ஆடுதுறை – சுந்தரப்பெருமாள் கோவில் இரட்டை வழிப்பாதைத் திட்டம்: ரயில் நிலையங்களின் நவீனமயமாக்கல் மற்றும் டெண்டர் திட்டமிடல் தொடர்பாக இந்த செய்தி தொகுப்பில் காணலாம்.
தஞ்சாவூர் – மயிலாடுதுறை இடையிலான ரயில் பாதையில் அதிகரிக்கும் ரயில் போக்குவரத்து நெரிசலைக் குறைக்கவும், பயணிகள் ரயில்களின் வேகத்தை அதிகரிக்கவும் தெற்கு ரயில்வே சார்பில் பல்வேறு உள்கட்டமைப்பு மேம்பாட்டுப் பணிகள் திட்டமிடப்பட்டு வருகின்றன. இதன் ஒரு பகுதியாக, ஆடுதுறை முதல் சுந்தரப்பெருமாள் கோவில் வரையிலான வழித்தடத்தில் இரட்டை வழிப்பாதை (Doubling Project) அமைப்பதற்கான டெண்டர் திட்டமிடல் பணிகள் தீவிரமடைந்துள்ளன. இத்திட்டத்தின் கீழ் கிராசிங் நிலையங்களாக மாறும் ரயில் நிலையங்கள், ஹால்ட் நிலையங்களில் மேற்கொள்ளப்படவுள்ள மாற்றங்கள் மற்றும் நடைமேடை விரிவாக்கப் பணிகள் குறித்து விரிவாகக் காண்போம்.
கிராசிங் ரயில் நிலையங்களின் நவீனமயமாக்கல்
இப்பகுதியில் உள்ள முக்கிய மூன்று ரயில் நிலையங்கள் இனி ரயில்கள் ஒன்றுக்கொன்று வழிவிட்டுச் செல்லும் கிராசிங் நிலையங்களாகச் (Crossing Stations) செயல்பட உள்ளன.
அ) ஆடுதுறை ரயில் நிலையம்:
தற்போதைய நிலை: தற்போது 2 நடைமேடைகளும் (540 மீ மற்றும் 570 மீ நீளம்), 3 ரயில் பாதைகளும் பயன்பாட்டில் உள்ளன. எதிர்கால மாற்றங்கள்: இத் திட்டத்தின் மூலம் 3 நடைமேடைகள் மற்றும் 4 ரயில் பாதைகளாக அதிகரிக்கப்படும். தீவு நடைமேடை (Island Platform): தற்போதுள்ள 2 மற்றும் 3-வது பாதைகள் பிரதான இரட்டைப் பாதையாக மாறும். 5.50 மீட்டர் அகலம் கொண்ட 2-வது நடைமேடை, 11 மீட்டர் அகலத்திற்கு விரிவாக்கப்பட்டு 2 மற்றும் 3-வது நடைமேடைகளைக் கொண்ட பிரம்மாண்ட தீவு நடைமேடையாக (Island Platform) மாற்றப்படும். தெற்குப் பகுதியில் 4-வது புதிய பாதை அமைக்கப்படும்.
ஆ) திருநாகேஸ்வரம் ரயில் நிலையம் :
தற்போதைய நிலை: ஒரே ஒரு நடைமேடை மற்றும் ஒரு ரயில் பாதை மட்டுமே உள்ளது. எதிர்கால மாற்றங்கள்: இனி 2 பயணிகள் நடைமேடைகள், 1 புதிய சரக்கு நடைமேடை மற்றும் 3 ரயில் பாதைகளுடன் இநிலையம் புதுப்பொலிவு பெறும். கட்டமைப்பு மாற்றங்கள்: தற்போதுள்ள 429 மீட்டர் நீள நடைமேடையில் 100 மீட்டரைத் தவிர எஞ்சிய பகுதி இடிக்கப்பட்டு, கிழக்குப் பகுதியில் 440 மீட்டர் நீளமும் 10.30 மீட்டர் அகலமும் கொண்ட புதிய தீவு நடைமேடை அமைக்கப்படும். தெற்கே புதிய பாதை அமைக்கப்பட்டு, பழைய பாதை UP லைனாகச் செயல்படும். மேலும், கிழக்கே 640 மீட்டர் நீளத்தில் பிரத்யேகச் சரக்கு நடைமேடையும் அமைக்கப்படவுள்ளது.
