கிழிந்த, பழைய மற்றும் நனைந்த காகித நோட்டுகளால் நாம் அனைவரும் ஏதோ ஒரு கட்டத்தில் சிரமப்பட்டிருப்போம். துணி துவைக்கும் போது தவறுதலாக பாக்கெட்டில் இருக்கும் ரூபாய் நோட்டு நீரில் நனைந்து பாழாவது பலருக்கு நடந்திருக்கும். இந்தப் பிரச்சனைக்குத் தீர்வு காண உலகெங்கிலும் உள்ள பல நாடுகளில் பிளாஸ்டிக் அல்லது ‘பாலிமர்’ (Polymer) ரூபாய் நோட்டுகளின் பயன்பாடு வேகமாக அதிகரித்து வருகிறது. பிளாஸ்டிக் ரூபாய் நோட்டுகளைப் போலியாகத் தயாரிப்பது சாத்தியமே இல்லை என்று பலர் கூறுகின்றனர். ஆனால் அது உண்மையா?
பிளாஸ்டிக் ரூபாய் நோட்டுகளை நகலெடுக்க முடியாதா?
பிளாஸ்டிக் நோட்டுகளின் அசல் நகலை உருவாக்குவது மிகவும் கடினம். ஆனால் முற்றிலும் சாத்தியமற்றது அல்ல. ஏனெனில், பிளாஸ்டிக் நோட்டுகள் சாதாரண பிளாஸ்டிக்கால் ஆனவை அல்ல. அவை BOPP என்ற சிறப்பு வகை பாலிமர் படலத்தால் தயாரிக்கப்படுகின்றன. இவற்றில் வெளிப்படையான விண்டோ, வண்ணம் மாறும் மை மற்றும் சிறப்பு 3D வடிவங்கள் போன்ற பல பாதுகாப்பு அம்சங்கள் உள்ளன.
காகித நோட்டுகளை எளிதாக புகைப்பட நகல் (Photocopy) அல்லது பிரிண்ட் செய்துவிட முடியும். ஆனால், பிளாஸ்டிக் நோட்டுகளின் பாதுகாப்பு அம்சங்களை நகலெடுக்க கோடிக்கணக்கான ரூபாய் மதிப்பிலான அதிநவீன இயந்திரங்களும், சிறப்புப் பொருட்களும் தேவைப்படும். இதனால், கள்ள நோட்டு தயாரிப்பாளர்களால் இவற்றை எளிதில் போலி செய்ய முடிவதில்லை.
பிளாஸ்டிக் நோட்டுகளின் முக்கிய நன்மைகள்!
கிழிதல் மற்றும் நனைதல் பிரச்சனை இல்லை: இந்த நோட்டுகள் தண்ணீரில் கரைந்துபோகாது. எளிதில் கிழியாது. இவற்றின் மீது டீயோ அல்லது தண்ணீரோ சிந்தினாலும் வெறும் துணியால் துடைத்து எளிதாகப் பயன்படுத்தலாம்.
நீடித்து உழைக்கும் தன்மை: காகித நோட்டுகள் 1 முதல் 2 ஆண்டுகளில் பாழாகிவிடும் நிலையில், பிளாஸ்டிக் நோட்டுகள் காகித நோட்டுகளை விட 4 மடங்கு வரை அதிக காலம் உழைக்கக்கூடியவை.
பாக்டீரியா மற்றும் அழுக்கிலிருந்து பாதுகாப்பு: காகித நோட்டுகளில் வேர்வை, தூசி மற்றும் கிருமிகள் எளிதில் படிந்துவிடும். ஆனால், பிளாஸ்டிக் நோட்டுகளின் மேற்பரப்பில் அழுக்கும் ஈரப்பதமும் எளிதில் ஒட்டுவதில்லை.
கள்ளநோட்டு கட்டுப்பாடு: இவற்றின் சிக்கலான வடிவமைப்பு மற்றும் வெளிப்படையான அம்சங்கள் சட்டவிரோத கள்ளநோட்டு புழக்கத்தைத் தடுக்கப் பெரிதும் உதவுகின்றன.
சுற்றுச்சூழலுக்கு உகந்த மறுசுழற்சி: இந்த நோட்டுகள் பழையதான பிறகோ அல்லது சேதமடைந்த பிறகோ, அவற்றை உருக்கி வேறு பிளாஸ்டிக் பொருட்களைச் செய்ய மறுசுழற்சி செய்ய முடியும்.
பிளாஸ்டிக் நோட்டுகளின் குறைபாடுகள்!
ஒவ்வொரு நாணயத்திற்கும் இரண்டு பக்கங்கள் இருப்பது போல, பிளாஸ்டிக் நோட்டுகளிலும் சில குறைபாடுகள் உள்ளன.
அச்சிடுதல் செலவு அதிகம்: காகித நோட்டுகளை விட பிளாஸ்டிக் நோட்டுகளை அச்சிடுவதற்கான ஆரம்பச் செலவு மிக அதிகம். இருப்பினும், அவை அதிக காலம் உழைப்பதால் நாளடைவில் இச்செலவு ஈடுசெய்யப்பட்டுவிடும்.
மடிக்கும் போது ஏற்படும் பிரச்சனை: பிளாஸ்டிக் நோட்டுகளை ஒருமுறை பலமாக மடித்துவிட்டால் அதில் ஏற்படும் மடிப்புக்குறிகள் முற்றிலும் மறைவதில்லை.
ஏடிஎம் மற்றும் இயந்திரங்களில் சிரமம்: ஒரு நாட்டில் திடீரென பிளாஸ்டிக் நோட்டுகள் அறிமுகப்படுத்தப்பட்டால் அனைத்து வங்கி ஏடிஎம் இயந்திரங்கள் மற்றும் பணத்தை எண்ணும் இயந்திரங்களை அதற்கேற்ப மாற்றியமைக்க வேண்டும். அதற்கு அதிகம் செலவாகும்.
வெப்பத்தினால் சேதம்: அதிக வெப்பம் அல்லது நேரடியாகத் தீயில் படும்போது இந்த நோட்டுகள் உருகிப்போகும் வாய்ப்புள்ளது. இதுபோல, இந்த பிளாஸ்டிக் நோட்டுகளில் நன்மைக்ளும் தீமைகளும் உள்ளன. அவை பயன்பாட்டுக்கு வந்தால் தான் மக்களிடையே அது எப்படிப்பட்ட புழக்கத்தைக் கொண்டிருக்கும் என்பது தெரியவரும்.