ரயில் டிக்கெட் முன்பதிவு செய்யும் மக்கள் இந்த வசதியைப் பயன்படுத்தி மிக விரைவாக டிக்கெட் புக்கிங் செய்யலாம். இதில் சீட் கிடைப்பதற்கான வாய்ப்புகள் அதிகமாக இருக்கும். அதேபோல, பயணிகளின் வசதிக்கான செயற்கை நுண்ணறிவு வசதியும் அறிமுகம் செய்யப்பட்டுள்ளது. அதையும் நீங்கள் பயன்படுத்தலாம்.
ரயில்களில் பயணிக்கும் லட்சக்கணக்கான பயணிகளுக்கு தட்கல் டிக்கெட்டுகளை முன்பதிவு செய்வது ஒரு சவாலான காரியமாகவே இருக்கிறது. காலை 10 மணிக்கு (ஏசி வகுப்பு) மற்றும் 11 மணிக்கு (ஸ்லீப்பர் வகுப்பு) தட்கல் முன்பதிவு தொடங்கியவுடன், IRCTC இணையதளத்தில் பயனர்களின் வருகை பெருமளவில் அதிகரிக்கிறது. இத்தகைய சூழலில் ஒரு நிமிடம் தாமதம் செய்தால் கூட உறுதிசெய்யப்பட்ட டிக்கெட்டைப் பெறும் வாய்ப்பு குறைந்துவிடும். இந்தப் பிரச்சினையைத் தீர்க்க, IRCTC தனது புதிய ‘பீட்டா’ இணையதளத்தில் இரண்டு சிறப்பு அம்சங்களைச் சேர்த்துள்ளது. இவை தட்கல் போன்ற அவசர முன்பதிவுகளுக்குப் பெரிதும் உதவியாக இருக்கும் என்று கூறப்படுகிறது.
லாகின் செய்யாமலேயே ஸ்மார்ட் முன்பதிவு!
முந்தைய புக்கிங் முறையில், தட்கல் முன்பதிவு தொடங்குவதற்குச் சற்று முன்பு உள்நுழைந்தால் பெரும்பாலும் ‘செஷன்’ (session) காலாவதியாகிவிடும். இதனால் நீங்கள் மீண்டும் மீண்டும் உள்நுழைய வேண்டிய நிலை ஏற்பட்டு, உறுதிசெய்யப்பட்ட டிக்கெட் கிடைக்கும் வாய்ப்பு குறைந்துவிடும். ஆனால், புதிய மேம்படுத்தப்பட்ட வசதியின் மூலம் ரயிலைத் தேடுவதற்கு நீங்கள் இனி உள்நுழைய வேண்டிய அவசியம் இல்லை. உள்நுழையாமலேயே முகப்புப் பக்கத்தில் ரயில் விவரங்கள், சீட் மற்றும் கட்டணம் ஆகியவற்றை நேரடியாகப் பார்க்கலாம்.
மேலும், புக்கிங் பக்கத்தை மீண்டும் மீண்டும் புதுப்பிப்பது (refresh) அல்லது 3A, 2A மற்றும் SL போன்ற பல்வேறு வகுப்புகளுக்குத் தனித்தனியாகக் கிளிக் செய்வது போன்ற சிரமங்கள் முற்றிலும் நீக்கப்பட்டுள்ளன. திரையில் உறுதிசெய்யப்பட்ட இருக்கையைக் கண்டவுடன் ‘Login’ பட்டனைக் கிளிக் செய்து உடனடியாகப் பணம் செலுத்தும் பக்கத்திற்குச் சென்று டிக்கெட்டை முன்பதிவு செய்யலாம்.
செயற்கை நுண்ணறிவு கணிப்பு கருவி!
