நீண்ட நாள் கோரிக்கை

தேனி, திண்டுக்கல், கரூர், நாமக்கல் மற்றும் சேலம் மாவட்ட மக்களின் நீண்ட நாள் கோரிக்கையை ஏற்று, இதுவரை வாரத்திற்கு மூன்று நாட்கள் மட்டுமே இயக்கப்பட்டு வந்த இந்த ரயில் சேவை, இனி வாரத்தில் ஆறு நாட்கள் இயக்கப்படும் என அதிகாரப்பூர்வமாக அறிவிக்கப்பட்டுள்ளது. இந்த புதிய நடைமுறை மார்ச் 19-ஆம் தேதி ( அதாவது இன்று) முதல் அமலுக்கு வருகிறது.

சனிக்கிழமை ஒரு நாள் விடுமுறை

முன்பு அமலில் இருந்த கால அட்டவணையின்படி, வண்டி எண் 20601 கொண்ட சென்னை சென்ட்ரல் – போடிநாயக்கனூர் விரைவு ரயிலானது வாரந்தோறும் திங்கள், புதன் மற்றும் வெள்ளிக்கிழமைகளில் மட்டுமே இயக்கப்பட்டு வந்தது. அதேபோல், மறுமார்க்கத்தில் வண்டி எண் 20602 கொண்ட போடிநாயக்கனூர் – சென்னை சென்ட்ரல் விரைவு ரயிலானது செவ்வாய், வியாழன் மற்றும் ஞாயிற்றுக்கிழமைகளில் இயக்கப்பட்டது. தற்போதைய புதிய அறிவிப்பின்படி, இந்த இரண்டு ரயில்களும் சனிக்கிழமை ஒரு நாள் தவிர, வாரத்தின் மற்ற ஆறு நாட்களும் வழக்கமான நேரங்களில் இயக்கப்படும். இது வார இறுதி நாட்களில் பயணம் செய்யும் பயணிகளுக்கும், வணிக ரீதியாகப் பயணிப்பவர்களுக்கும் பெரும் வரப்பிரசாதமாக அமையும்.

தென் மாவட்ட பயணிகள்

இந்த ரயிலின் பயண நேரங்களைப் பொறுத்தவரை, சென்னை சென்ட்ரல் ரயில் நிலையத்திலிருந்து இரவு 10:30 மணிக்குப் புறப்படும் ரயில், மறுநாள் அதிகாலை 2:55 மணிக்குச் சேலத்தைச் சென்றடைகிறது. அங்கிருந்து புறப்பட்டு அதிகாலை 3:54 மணிக்கு நாமக்கல்லையும், 4:33 மணிக்குக் கரூரையும் வந்தடைகிறது. தொடர்ந்து திண்டுக்கல்லுக்கு அதிகாலை 5:47 மணிக்கும், இறுதியாகப் போடிநாயக்கனூருக்குக் காலை 8:50 மணிக்கும் சென்றடையும் வகையில் அட்டவணை அமைக்கப்பட்டுள்ளது. இந்த நேரமானது தென் மாவட்டங்களுக்குச் செல்லும் பயணிகளுக்கு மிகவும் ஏதுவாக இருக்கும். மேலும் ஐயப்பன் கோவிலுக்கு செல்லும் பக்தர்களுக்கு மிகவும் பயனுள்ளதாக இருக்கும்.

பயணிகளின் எண்ணிக்கை உயரும்

மறுமார்க்கத்தில், போடிநாயக்கனூரிலிருந்து இரவு 8:55 மணிக்குப் புறப்படும் ரயில், இரவு 11:42 மணிக்குத் திண்டுக்கல்லை வந்தடைகிறது. பின்னர் நள்ளிரவு 12:48 மணிக்குக் கரூருக்கும், அதிகாலை 1:19 மணிக்கு நாமக்கல்லுக்கும், 2:20 மணிக்குச் சேலத்திற்கும் வந்து சேர்கிறது. இறுதியாக மறுநாள் காலை 7:55 மணிக்குச் சென்னை சென்ட்ரல் ரயில் நிலையத்தை அடைகிறது. இந்த ரயில் சேவை விரிவாக்கத்தின் மூலம் கரூர் மற்றும் நாமக்கல் வழியாகப் பயணிக்கும் பயணிகளின் எண்ணிக்கை கணிசமாக உயரும் என எதிர்பார்க்கப்படுகிறது. மேலும், தேனி மாவட்டத்தின் விவசாயப் பொருட்கள் மற்றும் மலைப்பகுதி விளைபொருட்களைச் சென்னை போன்ற பெருநகரங்களுக்கு விரைவாகக் கொண்டு செல்லவும், சுற்றுலாப் பயணிகளின் வருகையை அதிகரிக்கவும் இந்த ரயில் சேவை பேருதவியாக இருக்கும் என்பதில் சந்தேகமில்லை.