மிச்செலின் நட்சத்திரம் பெற்ற புகழ்பெற்ற சமையல் கலைஞர் விகாஸ் கண்ணாவும், உணவகத்துறை அதிபரான ஜிம்மி ரிஸ்வியும் இணைந்து தொடங்கியுள புதிய தளமான பங்களோ ஹாஸ்பிட்டாலிட்டி இன்வெஸ்ட்மென்ட்ஸ் ( Bungalow Hospitality Investments ) நிறுவனம் தற்போது கொல்கத்தா சாய் கோ ( Kolkata Chai Co .) நிறுவனத்துடன் ஒரு மூலோபாயக் கூட்டணியை ஏற்படுத்தியுள்ளது.
கொல்கத்தா சாய் நிறுவனம் கடந்த 2019ஆம் ஆண்டில் அனி மற்றும் அயன் சன்யால் ஆகிய சகோதரர்களால் தொடங்கப்பட்டது. லட்சக்கணக்கான அமெரிக்கர்களுக்கு உண்மையான, பாரம்பரிய இந்திய சாயை (தேநீர்) அறிமுகப்படுத்துவதே இந்த பிராண்டின் முக்கிய நோக்கமாகும். இந்நிலையில், தற்போதைய இந்த கூட்டணி மூலம் கிடைக்கும் மாபெரும் முதலீடு, அமெரிக்காவில் தெற்காசிய உணவு மற்றும் பானங்களின் வளர்ச்சிக்கு ஒரு புதிய அத்தியாயத்தை உருவாக்கும் என்று எதிர்பார்க்கப்படுகிறது.
விரிவடையும் கொல்கத்தா சாய்!
கொல்கத்தா சாய் நிறுவனம் நியூயார்க் நகரில் பல கஃபேக்களை நடத்தி வருகிறது. அதோடு, அதன் சொந்த சேனல்கள் மற்றும் தேசிய சில்லறை வர்த்தக கூட்டாளிகள் மூலமாக பல்வேறு வகையான சாய் கலவைகள் மற்றும் கான்சென்ட்ரேட்களை (concentrates) விற்பனை செய்து வருகிறது. இந்த ஒப்பந்தத்தின் கீழ், பங்களோ ஹாஸ்பிட்டாலிட்டி இன்வெஸ்ட்மென்ட்ஸ் நிறுவனம் ஒரு மூலோபாய முதலீட்டை மேற்கொள்வதோடு, நியூயார்க் நகரில் உள்ள தனது பங்களோ ஹாஸ்பிட்டாலிட்டி மேனேஜ்மென்ட் நிறுவனத்தின் உணவகங்களில் கொல்கத்தா சாயின் தயாரிப்புகளை பிரத்தியேகமாக வழங்கவிருக்கிறது.
புதிய மெனு ரெடி!
நுகர்வோர் மத்தியில் கூடுதல் விழிப்புணர்வை ஏற்படுத்தும் நோக்கத்தில் தயாரிப்பு விளம்பரம் மற்றும் கூட்டு விளம்பர நடவடிக்கைகளில் இவ்விரு நிறுவனங்களும் இணைந்து செயல்படத் திட்டமிட்டுள்ளன. இந்த கோடைகாலம் முதல், ‘கப்ஷப்’ (GupShup) மற்றும் விரைவில் திறக்கப்படவுள்ள ‘பஞ்சாப் மீட் ஹவுஸ்’ (Punjab Meet House) உள்ளிட்ட உணவகங்களில் கொல்கத்தா சாயின் பிரத்யேக ‘மசாலா சாய்’ இடம் பெறவிருக்கிறது. அதற்கான ஏற்பாடுகள் தீவிரப்படுத்தப்பட்டுள்ளன. மேலும், இந்த இலையுதிர் காலத்தில் (Autumn) வரையறுக்கப்பட்ட காலத்திற்கான சில சிறப்பு கூட்டு உணவு மெனுக்களும் அறிமுகப்படுத்தப்பட உள்ளன.
அமெரிக்க மக்களுக்கு தெற்காசிய சுவை!
நியூயார்க் நகரின் புகழ்பெற்ற உணவகங்கள் மூலம் வாடிக்கையாளர்களுக்குத் தெற்காசிய சுவைகளை அறிமுகப்படுத்தும் வகையில் இந்த கூட்டணி வடிவமைக்கப்பட்டுள்ளது. முன்னதாக 2024ஆம் ஆண்டில் பிரபல நகைச்சுவை நடிகரும் முதலீட்டாளருமான ஹசன் மின்ஹாஜ் இந்த பிராண்டில் இணைந்தது, உள்ளடக்கங்கள் மற்றும் கலாச்சாரக் கதைகள் மூலம் இந்த பிராண்டை மக்களிடம் கொண்டு சேர்க்க உதவியது குறிப்பிடத்தக்கது.
எதிர்காலத் திட்டங்கள்!
உணவு மற்றும் விருந்தோம்பல் துறையின் அடுத்த தலைமுறை பிராண்டுகளை உருவாக்குதல், வழிகாட்டுதல் மற்றும் முதலீடு செய்வதை நோக்கமாகக் கொண்டு பங்களோ ஹாஸ்பிட்டாலிட்டி இன்வெஸ்ட்மென்ட்ஸ் நிறுவனம் தொடங்கப்பட்டுள்ளது. இந்த தளத்தின் முதல் முதலீடாக கொல்கத்தா சாய் நிறுவனம் அமைந்துள்ளது. சாய் மீதான விகாஸ் கண்ணாவின் தனிப்பட்ட ஈடுபாடும், இந்த பிராண்டின் தரம் மற்றும் நம்பகத்தன்மை மீதான அவரது நம்பிக்கையுமே இந்த முதலீட்டிற்குக் காரணம் என்று கூறப்படுகிறது.
வெளிநாடுகளில் பிரபலமாகும் இந்திய உணவுகள்!
அமெரிக்காவின் முக்கிய சில்லறை வர்த்தகம் மற்றும் உணவகத் துறையில் இந்திய உணவுகள் மற்றும் நுகர்வோர் தயாரிப்புகளின் ஆதிக்கம் அதிகரித்து வருவதாகவும், அந்த மாற்றத்தின் மையப்புள்ளியாகத் தங்களது கூட்டு முயற்சி இருக்கும் என்றும் இரு நிறுவனங்களும் தெரிவித்துள்ளன.
Source link