தட்கல் டிக்கெட் முன்பதிவின் போது பலமுறை முயன்றும் உறுதிசெய்யப்பட்ட இருக்கை கிடைக்காமல், காத்திருப்போர் பட்டியலில் (waitlist) உள்ள டிக்கெட்டே நமக்கு கிடைக்கும். டிக்கெட் உறுதி செய்யப்படுமா இல்லையா என்பது குறித்துப் பயணிகள் பெரும்பாலும் குழப்பமடைகிறார்கள். இந்தக் குழப்பத்தைத் தீர்க்க புதிய இணையதளத்தில் ஒரு AI கருவி இணைக்கப்பட்டுள்ளது. IRCTC-யின் இந்தப் புதிய AI கருவி கடந்த கால முன்பதிவு முறைகள் மற்றும் தரவுகளைப் பகுப்பாய்வு செய்து உங்கள் காத்திருப்போர் பட்டியல் டிக்கெட் உறுதி செய்யப்படுவதற்கான வாய்ப்பை துல்லியமாகக் கணிக்கிறது. இந்தக் துல்லியமான கணிப்பின் மூலம் அதே ரயிலில் காத்திருப்போர் பட்டியல் டிக்கெட்டை நம்பியிருக்கலாமா அல்லது வேறு ரயிலில் இருக்கையைத் தேடலாமா என்பதைப் பயணிகள் விரைவாக முடிவு செய்யலாம்.
தட்கல் முன்பதிவை வெற்றிகரமாக முடிக்க சில டிப்ஸ்!
இந்த புதிய வசதிகளுடன் கீழே கொடுக்கப்பட்டுள்ள மூன்று வழிமுறைகளை நீங்கள் பின்பற்றினால், உங்கள் தட்கல் முன்பதிவு வேகம் 10 மடங்கு அதிகரிக்கும். அதோடு, உறுதிப்படுத்தப்பட்ட டிக்கெட் கிடைப்பதற்கான வாய்ப்புகளும் அதிகமாக இருக்கும்.
‘மாஸ்டர் லிஸ்ட்’ தயார் நிலையில் வைத்திருக்க வேண்டும்!
தட்கல் முன்பதிவு தொடங்குவதற்கு குறைந்தது அரை மணி நேரத்திற்கு முன்பே, உங்கள் IRCTC கணக்கில் உள்ள “My Profile” பகுதிக்குச் சென்று “Master List” என்ற விருப்பத்தின் கீழ் பயணிகள் பெயர், வயது மற்றும் அடையாள அட்டை விவரங்களை சேமித்து வைக்க வேண்டும். முன்பதிவு செய்யும்போது பெயரை டைப் செய்ய வேண்டிய அவசியம் இருக்காது. பெயரைத் தேர்ந்தெடுத்தாலே பயணிகளின் முழு விவரங்களும் தானாகவே நிரப்பப்பட்டுவிடும்.
IRCTC இ-வாலட் பயன்படுத்த வேண்டும்!
நெட் பேங்கிங், கிரெடிட் கார்டு அல்லது UPI மூலம் பணம் செலுத்தும்போது, பெரும்பாலும் OTP பெறுவதில் தாமதம் அல்லது வங்கி சர்வர்களின் வேகம் குறைவு போன்ற சிக்கல்கள் ஏற்படலாம். ஆனால், உங்கள் IRCTC இ-வாலட்டில் ஏற்கனவே பணத்தைச் சேர்த்து வைத்திருந்தால் எந்தவிதத் தோல்வியும் இல்லாமல் விரைவாக பணம் செலுத்தும் செயல்முறை முடிந்துவிடும்.
‘விகல்ப்’ (VIKALP) விருப்பத்தைத் தேர்ந்தெடுக்க வேண்டும்!
டிக்கெட் முன்பதிவு செய்யும்போது, ’VIKALP’ (விகல்ப்) என்ற விருப்பத்தைத் தேர்ந்தெடுக்க மறக்காதீர்கள். இதன் மூலம், சார்ட் தயாரிக்கப்படும் நேரத்திற்குள் உங்கள் தட்கல் காத்திருப்போர் பட்டியல் டிக்கெட் உறுதி செய்யப்படாவிட்டால் அதே வழித்தடத்தில் செல்லும் மாற்று ரயிலில் காலியாக உள்ள இருக்கை உங்களுக்கு ஒதுக்கப்படும்.
Source link