தமிழக சட்டமன்ற தேர்தல் 2026யொட்டி டாஸ்மாக் விற்பனை மற்றும் இருப்புக் குறித்த கடும் கட்டுப்பாடுகள் விதிக்கப்பட்டு உள்ளது.
மூன்று முக்கிய உத்தரவுகள்
இந்தக் கட்டுப்பாடுகளின்படி, டாஸ்மாக் நிர்வாகம் மூன்று முக்கிய உத்தரவுகளை அனைத்துக் கடைப் பணியாளர்களுக்கும் பிறப்பித்துள்ளது. முதலாவதாக, அரசியல் கட்சியினரோ அல்லது வேட்பாளர்களோ தங்களது ஆதரவாளர்களுக்கு வழங்கும் டோக்கன்கள் மற்றும் கூப்பன்களைக் காண்பிப்பவர்களுக்கு எக்காரணம் கொண்டும் மதுபானம் விற்பனை செய்யக்கூடாது. இரண்டாவதாக, கடந்த ஆண்டு இதே காலகட்டத்தில் ஒரு கடையில் இருந்த மதுபான இருப்பை விட 50 சதவீதத்திற்கு மேல் கூடுதலாக மதுவை இருப்பு வைக்கக் கூடாது. மூன்றாவதாக, நடப்பு மாதத்தின் மொத்த விற்பனை அளவு கடந்த ஆண்டு விற்பனையை விட 30 சதவீதத்திற்கு மேல் அதிகரிக்காமல் இருக்க வேண்டும். இந்த வரம்புகளை மீறி விற்பனை செய்வது கண்டறியப்பட்டால், அது தேர்தல் முறைகேடாகக் கருதப்பட்டு கடுமையான சட்ட நடவடிக்கை எடுக்கப்படும் என்று எச்சரிக்கப்பட்டுள்ளது.
4,800 டாஸ்மாக் கடைகள்
மாநிலத்தில் உள்ள சுமார் 4,800 டாஸ்மாக் கடைகளிலும் தினசரி விற்பனை மற்றும் இருப்பு விபரங்கள் தீவிரமாகச் சோதிக்கப்படுகின்றன. நிர்ணயிக்கப்பட்ட அளவை விட 50 சதவீதத்திற்கும் மேல் இருப்பு வைப்பது ‘பதுக்கல்’ நடவடிக்கையாகக் கருதப்படும். அதேபோல், மொத்தமாக ஒருவருக்கே அதிக எண்ணிக்கையிலான பாட்டில்களை விற்பனை செய்வதும் குற்றமாகக் கருதப்படும். தேர்தல் நேரத்தில் பணமோ அல்லது மதுபானமோ வழங்கி வாக்காளர்களைத் தூண்டுவது சட்டப்படி குற்றமாகும் என்பதால், மதுப்பிரியர்கள் மற்றும் அரசியல் கட்சியினரின் இத்தகைய முயற்சிகளுக்கு இந்த உத்தரவு ஒரு முற்றுப்புள்ளியாக அமைந்துள்ளது.
பார்களுக்கு கட்டுப்பாடுகள்
மேலும், டாஸ்மாக் பார்களுக்கு (Bars) விதிக்கப்பட்டுள்ள கட்டுப்பாடுகள் மிகக் கடுமையானவை. அனுமதிக்கப்பட்ட நேரத்திற்கு முன்னதாகவோ அல்லது இரவு 10 மணிக்கு மேலோ பார்கள் செயல்படக் கூடாது என்று உத்தரவிடப்பட்டுள்ளது. விதிகளை மீறும் பார்களின் உரிமம் உடனடியாக ரத்து செய்யப்படுவதுடன், அவர்கள் செலுத்தியுள்ள வைப்புத்தொகையும் (Deposit) பறிமுதல் செய்யப்படும். இது குறித்து மாவட்ட மேலாளர்கள் மற்றும் மேற்பார்வையாளர்களுடன் டாஸ்மாக் நிர்வாகம் அவ்வப்போது ஆய்வுக் கூட்டங்களை நடத்தி வருகிறது. விற்பனை வரம்பு மீறப்படும் பட்சத்தில் சம்பந்தப்பட்ட அதிகாரிகளிடம் விளக்கம் கேட்கப்பட்டு நடவடிக்கைகள் எடுக்கப்படுகின்றன.
அதிரடி கெடுபிடிகள்
தேர்தல் ஆணையத்தின் இந்த அதிரடி கெடுபிடிகளால், தேர்தல் களத்தில் மதுபானப் புழக்கத்தைக் கணிசமாகக் குறைக்க முடியும் என்று எதிர்பார்க்கப்படுகிறது. ஏற்கனவே 50,000 ரூபாய்க்கு மேல் உரிய ஆவணங்களின்றி பணம் அல்லது பரிசுப் பொருட்களைக் கொண்டு செல்லத் தடை விதிக்கப்பட்டுள்ள நிலையில், தற்போது டாஸ்மாக் விற்பனையிலும் இத்தகைய கட்டுப்பாடுகள் அமல்படுத்தப்பட்டுள்ளது தேர்தலின் நம்பகத்தன்மையை உறுதிப்படுத்தும் முயற்சியாகப் பார்க்கப்படுகிறது.