும் மின்னேற்ற (Charging) உள்கட்டமைப்புகளை உருவாக்குவது போன்ற பொறுப்புகள் அந்தந்த ஒப்பந்த நிறுவனங்களிடமே ஒப்படைக்கப்பட்டுள்ளன.முதலில் வெளியிடப்பட்ட ஒப்பந்தத்தில் சாதாரண மின்சாரப் பேருந்துகள் மட்டுமே குறிப்பிடப்பட்டிருந்தன. ஆனால், பயணிகளின் கோரிக்கையை ஏற்று அவை குளிர்சாதனப் பேருந்துகளாக மாற்றப்பட்டுள்ளன. திறந்த மேற்கூரை பேருந்துகள் வராது என்பது சில சுற்றுலாப் பயணிகளுக்கு ஏமாற்றத்தை அளித்தாலும், சென்னையின் வெயிலுக்கு ஏசி பேருந்துகளே சரியான தேர்வு என்று போக்குவரத்து ஆர்வலர்கள் கருத்து தெரிவிக்கின்றனர். ஏற்கனவே சென்னையில் கண்டக்டர் இல்லாத ‘பிரீமியம் கோல்டன்’ பேருந்து சேவைகள் அறிமுகம் செய்யப்பட்டு, மக்களிடையே நல்ல வரவேற்பைப் பெற்றுள்ளன. திருவான்மியூர் முதல் கிளாம்பாக்கம் வரையிலும், சிறுசேரி ஐடி பூங்கா முதல் கோயம்பேடு வரையிலும் இயக்கப்படும் இந்தப் பேருந்துகளில் ‘சென்னை ஒன்’ செயலி மூலம் இருக்கைகளை முன்பதிவு செய்யும் வசதியும் உள்ளது.
மெரினா கடற்கரை
மேலும், மெரினா கடற்கரை மற்றும் எழிலகம் உள்ளிட்ட முக்கியப் பகுதிகளை இணைக்கும் வகையில் ‘உலா’ என்ற சுற்றுலாப் பேருந்தும் தற்போது இயக்கப்பட்டு வருகிறது. சென்னையின் பாரம்பரிய இடங்களைச் சுற்றிப் பார்க்க விரும்பும் பயணிகளுக்கு இது ஒரு சிறந்த வாய்ப்பாக அமைந்துள்ளது. தற்போது வரவுள்ள 20 புதிய இரட்டை அடுக்கு ஏசி பேருந்துகளும் இணைந்தால், சென்னை மாநகரின் போக்குவரத்து முகம் முற்றிலும் மாற்றமடையும். இது சாலைகளில் வாகன நெரிசலைக் குறைப்பதுடன், பொதுமக்களுக்குக் குறைந்த செலவில் ஒரு சொகுசுப் பயண அனுபவத்தையும் வழங்கும் என்பதில் ஐயமில்லை.