திருச்சியில் பழைய மதுரை சாலை கோரையாறு மேம்பாலம் மறுசீரமைப்பு: ஏப்ரல் 3 முதல் போக்குவரத்து மாற்றம்! – koraiar overpass renovation on old madurai road in tiruchirappalli begins on april 3

March 26, 2026 Samayam Tamil தலைப்பு 0

திருச்சியில் பழைய மதுரை சாலை கோரையாறு மேம்பாலம் மறுசீரமைக்கப்பட்டு வருகிறது. இதற்காக ஏப்ரல் 3 முதல் போக்குவரத்து மாற்றம் செய்யப்பட்டு உள்ளது.

sh panjappur koraiyar
திருச்சி மாநகரையும் பஞ்சப்பூர் ஒருங்கிணைந்த பேருந்து முனையத்தையும் (KKBT) இணைக்கும் பழைய மதுரை சாலையில் உள்ள குறுகிய கோரையாறு உயர்மட்டப் பாலத்தை இடித்துவிட்டு, புதிய பாலத்தைக்கட்ட மாநில நெடுஞ்சாலைத் துறைக்குக் கொள்கை ரீதியான ஒப்புதல் கிடைத்துள்ளது. ஈ.புதூர் மற்றும் பஞ்சப்பூர் பசுமைப் பூங்கா ஆகியவற்றிற்கு இடையே அமைந்துள்ள இந்தப் பாலத்தை இடிக்கும் பணிகள் வரும் ஏப்ரல் 3-ஆம் தேதி முதல் தொடங்கப்பட உள்ளன. சுமார் 23.5 கோடி ரூபாய் மதிப்பீட்டில் கட்டப்படவுள்ள இந்த புதிய நான்கு வழி மேம்பாலப் பணிகள், 2027-ஆம் ஆண்டு ஜனவரி மாதத்திற்குள் முழுமையாக நிறைவடையும் என்று எதிர்பார்க்கப்படுகிறது.

பைல் லோடு

புதிய பாலத்தின் பலத்தை உறுதி செய்வதற்காக மேற்கொள்ளப்பட்ட ‘பைல் லோடு’ (Pile load test) பரிசோதனைகள் சமீபத்தில் வெற்றிகரமாக முடிவடைந்தன. இதனைத் தொடர்ந்து, கோரையாற்றின் வடக்குப் பகுதியில் பாதுகாப்புச் சுவர் (Retaining wall) கட்டும் பணிகள் தற்போது விறுவிறுப்பாக நடைபெற்று வருகின்றன. பஞ்சப்பூர் சந்திப்பிலிருந்து திருச்சி சிறப்புப் போலீஸ் படை மைதானம் வரையிலான பழைய மதுரை சாலை (ஈ.புதூர் மெயின் ரோடு) ஏற்கனவே நான்கு வழிச் சாலையாக விரிவுபடுத்தப்பட்டுள்ள நிலையில், இந்தப் பழைய குறுகிய பாலம் மட்டும் ஒரு தடையாக இருந்து வந்தது. சென்னை மற்றும் மதுரையிலிருந்து திருச்சிக்குள் நுழையும் வாகனங்களுக்கு இந்தப் பாலம் பெரும் போக்குவரத்து நெரிசலை ஏற்படுத்தி வந்தது. இதைக் கருத்தில் கொண்டு, வருவாய்த் துறை மற்றும் மாநகரக் காவல்துறையுடன் இணைந்து நெடுஞ்சாலைத் துறை அதிகாரிகள் அண்மையில் ஆய்வுக்கூட்டம் நடத்தி, பாலத்தை மூடுவதற்கான திட்டத்தை இறுதி செய்தனர்.

நிலம் கையகப்படுத்தும் பணிகள்

இந்தப் புதிய பாலத்திற்கான நிலம் கையகப்படுத்தும் பணிகள் ஏற்கனவே முடிக்கப்பட்டுவிட்டன. பிரதமர் நரேந்திர மோடியின் சமீபத்திய பஞ்சப்பூர் வருகை மற்றும் மாணவர்களுக்கான பொதுத்தேர்வுகள் ஆகியவற்றின் காரணமாக இந்தப் பாலப் பணிகள் இரண்டு முறை தள்ளிப்போயின. தற்போது தேர்வுகள் முடிவடைந்த நிலையில், ஏப்ரல் 3 முதல் பழைய பாலத்தை இடிக்கும் பணி தொடங்குகிறது. இந்தப் பாலத்தை 2026 அக்டோபர் மாதத்திற்குள்ளேயே கட்டி முடிக்கத் திட்டமிடப்பட்டுள்ளது. இருப்பினும், எவ்விதத் தாமதமும் இன்றி 2027 ஜனவரிக்குள் மக்கள் பயன்பாட்டிற்குப் பாலம் கொண்டு வரப்படும் என்று அதிகாரிகள் தரப்பில் தெரிவிக்கப்பட்டுள்ளது.

மையத் தடுப்புகள்

புதிய மேம்பாலமானது மையத் தடுப்புகள் (Center Median) மற்றும் பாதசாரிகளுக்கான நடைபாதை வசதிகளுடன் நவீன முறையில் அமையவுள்ளது. மாநகராட்சி குடிநீர்க் குழாய்கள் ஏற்கனவே மாற்றுப் பாதையில் மாற்றியமைக்கப்பட்டுவிட்டன. மேலும், அடுத்த ஆறு மாதங்களுக்குக் கோரையாற்றில் நீர்வரத்து அதிகரிக்க வாய்ப்பில்லை என்பதால், இந்த ஆண்டின் இறுதிக்குள்ளேயே பாலப் பணிகளைப் பெரும் பகுதி முடித்துவிடலாம் என்று நெடுஞ்சாலைத் துறை நம்பிக்கையுடன் உள்ளது. கட்டுமானப் பணிகள் நடைபெறும் காலங்களில், வாகனங்கள் அனைத்தும் மன்னார்புரம் வழியாகத் திருப்பி விடப்படும் என்று போக்குவரத்துத் துறை அறிவித்துள்ளது.