சென்னை பெருநகரப் பகுதிகளில் நிலவும் போக்குவரத்து நெரிசலைக் குறைக்கவும், சாலைப் பாதுகாப்பை அதிகரிக்கவும், பொதுப் போக்குவரத்தைச் சீரமைக்கவும் பெருநகர சென்னை மாநகராட்சி ஒரு புதிய மைல்கல்லை எட்டவுள்ளது. ‘அறிவுசார் போக்குவரத்து அமைப்பு’ (Intelligent Transport System – ITS) எனப்படும் நவீனத் தொழில்நுட்பத் திட்டத்தை வரும் ஆகஸ்ட் மாதத்தில் மாநகராட்சி அறிமுகப்படுத்தவுள்ளது.
இத்திட்டம் சென்னை நகரத்தின் ஒட்டுமொத்தப் போக்குவரத்து மேலாண்மையை அதிநவீன தொழில்நுட்பத்தின் மூலம் டிஜிட்டல் மயமாக்கும் முயற்சியாகும் என்று சென்னை மாநகராட்சி ஆணையர் ஜி.எஸ். சமீரன் தெரிவித்துள்ளார்.
ஜைக்கா நிதி உதவியும் திட்ட மதிப்பீடும்
இத்திட்டம் ஜப்பான் சர்வதேச கூட்டுறவு முகமையின் (JICA) நிதியுதவியுடன் ₹530 கோடி மதிப்பீட்டில் செயல்படுத்தப்பட்டு வருகிறது.
சென்னை பெருநகரப் பகுதியின் போக்குவரத்து முறையை முழுமையாக மறுசீரமைக்கும் நோக்கில் உருவாக்கப்பட்டுள்ள இத்திட்டம், இரண்டு முக்கியப் பிரிவுகளாகப் பிரிக்கப்பட்டுச் செயல்படுத்தப்படுகிறது:
போக்குவரத்துத் தகவல் மற்றும் மேலாண்மை அமைப்பு (TIMS): சென்னை பெருநகர போக்குவரத்துக் காவல்துறையின் (GCTP) பயன்பாட்டிற்காக உருவாக்கப்படுகிறது. நகர்ப்புற பேருந்து சேவை அமைப்பு (CBS): மாநகர போக்குவரத்துக் கழகத்தின் (MTC) செயல்பாடுகளை மேம்படுத்த உருவாக்கப்படுகிறது.
1. திறன்மிகு போக்குவரத்து மேலாண்மை அமைப்பு (TIMS)
போக்குவரத்து நெரிசலைக் கட்டுப்படுத்தவும், விதிகளை மீறுவோரைக் கண்டறியவும் நகரின் முக்கியச் சந்திப்புகளில் பல்வேறு அதிநவீனத் தொழில்நுட்ப சாதனங்கள் பொருத்தப்பட்டு வருகின்றன: தானியங்கி சிக்னல் அமைப்பு (ATCS): வாகனங்களின் எண்ணிக்கைக்கு ஏற்ப சிக்னல் நேரத்தை மாற்றியமைக்கும் இந்த அமைப்பு 101 சந்திப்புகளில் வெற்றிகரமாக நிறுவப்பட்டுத் தற்காலிகக் கட்டுப்பாட்டு மையத்துடன் இணைக்கப்பட்டுள்ளது. சிவப்பு விளக்கு மற்றும் வேகக் கட்டுப்பாட்டு மீறல் கண்டறிதல் (RLVD & SLVD): சிக்னலை மீறிச் செல்லும் வாகனங்களைக் கண்டறியும் அமைப்பு 25 இடங்களிலும், அதிவேகமாகச் செல்லும் வாகனங்களைக் கண்காணிக்கும் அமைப்பு 3 இடங்களிலும் பொருத்தப்பட்டுச் சலான் அனுப்பும் வசதி உருவாக்கப்பட்டுள்ளது. விரைவில் மேலும் 7 இடங்களில் இது நிறுவப்படும். விபத்து மற்றும் அவசரக்காலக் கண்காணிப்பு (TIDS): நகரின் முக்கிய 47 மேம்பாலங்களில் விபத்துகளை உடனடியாய்க் கண்டறிந்து அவசர உதவி வழங்கிடும் அமைப்புகள் நிறுவப்பட்டுள்ளன. தகவல் பலகைகள் (VMS): மாற்றுப் பாதைகள் மற்றும் நேரலைச் செய்திகளைப் பயணிகளுக்குத் தெரிவிக்க 3 இடங்களில் நவீன மின்னணுத் தகவல் பலகைகள் வைக்கப்பட்டுள்ளன.இதன் முதன்மைக் கட்டுப்பாட்டு மையமாக, போக்குவரத்து காவல் தலைமை அலுவலகத்தில் அதிநவீன ‘போக்குவரத்துத் தகவல் மற்றும் மேலாண்மை மையம்’ ஆகஸ்ட் இறுதிக்குள் அமைத்து முடிக்கப்பட உள்ளது.
