சொந்தமாக ஒரு வீடு வாங்குபவர்கள் பெரும்பாலும் காலியாக உள்ள அடுக்குமாடி குடியிருப்புகளின் (flats) பராமரிப்பு தொடர்பான சிக்கல்களை எதிர்கொள்கின்றனர். பராமரிப்புக் கட்டணத்தின் மீது பில்டர் 18 சதவீத ஜிஎஸ்டி வசூலிக்கும்போது இந்தச் சிக்கல் தீவிரமாகிறது. குடியிருப்புச் சங்கத்தின் பொறுப்பு ‘குடியிருப்போர் நலச் சங்கத்திடம்’ (RWA) ஒப்படைக்கப்படும் வரை அந்த வீட்டின் பராமரிப்புப் பொறுப்பு பில்டரிடமே இருக்கும். இருப்பினும், காலியாக உள்ள வீடுகளுக்குப் பராமரிப்பு அவசியமா, அப்படி அவசியமென்றால் 18 சதவீத ஜிஎஸ்டி எப்போது செலுத்தப்பட வேண்டும் என்பதுதான் பெரிய கேள்வியாக உள்ளது.
ரியல் எஸ்டேட் (முறைப்படுத்துதல் மற்றும் மேம்பாடு) சட்டம் ( RERA ) விதிகளின்படி, காலியாக உள்ள வீட்டிற்கும் நீங்கள் பராமரிப்புக் கட்டணத்தைச் செலுத்த வேண்டும். அதாவது, பில்டரிடம் இந்தக் கட்டணத்தைச் செலுத்த வேண்டியிருக்கும். மேலும், குடியிருப்பு நலச் சங்கத்திடம் (RWA) பொறுப்பு ஒப்படைக்கப்பட்ட பிறகும் காலியாக உள்ள வீட்டிற்கான பராமரிப்புக் கட்டணத்தை நீங்கள் செலுத்த வேண்டும்.
வீட்டுப் பராமரிப்புக்கான விதிமுறைகள்!
RERA விதிகளின்படி, ஒரு வீட்டைப் பதிவு செய்த பிறகு அதன் பராமரிப்புக்கு நீங்களே பொறுப்பாவீர்கள். இருப்பினும், பொதுவான பகுதிகளில் பாதுகாப்பு, லிஃப்ட், சுத்தம் செய்தல், தண்ணீர் மற்றும் பவர் பேக்கப் போன்ற அத்தியாவசிய வசதிகள் தொடர்ந்து தேவைப்படும். எனவே, நிலையான பொதுக் கட்டணங்களை வசூலிக்க பில்டர் மற்றும் RWA ஆகிய இரு தரப்பினருக்கும் முழு அதிகாரம் உள்ளது. ஆனால், வீடு விற்கப்படும் வரை அதற்கான பராமரிப்புச் செலவை பில்டரே தனது சொந்தப் பணத்திலிருந்து செலுத்த வேண்டும். வீடு விற்கப்பட்ட பிறகு கடந்த கால பராமரிப்புச் செலவுக்கான சுமையை வீட்டின் உரிமையாளர் மீது சுமத்த முடியாது.
பராமரிப்புக் கட்டணத்தின் மீதான ஜிஎஸ்டி!
விதிமுறைகளின்படி, பராமரிப்புக் கட்டணத்தின் மீதும் 18 சதவீத ஜிஎஸ்டி விதி பொருந்தும். ஆனால் இதில் சில நிபந்தனைகள் உள்ளன. RWA அமைக்கப்படும் வரை பில்டரே பராமரிப்புக் கட்டணத்தை வசூலிக்கிறார். ஆனால், ஜிஎஸ்டி வசூலிப்பதற்கான விதிகள் பில்டருக்கும் RWA அமைப்புக்கும் மாறுபடுகின்றன. பில்டர் எந்தவொரு பராமரிப்புக் கட்டணத்தின் மீதும் 18 சதவீத ஜிஎஸ்டியை வசூலிக்கலாம். அதாவது, பராமரிப்புக் கட்டணம் ரூ. 2000 ஆக இருந்தாலும் அதன் மீது 18 சதவீத ஜிஎஸ்டி செலுத்த வேண்டியிருக்கும். ஆனால், RWA அமைப்பைப் பொறுத்தவரை இந்த விதி பொருந்தாது. உங்கள் மாதாந்திரப் பராமரிப்புக் கட்டணம் 7500 ரூபாய்க்கும் குறைவாக இருந்தால், RWA உங்களிடமிருந்து 18 சதவீத ஜிஎஸ்டியை வசூலிக்க முடியாது.
ஜிஎஸ்டி தொடர்பான மற்றொரு விதிமுறை என்னவென்றால், ஒரு குடியிருப்பு நலச் சங்கத்தின் மொத்த ஆண்டு வசூல் ரூ. 20 லட்சத்திற்கும் குறைவாக இருந்தால் அது ஜிஎஸ்டியை வசூலிக்க முடியாது. ஆனால், ஒரு பில்டரின் ஆண்டு வருவாய் எப்போதும் ரூ. 20 லட்சத்துக்கும் அதிகமாக இருப்பதால், பில்டருக்கு ஒவ்வொரு ஆண்டும் ஜிஎஸ்டியை வசூலிக்கும் உரிமை உள்ளது. அதாவது, 7500 ரூபாய்க்கும் குறைவான பராமரிப்புக் கட்டணங்களுக்கான ஜிஎஸ்டி விலக்கு, குடியிருப்பு நலச் சங்கத்திற்கு மட்டுமே பொருந்தும்; பில்டருக்கு அல்ல என்பதை நினைவில் கொள்ளவும்.
இதற்கிடையில், காலியாக உள்ள குடியிருப்புகளுக்கான பராமரிப்புக் கட்டணத்தில் குடியிருப்பு நலச் சங்கம் தள்ளுபடி வழங்கலாம். ஒவ்வொரு குடியிருப்பு நலச் சங்கத்துக்கும் தனியாக அதன் துணை விதிகள் உள்ளன. அவற்றை ஒருமித்த கருத்தின் மூலம் மாற்றலாம். காலியாக உள்ள குடியிருப்புகளுக்கான நிலையான பராமரிப்புக் கட்டணத்தில் 10 முதல் 20 சதவீதம் வரையிலான தள்ளுபடி குறித்த பிரச்சினையை நீங்கள் குடியிருப்பு நலச் சங்கத்தின் பொதுக்குழு கூட்டத்தில் எழுப்பலாம். இதைச் செய்வதற்கு உங்கள் காலி குடியிருப்பு குறித்து குடியிருப்பு நலச் சங்கத்திற்கு எழுத்துப்பூர்வ அறிவிப்பை வழங்க வேண்டும் என்பது குறிப்பிடத்தக்கது.