சட்டமன்ற தேர்தல் 2026: அமமுக வேட்பாளர் பட்டியலை டிடிவி தினகரன் அறிவித்துள்ளார்.
முன்னாள் சட்டமன்ற உறுப்பினர்கள்
அமமுக வெளியிட்டுள்ள இந்தப் பட்டியலில் அனுபவம் வாய்ந்த முன்னாள் சட்டமன்ற உறுப்பினர்கள் மற்றும் கட்சியின் நம்பிக்கைக்குரிய முகங்களுக்கு முன்னுரிமை அளிக்கப்பட்டுள்ளது. குறிப்பாக, மடத்துக்குளம் தொகுதியில் சண்முகவேலுவும், சென்னை சைதாப்பேட்டை தொகுதியில் முன்னாள் அமைச்சர் செந்தமிழனும் களம் இறக்கப்பட்டுள்ளனர். வேலூர் மாவட்டத்தின் திருப்பத்தூர் தொகுதியில் ஞானசேகரன் போட்டியிடுகிறார். அதேபோல், சென்னைக்கு அருகிலுள்ள பூவிருந்தவல்லி தொகுதியில் ஏழுமலையும், நெல்லை மாவட்டத்தின் நாங்குநேரி தொகுதியில் இசக்கிமுத்துவும் வேட்பாளர்களாக அறிவிக்கப்பட்டுள்ளனர். ஒட்டப்பிடாரம் தொகுதியில் சுந்தரராஜனும், தேனி மாவட்டத்தின் முக்கியத் தொகுதியான பெரியகுளத்தில் கதிர்காமுவும் போட்டியிட உள்ளனர்.
வலுவான வேட்பாளர்
தஞ்சை மண்டலத்தில் தனது செல்வாக்கை நிலைநிறுத்த முனையும் அமமுக, திருவையாறு தொகுதியில் வேலு கார்த்திகேயனையும், டெல்டா பகுதியின் முக்கியத் தொகுதியான மன்னார்குடியில் காமராஜையும் வேட்பாளர்களாக நிறுத்தியுள்ளது. திருச்சியின் மையப்பகுதியான திருச்சி மேற்கு தொகுதியில் தொட்டியம் ராஜசேகரன் களம் காண்கிறார். இந்தத் தொகுதியில் கடந்த முறை தி.மு.க சார்பில் போட்டியிட்ட அமைச்சர் கே.என். நேரு வெற்றி பெற்றார் என்பது குறிப்பிடத்தக்கது. அத்தகைய பலமான கோட்டையில் அமமுக ஒரு வலுவான வேட்பாளரை நிறுத்தியிருப்பது மும்முனைப் போட்டிக்கு வழிவகுக்கும் என்று எதிர்பார்க்கப்படுகிறது.
காரைக்குடி
அமமுகவின் இந்தப் பட்டியலில் மிகவும் உற்று நோக்கப்பட்ட அறிவிப்பு காரைக்குடி தொகுதியாகும். காரைக்குடியில் தேர்போகி பாண்டி வேட்பாளராக அறிவிக்கப்பட்டுள்ளார். இந்தத் தொகுதியில் நாம் தமிழர் கட்சியின் ஒருங்கிணைப்பாளர் சீமான் போட்டியிடுவதால், காரைக்குடி இப்போது தமிழகத்தின் மிக முக்கிய ‘விஐபி’ தொகுதியாக மாறியுள்ளது. சீமானை எதிர்த்து களம் காணும் தேர்போகி பாண்டி, அந்தப் பகுதியில் தனக்குள்ள செல்வாக்கை நிரூபிக்க வேண்டிய கட்டாயத்தில் உள்ளார். இது ஒரு கடும் போட்டியை உருவாக்கும் என்பதில் சந்தேகமில்லை.
அமமுக
தேசிய ஜனநாயகக் கூட்டணியில் இடம்பெற்றுள்ள அமமுக, தனது பலத்தை நிரூபிக்கும் வகையில் இந்த வேட்பாளர்களைத் தேர்வு செய்துள்ளது. ஆளுங்கட்சியின் செல்வாக்குள்ள அமைச்சர்கள் மற்றும் மற்ற எதிர்க்கட்சித் தலைவர்களை எதிர்த்துப் போட்டியிடும் வகையில் வேட்பாளர்களை நிறுத்தியிருப்பது டி.டி.வி. தினகரனின் அதிரடி அரசியலைக் காட்டுகிறது. தேர்தல் பிரச்சாரங்கள் இன்னும் சில நாட்களில் வேகம் எடுக்கவுள்ள நிலையில், இந்த 11 வேட்பாளர்களின் அறிமுகம் அமமுக தொண்டர்களிடையே பெரும் உற்சாகத்தை ஏற்படுத்தியுள்ளது. தொகுதிப் பங்கீடுகள் மற்றும் அடுத்தகட்ட வேட்பாளர் பட்டியல்கள் குறித்த எதிர்பார்ப்பும் அரசியல் தளத்தில் அதிகரித்துள்ளது.
வேட்பாளர்கள் மற்றும் தொகுதிகள்:-
1) மடத்துக்குளம் சண்முகவேலு,
2) சைதாப்பேட்டை செந்தமிழன்,
3) திருப்பத்தூர்-ஞானசேகரன்,
4) பூவிருந்தவல்லி ஏழுமலை,
5)நாங்குநேரியில் இசக்கிமுத்து,
6) ஒட்டப்பிடாரம் சுந்தரராஜன்,
7)பெரியகுளத்தில் கதிர்காமு,
8) திருவையாறு-வேலு கார்த்திகேய்ன்,
9) திருச்சி மேற்கு தொட்டியம் ராஜசேகரன்,
10) மன்னார்குடி-காமராஜ்.
11) காரைக்குடி-தேர்போகி பாண்டி.