பரப்புரையை ரத்து செய்யும் விஜய்! வில்லிவாக்கம், தி.நகரை தொடர்ந்து சைதாப்பேட்டையிலும் மாற்றம்- பின்னணி என்ன? – vijay cancels campaign after villivakkam and t. nagar, change in saidapet too

விஜய்யின் சைதாப்பேட்டை பரப்புரை திடீரென ரத்து செய்யப்பட்டுள்ளதால் தவெக தொண்டர்கள் ஏமாற்றம் அடைந்து உள்ளனர்.

Thalapathy Vijay Saidapet Campaign Cancelled(புகைப்படங்கள்– Samayam Tamil)

சென்னை சைதாப்பேட்டை தொகுதியில் தவெக தலைவர் விஜய் நாளை (ஏப்ரல் 7) மேற்கொள்ளவிருந்த தேர்தல் பரப்புரை திடீரென ரத்து செய்யப்பட்டுள்ளது. ஏற்கனவே வில்லிவாக்கம் மற்றும் தி.நகர் பகுதிகளில் திட்டமிடப்பட்டிருந்த பரப்புரைகள் ரத்தான நிலையில், தற்போது சைதாப்பேட்டை நிகழ்வும் ரத்து செய்யப்பட்டுள்ளது தவெக தொண்டர்களிடையே ஏமாற்றத்தை ஏற்படுத்தியுள்ளது.

காவல் துறை அனுமதி இருந்தும் ரத்து

சைதாப்பேட்டையில் நாளை ஒரு மணி நேரம் மட்டும் பரப்புரை செய்யக் காவல் துறை அனுமதி வழங்கியிருந்தது. இருப்பினும், தவெக கட்சி நிர்வாகம் தரப்பிலேயே இந்த ரத்து முடிவு எடுக்கப்பட்டுள்ளதாகக் காவல் துறை தரப்பில் தெரிவிக்கப்பட்டுள்ளது.

ரத்து செய்யப்படுவதற்கான சாத்தியமான காரணங்கள்

நாளை (ஏப்ரல் 7) மாநிலம் முழுவதும் வேட்புமனுக்கள் மீதான பரிசீலனை நடைபெறுகிறது. விஜய்யின் பெரம்பூர் மற்றும் திருச்சி கிழக்கு வேட்புமனுக்களில் ஏற்கனவே சில முரண்பாடுகள் சரிசெய்யப்பட்டுள்ள நிலையில், அது குறித்த சட்ட ஆலோசனைகளில் அவர் ஈடுபடலாம் எனக் கருதப்படுகிறது. நகர்ப்புறப் பகுதிகளில் தனித்தனியாகப் பிரச்சாரம் செய்வதற்குப் பதிலாக, பெரிய அளவிலான பிரம்மாண்டப் பொதுக்கூட்டங்களை ஒருங்கிணைக்கத் தவெக தலைமை திட்டமிட்டு வருவதாகவும் செய்திகள் வெளியாகியுள்ளன.

பாதுகாப்பு மற்றும் நேரம்

ஒரு மணி நேர அனுமதி என்பது போதுமானதாக இருக்காது என்பதால், கூடுதல் நேரம் கேட்டுப் பிறகு பிரச்சாரத்தை மேற்கொள்ளத் திட்டமிட்டுள்ளதாகவும் கூறப்படுகிறது.

தவெக தொண்டர்கள் குழப்பம்

தொடர்ச்சியாகப் பிரச்சாரங்கள் ரத்து செய்யப்படுவது, ஆளுங்கட்சி அல்லது காவல் துறையின் அழுத்தமா? அல்லது உட்கட்சி முடிவா? என்ற கேள்விகள் சமூக வலைதளங்களில் தவெக ரசிகர்களிடையே எழுந்துள்ளது. இருப்பினும், மற்ற மாவட்டங்களில் விஜய்யின் பரப்புரைத் திட்டங்கள் மாற்றமின்றி உள்ளதாகத் தெரிகிறது.