நீட் உள்ளிட்ட தேர்வு வினாத்தாள் கசிவு மற்றும் பிற தேர்வு முறைகேடுகளை எதிர்த்து டெல்லி ஜந்தர் மந்தரில் கடந்த 36 நாட்களாக மாணவர்கள் தொடர் போராட்டத்தில் ஈடுபட்டு வந்தனர். மத்திய கல்வி அமைச்சர் தர்மேந்திர பிரதான் பதவி விலக வேண்டும், தேர்வு முறைகேடுகள் குறித்து முழுமையான விசாரணை நடத்த வேண்டும் உள்ளிட்ட கோரிக்கைகளை வலியுறுத்தி நடைபெற்ற இந்தப் போராட்டத்தின் போது, போலீசார் மற்றும் மத்திய ஆயுதக் காவல் படை அதிகாரிகள் அளவுக்கு மீறிய பலம் பயன்படுத்தியதாக எழுந்த குற்றச்சாட்டுகள் தொடர்பாக உச்சநீதிமன்றம் முக்கிய உத்தரவுகளை பிறப்பித்துள்ளது.
மாணவர் போராட்டம் தொடர்பான வழக்கு
இந்த வழக்கை தலைமை நீதிபதி சூர்ய காந்த், நீதிபதி ஜே. ஜோய்மால்யா பாக்சி மற்றும் நீதிபதி வி. மோகனா ஆகியோர் அடங்கிய அமர்வு விசாரித்தது. மாநிலங்களவை உறுப்பினர் மனோஜ் ஜா உள்ளிட்டோர் தாக்கல் செய்த மனுக்களில், பீகாரின் சிவான் மாவட்டத்தில் போராட்டக்காரர் மீது போலீஸ் அதிகாரி ஒருவர் ஏகே-47 துப்பாக்கியை பயன்படுத்தியதாகவும், பல்வேறு மாநிலங்களில் மாணவர்கள் மீது அளவுக்கு மீறிய வன்முறை நிகழ்த்தப்பட்டதாகவும் குற்றம்சாட்டப்பட்டது.
போலீஸ் அத்துமீறல் குற்றச்சாட்டுகள்
விசாரணையின்போது, 19 வயது இளைஞர் ஒருவர் பெல்லட் கன் தாக்குதலால் பார்வையை இழந்தது, மின்சார தடியடி, ஆணிகள் பொருத்தப்பட்ட லாத்திகள், சாதாரண உடையில் வந்த போலீசாரின் தாக்குதல், பெண் போராட்டக்காரர் மீது வன்முறை, ஊடகவியலாளர் தாக்கப்பட்ட சம்பவம் உள்ளிட்ட பல்வேறு குற்றச்சாட்டுகள் நீதிமன்றத்தின் கவனத்திற்கு கொண்டு வரப்பட்டன.
அமைதியான போராட்டம் ஜனநாயக உரிமை
மாணவர்கள் அரசியலமைப்புச் சட்டத்தின் வரம்புக்குள் அமைதியான முறையில் போராட்டம் நடத்த உரிமை பெற்றவர்கள் என்று தலைமை நீதிபதி சூர்ய காந்த் தெரிவித்தார். போராட்டங்களில் சமூக விரோதிகள் ஊடுருவியிருக்கலாம் என்ற அரசு தரப்பு வாதம் இருந்தாலும், அதனால் அமைதியாக போராடிய மாணவர்களின் அடிப்படை உரிமைகள் பாதிக்கப்படக் கூடாது என்றும் அவர் குறிப்பிட்டார்.
மேலும், ஜந்தர் மந்தரில் போராட்டத்தை கலைப்பதற்கு முன் பின்பற்ற வேண்டிய நடைமுறைகள் மீறப்பட்டதாக மனுதாரர்கள் தரப்பில் வாதிடப்பட்டது. ஒலிபெருக்கி மூலம் எச்சரிக்கை, தண்ணீர் பீரங்கி, பின்னர் மட்டுமே லாத்திசார்ஜ் போன்ற நடைமுறைகள் கடைப்பிடிக்கப்படவில்லை என்றும் தெரிவிக்கப்பட்டது.
SIT அமைக்க உத்தரவு
மனுதாரர்கள் முன்னாள் உச்சநீதிமன்ற நீதிபதி தலைமையில் சிறப்பு விசாரணைக் குழு (SIT) அமைக்க கோரிக்கை விடுத்தனர். இதையடுத்து, மாணவர் போராட்டங்களில் நடந்ததாகக் கூறப்படும் வன்முறை சம்பவங்களை விசாரிக்க சிறப்பு விசாரணைக் குழு (SIT) அமைக்க உச்சநீதிமன்றம் உத்தரவிட்டது.
மேலும், குற்றப் பின்னணி இல்லாத கைது செய்யப்பட்ட அல்லது காவலில் உள்ள மாணவர்களை உடனடியாக விடுவிக்கவும், மாணவர்களுக்கு எதிராக கட்டாய நடவடிக்கைகள் எடுக்கக் கூடாது என்றும், அவர்களின் தனிப்பட்ட டிஜிட்டல் தகவல்களை வெளியிடக் கூடாது என்றும் இடைக்கால உத்தரவு பிறப்பிக்கப்பட்டது.
மாநிலங்களுக்கு நோட்டீஸ்
சுயாதீன விசாரணை நடத்துவதற்கு மத்திய அரசுக்கு ஆட்சேபனை இல்லை என்று சொலிசிட்டர் ஜெனரல் துஷார் மேத்தா தெரிவித்தார். அதேநேரத்தில், 250-க்கும் மேற்பட்ட போலீசார் காயமடைந்ததாகவும், போராட்டங்களில் சமூக விரோதிகள் ஊடுருவியிருக்கலாம் என்றும் அவர் வாதிட்டார்.
இறுதியாக, டெல்லி தேசிய தலைநகர் பிரதேச அரசுடன் சேர்த்து மத்தியப் பிரதேசம், மகாராஷ்டிரா, பீகார், கேரளா, உத்தரப் பிரதேசம், அசாம் மற்றும் மேற்கு வங்காளம் உள்ளிட்ட மாநிலங்களின் தலைமைச் செயலாளர்களுக்கும் உச்சநீதிமன்றம் நோட்டீஸ் அனுப்ப உத்தரவிட்டது. மாணவர் போராட்டங்கள் தொடர்பாக சுயாதீன விசாரணை நடத்தப்பட வேண்டும் என்ற நீதிமன்றத்தின் இந்த உத்தரவு, நாட்டின் கல்வி மற்றும் ஜனநாயக உரிமைகள் தொடர்பான விவாதங்களில் முக்கிய திருப்பமாகக் கருதப்படுகிறது.