செங்கல்பட்டு நிலத்திற்கு பட்டா வழங்க வேண்டும் என்ற நீதிமன்ற உத்தரவு, உச்சநீதிமன்றம் வரை உறுதி செய்யப்பட்டிருந்தும் அது ஏன் அமல்படுத்தப்படவில்லை? அந்த உத்தரவுக்கு மாறாக நில நிர்வாக ஆணையர் பிறப்பித்த உத்தரவு எப்படி நீதிமன்ற அவமதிப்பு வழக்காக மாறியது? வாரண்ட் எச்சரிக்கைக்குப் பிறகு நீதிமன்றத்தில் நேரில் ஆஜராகி நிபந்தனையற்ற மன்னிப்பு கேட்ட கஜலட்சுமி விவகாரத்தின் முழு பின்னணியை அறியலாம்.
செங்கல்பட்டு மாவட்டம் திருப்போரூரில் உள்ள நிலத்திற்கு பட்டா வழங்குமாறு சென்னை உயர்நீதிமன்றம் பிறப்பித்த உத்தரவை அமல்படுத்தாத விவகாரத்தில், அப்போது தமிழ்நாடு நில நிர்வாக ஆணையராக இருந்த கஜலட்சுமி நேரில் ஆஜராகி நிபந்தனையற்ற மன்னிப்பு கோரியதைத் தொடர்ந்து, நீதிமன்றம் உத்தரவை நிறைவேற்ற ஒரு வார கால அவகாசம் வழங்கியுள்ளது.
2021-ஆம் ஆண்டு பிறப்பிக்கப்பட்ட உத்தரவு
சென்னை விருகம்பாக்கத்தைச் சேர்ந்த ஹேமா ஆனந்தனுக்கு சொந்தமான செங்கல்பட்டு மாவட்டம், திருப்போரூரில் உள்ள நிலத்திற்கு பட்டா வழங்க வேண்டும் என்று சென்னை உயர்நீதிமன்றம் 2021-ஆம் ஆண்டு உத்தரவிட்டிருந்தது. ஆனால், அந்த உத்தரவு நடைமுறைப்படுத்தப்படாததால், சம்பந்தப்பட்ட அதிகாரிகளுக்கு எதிராக ஹேமா ஆனந்தன் நீதிமன்ற அவமதிப்பு வழக்கு தொடர்ந்தார்.
நில நிர்வாக ஆணையரின் உத்தரவு சர்ச்சை
இந்த வழக்கு தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள்முருகன் அமர்வு முன்பு விசாரணைக்கு வந்தது. அப்போது, சம்பந்தப்பட்ட நிலம் கழுவேலி நில வகைப்பாட்டின் கீழ் வருவதால் பட்டா வழங்க முடியாது என நில நிர்வாக ஆணையர் உத்தரவிட்டிருந்தது நீதிமன்றத்தின் கவனத்திற்கு கொண்டு வரப்பட்டது.
நீதிபதிகள் எழுப்பிய கடும் கேள்விகள்
இதையடுத்து, ஏற்கனவே பட்டா வழங்குமாறு இரு நீதிபதிகள் அமர்வு பிறப்பித்த உத்தரவு உறுதி செய்யப்பட்டிருப்பதையும், அந்த உத்தரவை எதிர்த்து தமிழக அரசு தாக்கல் செய்த மேல்முறையீட்டு மனுவை உச்சநீதிமன்றமும் தள்ளுபடி செய்திருப்பதையும் நீதிபதிகள் சுட்டிக்காட்டினர். இந்நிலையில், நீதிமன்ற உத்தரவுகளை புறக்கணித்து, அதற்கு முரணான உத்தரவை நில நிர்வாக ஆணையர் எவ்வாறு பிறப்பிக்க முடியும் என்று நீதிபதிகள் கேள்வி எழுப்பினர்.
மேலும், சம்பந்தப்பட்ட அதிகாரி நேரில் ஆஜராகவில்லை என்றால் அவருக்கு எதிராக வாரண்ட் பிறப்பிக்க நேரிடும் என்று நீதிமன்றம் கடுமையாக எச்சரிக்கை விடுத்தது.
நேரில் ஆஜராகி மன்னிப்பு கோரிய அதிகாரி
இதனைத் தொடர்ந்து, பிற்பகல் நடைபெற்ற விசாரணையில் முன்னாள் நில நிர்வாக ஆணையர் கஜலட்சுமி தலைமை நீதிபதி அமர்வு முன்பு நேரில் ஆஜரானார். அப்போது, அந்த உத்தரவு தவறுதலாக பிறப்பிக்கப்பட்டதாக விளக்கமளித்த அவர், நீதிமன்றத்தில் நிபந்தனையற்ற மன்னிப்பு கோரினார்.
ஒரு வாரத்தில் உத்தரவை அமல்படுத்த நீதிமன்றம் உத்தரவு
கஜலட்சுமியின் மன்னிப்பை பதிவு செய்த நீதிபதிகள், நீதிமன்ற உத்தரவை முழுமையாக நிறைவேற்றுவதற்காக ஒரு வார கால அவகாசம் வழங்கினர். அதே நேரத்தில், நீதிமன்ற உத்தரவுகளை அரசு அதிகாரிகள் கட்டாயம் மதித்து செயல்பட வேண்டும் என்பதையும் இந்த வழக்கின் மூலம் உயர்நீதிமன்றம் மீண்டும் வலியுறுத்தியுள்ளது. இது, நீதிமன்ற உத்தரவுகளை அமல்படுத்துவதில் அதிகாரிகளின் பொறுப்பை நினைவூட்டும் முக்கிய வழக்காகவும் பார்க்கப்படுகிறது.
Source link