2. நவீனமயமாக்கப்படும் மாநகரப் பேருந்து சேவை (CBS)
பொதுப் போக்குவரத்தைப் பயன்படுத்தும் சென்னை மக்களுக்குச் சிறந்த அனுபவத்தை வழங்குவதற்காக MTC பேருந்து சேவைகள் நவீனமாக்கப்படுகின்றன: வாகனக் கண்காணிப்பு சாதனம் (AVLS): மொத்தம் 3,500 மாநகரப் பேருந்துகளில் ஜி.பி.எஸ் சார்ந்த கண்காணிப்பு சாதனங்கள் பொருத்தப்படுகின்றன. பயணிகள் தகவல் திரை (PIS): 616 பேருந்து நிறுத்தங்கள் மற்றும் பணிமனைகளில் பேருந்துகள் வரும் நேரத்தைக் துல்லியமாகக் காட்டும் டிஜிட்டல் திரைகள் அமைக்கப்படுகின்றன. பணிமனை மேலாண்மை (DMS): 32 பேருந்து பணிமனைகளின் செயல்பாடுகள் முழுமையாக கணினிமயமாக்கப்படுகின்றன.
திட்டத்தைச் செயல்படுத்துவதில் உள்ள சவால்கள்
இத்திட்டத்திற்கான உள்கட்டமைப்பு மற்றும் நெட்வொர்க் வசதிகளைச் சென்னை மாநகராட்சியும் மாநில நெடுஞ்சாலைத் துறையும் விரைவுபடுத்தி வருகின்றன.
தொழில்நுட்ப ரீதியாகச் சாதனங்களைப் பொருத்துவதில் சிக்கல் உள்ள இடங்களில் மாற்று இடங்கள் கண்டறியப்பட்டு உள்கட்டமைப்பு பணிகள் முன்னெடுக்கப்படுகின்றன. மேலும், மின் இணைப்புகள் வழங்குவது மற்றும் சந்திப்புகளைச் சீரமைப்பது போன்ற பணிகளும் தீவிரமாக நடைபெற்று வருகின்றன.
அறிவுசார் போக்குவரத்து அமைப்பு
வரும் ஆகஸ்ட் மாதம் செயல்பாட்டுக்கு வரவுள்ள இந்த ‘அறிவுசார் போக்குவரத்து அமைப்பு’, சென்னையின் சாலைகளைப் பாதுகாப்பானதாகவும், பயணங்களை விரைவானதாகவும் மாற்றும். சென்னை ஸ்மார்ட் நகரமாக உருவெடுத்து வரும் சூழலில், இத்திட்டம் நகர்ப்புறப் போக்குவரத்தில் மிகப்பெரிய மாற்றத்தைக் கொண்டுவரும் என எதிர்பார்க்கப்படுகிறது.
Source link