விமான நிறுவனங்கள் ஏப்ரல் 20 முதல், ஒரு விமானத்தில் உள்ள இருக்கைகளில் குறைந்தது 60 சதவீதத்தை எவ்விதக் கூடுதல் கட்டணமும் இன்றி வழங்க வேண்டும் என்று மத்திய அரசு சமீபத்தில் உத்தரவிட்டிருந்தது.. இந்த நிலையில் இந்த உத்தரவை, நிறுத்தி வைத்துள்ளதாக மத்திய விமானப் போக்குவரத்து அமைச்சகம் வியாழக்கிழமை தெரிவித்தது. புதிய வழிகாட்டுதல்கள் குறித்து விமான நிறுவனங்கள் தங்கள் கவலைகளைத் தெரிவித்ததைத் தொடர்ந்து இந்த நடவடிக்கை எடுக்கப்பட்டுள்ளது.
தனது உத்தரவில், இந்திய விமான நிறுவனங்களின் கூட்டமைப்பின் (FIA) மற்றும் ‘அகாசா ஏர்’ (Akasa Air) நிறுவனத்தின் பிரதிநிதிகள் அமைச்சக அதிகாரிகளைச் சந்தித்து ஆலோசனை நடத்தினர் என்றும், அப்போது அவர்கள் இந்த உத்தரவின் செயல்பாட்டு மற்றும் வணிக ரீதியான தாக்கங்களைச் சுட்டிக்காட்டினர் என்றும் அமைச்சகம் தெரிவித்துள்ளது. குறிப்பாக, விமானக் கட்டணக் கட்டமைப்புகள் மீதான இதன் தாக்கம் மற்றும் தற்போது நடைமுறையில் உள்ள, கட்டுப்பாடுகள் தளர்த்தப்பட்ட கட்டண விதிமுறைகளுடன் இது எந்தளவுக்கு ஒத்திசைந்து உள்ளது என்பது குறித்தும் அவர்கள் எடுத்துரைத்தனர்.
“மேற்கூறியவற்றைக் கருத்தில் கொண்டும், இப்பிரச்சினை குறித்த விரிவான ஆய்வு மேற்கொள்ளப்படும் வரை காத்திருக்கும் வகையிலும், ஒரு விமானத்தில் உள்ள இருக்கைகளில் குறைந்தது 60 சதவீதத்தை இலவசமாக வழங்கும் தொடர்பான விதிமுறை, மறு உத்தரவு வரும் வரை நிறுத்தி வைக்கப்படும் என்று முடிவு செய்யப்பட்டுள்ளது,” என விமானப் போக்குவரத்து அமைச்சகம் தெரிவித்தது.
எனினும், “மேற்கூறிய கடிதத்தில் குறிப்பிடப்பட்டுள்ள மற்ற பயணிகளுக்கான வசதி மேம்பாட்டு நடவடிக்கைகளைத் தொடர்ந்து அமல்படுத்துவதை, இந்திய விமானப் போக்குவரத்து இயக்குநரகம் (DGCA) உறுதி செய்யும்,” என்றும் அமைச்சகம் கூறியது. இருக்கை ஒதுக்கீட்டில் வெளிப்படைத்தன்மை, ஒரே PNR எண்ணின் கீழ் முன்பதிவு செய்த பயணிகளுக்கு அருகருகே இருக்கை ஒதுக்கீடு, இசைக்கருவிகள், விளையாட்டு உபகரணங்கள் மற்றும் செல்லப்பிராணிகளை எடுத்துச் செல்வதற்கான விதிகள், மற்றும் பொருந்தக்கூடிய கட்டணங்கள் குறித்த தெளிவான அறிவிப்பு ஆகியவை இந்த நடவடிக்கைகளில் அடங்கும்.
இருக்கை முன்பதிவு விதிகள் என்ன?
தற்போது, ஒரு விமானத்தில் உள்ள இருக்கைகளில் சுமார் 20 சதவீதத்தை மட்டுமே இலவசமாக முன்பதிவு செய்ய முடியும்; மீதமுள்ள இருக்கைகளுக்குக் கட்டணம் செலுத்த வேண்டும். பெரும்பாலான சமயங்களில், இருக்கைகளை முன்பதிவு செய்வதற்கு விமான நிறுவனங்கள் ரூ. 200 முதல் ரூ. 2,100 வரை கட்டணம் வசூலிக்கின்றன. விமானத்தின் முன் வரிசை இருக்கைகள் மற்றும் கால்களை நீட்டி அமர்வதற்கான கூடுதல் இடவசதி (extra leg room) போன்ற பல்வேறு காரணிகளின் அடிப்படையில் இந்தக் கட்டணம் மாறுபடுகிறது.
கடந்த மார்ச் 18 அன்று விமான போக்குவரத்து அமைச்சகம் ஒரு உத்தரவை பிறப்பித்தது.. அதன்படி இருக்கைகளில் 60 சதவீதத்திற்குப் பயணிகளிடமிருந்து கூடுதல் கட்டணம் வசூலிக்கக் கூடாது என்று விமான நிறுவனங்களுக்கு அமைச்சகம் அறிவுறுத்தியிருந்தது. இருக்கைகளைத் தேர்வு செய்வது உட்படப் பல்வேறு சேவைகளுக்கு விமான நிறுவனங்கள் அதிகப்படியான கட்டணங்களை வசூலிப்பது குறித்த கவலைகள் அதிகரித்து வந்த சூழலில், இந்த உத்தரவு பிறப்பிக்கப்பட்டது.
பின்னர், இந்த உத்தரவு பயணிகளுக்கான வசதி மேம்பாட்டு நடவடிக்கைகளை மேலும் வலுப்படுத்தும் என்று மத்திய விமானப் போக்குவரத்துத் துறை அமைச்சர் கே. ராம்மோகன் நாயுடு தெரிவித்திருந்தார். “60 சதவீத இருக்கைகள் இலவசம், ஒரே குடும்பத்தைச் சேர்ந்தவர்களுக்கு அருகருகே இருக்கை உறுதி செய்யப்படும், மேலும் விளையாட்டு உபகரணங்கள், இசைக்கருவிகள் மற்றும் செல்லப்பிராணிகளை எடுத்துச் செல்வது தொடர்பான விதிமுறைகள் தெளிவாகவும் வெளிப்படையாகவும் இருக்கும்,” என்று அவர் கூறியிருந்தார் என்பது குறிப்பிடத்தக்கது.