தற்போதைய த.வெ.க. அரசும் உயிரிழப்புகளுக்கு நிவாரணம் வழங்கி உண்மையான நீதி வழங்கத் தவறுகிறது என அதிமுக பொதுச்செயலாளர் எடப்பாடி கே. பழனிசாமி குற்றம்சாட்டியுள்ளார். நாகர்கோவில் மற்றும் புழல் சிறை மரணங்கள், கரூர் கூட்ட நெரிசல் உயிரிழப்புகள் உள்ளிட்ட பல்வேறு சம்பவங்களை சுட்டிக்காட்டிய அவர், மாற்றத்தை எதிர்பார்த்த மக்களுக்கு ஏமாற்றமே கிடைத்துள்ளதாக தெரிவித்துள்ளார்.
தமிழக அரசின் செயல்பாடுகள் குறித்து அதிமுக பொதுச்செயலாளர் எடப்பாடி கே. பழனிசாமி கடுமையான அறிக்கை ஒன்றை வெளியிட்டுள்ளார். அதில், திமுக ஆட்சியைப் போலவே தற்போதைய த.வெ.க. அரசும் மனித உயிர்களின் மதிப்பை உணராமல், உயிரிழப்புகளுக்கு நிவாரணம் வழங்குவதையே தீர்வாகக் கருதுகிறது என்று குற்றம்சாட்டியுள்ளார்.
‘மாற்றம்’ என்ற வாக்குறுதி எங்கே?
சட்டம்-ஒழுங்குதிமுக ஆட்சிக்கு முடிவு கட்ட வேண்டும் என்ற எதிர்பார்ப்பில் மக்கள் த.வெ.க. அரசை தேர்வு செய்ததாக குறிப்பிட்டுள்ள எடப்பாடி பழனிசாமி , ஆனால் ஆட்சிக்கு வந்த பின்னரும் காவல் துறை அத்துமீறல்கள், சிறைச்சாலை மரணங்கள் மற்றும் சட்டம்-ஒழுங்கு தொடர்பான பிரச்சினைகள் தொடர்ந்து நடைபெற்று வருவதாக தெரிவித்துள்ளார். இதனால், மாற்றத்தை எதிர்பார்த்த மக்களுக்கு ஏமாற்றமே கிடைத்துள்ளதாக அவர் கூறியுள்ளார்.
சிறை மரணங்கள் குறித்து கேள்வி
நாகர்கோவில் சிறையில் மாற்றுத் திறனாளி கைதி மர்மமான முறையில் உயிரிழந்த சம்பவத்தையும், சென்னை புழல் சிறையில் விசாரணைக் கைதி உயிரிழந்த சம்பவத்தையும் சுட்டிக்காட்டிய எடப்பாடி பழனிசாமி, இந்த மரணங்களுக்கு உரிய நீதி கிடைக்க வேண்டும் என்றார். பாதிக்கப்பட்ட குடும்பங்களுக்கு நிவாரணம் வழங்குவதற்குப் பதிலாக, இதுபோன்ற சம்பவங்கள் நடைபெறாமல் தடுக்க அரசு உறுதியான நடவடிக்கை எடுக்க வேண்டும் என்றும் அவர் வலியுறுத்தினார்.
கரூர் கூட்ட நெரிசல் சம்பவம்
கரூரில் நடைபெற்ற கூட்ட நெரிசலில் 41 பேர் உயிரிழந்த சம்பவத்தையும் தனது அறிக்கையில் குறிப்பிட்டுள்ள அவர், உயிரிழந்தவர்களின் குடும்பங்களுக்கு அரசு வேலை வழங்குவது வரவேற்கத்தக்க நடவடிக்கையாக இருந்தாலும், அதுவே ஒரு உயிரின் இழப்புக்கு ஈடாகாது என்றார். உயிரிழப்புகளைத் தடுக்கும் நிர்வாகத் திறனே அரசின் முதன்மை பொறுப்பாக இருக்க வேண்டும் என்றும் அவர் கூறினார்.
அரசுக்கு எச்சரிக்கை
காவல் நிலைய மரணங்கள், சிறைச்சாலை மரணங்கள் மற்றும் தேவையற்ற என்கவுண்டர்கள் போன்ற சம்பவங்கள் தொடர்வது மக்களிடையே அச்சத்தை ஏற்படுத்துவதாக எடப்பாடி பழனிசாமி தெரிவித்துள்ளார். குற்றச்செயல்களில் ஈடுபடுவோருக்கு எதிராக சட்டப்படி நடவடிக்கை எடுக்காமல், பின்னர் நிவாரணம் அறிவிப்பது பிரச்சினைக்கு தீர்வாகாது என்றும் அவர் விமர்சித்துள்ளார்.
மேலும், மாற்றத்தை விரும்பி வாக்களித்த மக்களின் நம்பிக்கையை அரசு காப்பாற்ற வேண்டும் என்றும், உயிரிழப்புகள் நடந்த பிறகு இழப்பீடு வழங்கும் அணுகுமுறையை கைவிட்டு, அவை நடைபெறாத வகையில் நிர்வாகத்தை வலுப்படுத்த வேண்டும் என்றும் அவர் வலியுறுத்தியுள்ளார். மனித உயிரின் மதிப்பை உணர்ந்து செயல்படுவதே நல்லாட்சிக்கான அடையாளம் என்றும், த.வெ.க.அரசு அந்த பொறுப்பை உணர்ந்து செயல்பட வேண்டும் என்றும் எடப்பாடி கே. பழனிசாமி தனது அறிக்கையில் தெரிவித்துள்ளார்.
விஜய் கட்சி பற்றி அதிரடியாக பேசிய எடப்பாடி பழனிசாமி!
இந்த நிலையில், த.வெ.க. ஆட்சியின் சட்டம்-ஒழுங்கு நிலை, காவல் துறை மற்றும் சிறைச்சாலை மரணங்கள், உயிரிழப்புகளுக்கு வழங்கப்படும் நிவாரணம் உள்ளிட்ட விவகாரங்களை முன்வைத்து எடப்பாடி பழனிசாமி எழுப்பியுள்ள குற்றச்சாட்டுகள் அரசியல் வட்டாரத்தில் விவாதத்தை ஏற்படுத்தியுள்ளன. இதற்கு தமிழக அரசு அல்லது த.வெ.க. தரப்பில் என்ன விளக்கம் அளிக்கப்படுகிறது என்பதும், எதிர்க்கட்சிகள் முன்வைக்கும் குற்றச்சாட்டுகளுக்கு ஆட்சியாளர்கள் எவ்வாறு பதிலளிக்கிறார்கள் என்பதும் அரசியல் ரீதியாக கவனிக்கப்பட வேண்டிய அம்சமாக உள்ளது.
Source link