எடப்பாடி தொகுதியில் தவெக சார்பில் போட்டியிடும் அருண்குமாரை காணவில்லை எனக்கூறி அவரது ஆதரவாளர்கள் போலீசாருடன் வாக்குவாதத்தில் ஈடுபட்டு உள்ளனர்.
திடீர் மறைவும் ஆதரவாளர்களின் கொந்தளிப்பும்
அதிமுக பொதுச்செயலாளர் எடப்பாடி கே. பழனிசாமியின் சொந்தத் தொகுதியான எடப்பாடியில், அவரை எதிர்த்து தவெக தலைவர் விஜய் தனது கட்சியின் வேட்பாளராக அருண்குமாரை நிறுத்தியுள்ளார். இன்று காலை வேட்புமனு பரிசீலனைக்காக அருண்குமார் தேர்தல் அதிகாரி அலுவலகத்திற்கு வருவார் என எதிர்பார்க்கப்பட்ட நிலையில், அவர் வராதது தொண்டர்களிடையே குழப்பத்தை ஏற்படுத்தியது. அவரது செல்போன் சுவிட்ச் ஆஃப் செய்யப்பட்டிருந்ததால், அவர் கடத்தப்பட்டிருக்கலாம் அல்லது மிரட்டப்பட்டிருக்கலாம் என தவெக தொண்டர்கள் குற்றம் சாட்டியுள்ளனர்.
காவல்துறையினருடன் கடும் வாக்குவாதம்
இந்தத் தகவலையடுத்து, எடப்பாடி தேர்தல் நடத்தும் அலுவலர் அலுவலகத்தின் முன்பு திரண்ட தவெக தொண்டர்கள் மற்றும் அருண்குமாரின் ஆதரவாளர்கள், காவல்துறையினருடன் கடும் வாக்குவாதத்தில் ஈடுபட்டனர். எங்கள் வேட்பாளர் எங்கே? அவருக்குப் பாதுகாப்பு வழங்க வேண்டியது காவல்துறையின் கடமை என்று முழக்கமிட்டனர். இந்த மோதல் காரணமாக அந்தப் பகுதியில் கூடுதல் போலீசார் குவிக்கப்பட்டு, பரபரப்பான சூழல் நிலவி வருகிறது.
பின்னணியில் அரசியல் அழுத்தமா?
எடப்பாடி பழனிசாமி தனது எட்டாவது தேர்தலை இந்தத் தொகுதியில் சந்திக்கிறார். அவருக்குப் பலமான போட்டியாக தவெக வேட்பாளர் பார்க்கப்பட்ட நிலையில், அருண்குமாரின் இந்தத் திடீர் மறைவு பல்வேறு அரசியல் யூகங்களுக்கு வழிவகுத்துள்ளது. தவெக தலைமை இது குறித்துத் தேர்தல் ஆணையத்திடம் புகார் அளிக்கத் திட்டமிட்டுள்ளதாகத் தெரிகிறது.