இ) சுந்தரப்பெருமாள் கோவில் ரயில் நிலையம்:
தற்போதைய நிலை: 2 நடைமேடைகளும் 2 ரயில் பாதைகளும் உள்ளன. எதிர்கால மாற்றங்கள்: விரிவாக்கத்திற்குப் பின் 3 நடைமேடைகள் மற்றும் 4 ரயில் பாதைகள் பயன்பாட்டிற்கு வரும். புதிய லூப் லைன்கள்: தற்போதுள்ள 1-வது நடைமேடை முழுமையாக இடிக்கப்பட்டுப் புதிய லூப் லைன் அமைக்கப்படும். அதன்பின் 405 மீட்டர் நீளத்தில் புதிய 1-வது நடைமேடை கட்டப்படும். 2-வது நடைமேடை 11 மீட்டர் அகலத்திற்கு விரிவாக்கப்பட்டு தீவு நடைமேடையாக மாறும். நிலையத்தின் தெற்குப் பகுதியிலும் மற்றொரு புதிய லூப் லைன் அமைக்கப்படும்.
ஹால்ட் ரயில் நிலையங்களில் மேற்கொள்ளப்படும் மாற்றங்கள்
பயணிகள் ரயில்கள் மட்டுமே நின்று செல்லக்கூடிய ஹால்ட் நிலையங்களிலும் இரட்டைப் பாதைக்கு ஏற்பக் உள்கட்டமைப்புகள் தரம் உயர்த்தப்படுகின்றன.
திருவிடைமருதூர் ரயில் நிலையம்:
தற்போதைய 400 மீட்டர் நீளமுள்ள 1-வது நடைமேடை 20 மீட்டர் நீட்டிக்கப்பட்டு 420 மீட்டராக மாற்றப்படும். நிலையத்தின் தெற்குப் பகுதியில் இரட்டை வழிப்பாதையின் DOWN லைன் மற்றும் 420 மீட்டர் நீளத்தில் புதிய 2-வது நடைமேடை அமைக்கப்படவுள்ளது. தாராசுரம் ரயில் நிலையம்:
தெற்குப் பகுதியில் புதிய ரயில் பாதையும், பயணிகளின் வசதிக்காக 420 மீட்டர் நீளத்தில் புதிய 2-வது நடைமேடையும் கட்டப்படும். சுவாமிமலை ரயில் நிலையம்:
தற்போது 280 மீட்டராக உள்ள 1-வது நடைமேடை 420 மீட்டராக விரிவாக்கப்படும். தெற்குப் பகுதியில் 2-வது புதிய ரயில் பாதையும், 420 மீட்டர் நீளத்தில் 2-வது நடைமேடையும் அமைக்கப்படும்.
நடைமேம்பாலங்கள் மற்றும் பயணிகள் வசதிகள்
புதிய நடைமேம்பாலங்கள் (FOB): பயணிகள் தண்டவாளங்களைக் கடக்காமல் பாதுகாப்பாக நடைமேடைகளுக்குச் சென்று வரத் திருநாகேஸ்வரம் உள்ளிட்ட முக்கிய ரயில் நிலையங்களில் புதிய நடைமேம்பாலங்கள் அமைப்பதற்குத் திட்டமிடப்பட்டுள்ளது. விரைவான ரயில் போக்குவரத்து: இத் திட்டம் நிறைவடையும் போது கும்பகோணம் மற்றும் தஞ்சாவூர் மார்க்கத்தில் செல்லும் ரயில்கள் கிராசிங்கிற்காகக் காத்திருக்கும் நேரம் பெருமளவில் குறையும்.ஆடுதுறை – சுந்தரப்பெருமாள் கோவில் இடையிலான இரட்டை வழிப்பாதை மற்றும் நிலையங்களின் உள்கட்டமைப்பு மேம்பாட்டுத் திட்டம், டெண்டர் நிலையை எட்டியிருப்பது ஒருங்கிணைந்த தஞ்சை மற்றும் டெல்டா பகுதி ரயில் பயணிகளிடையே பெரும் மகிழ்ச்சியை ஏற்படுத்தியுள்ளது. இப் பணிகள் விரைந்து முடிவடையும் போது ஆன்மீகச் சுற்றுலாத் தலங்களான திருநாகேஸ்வரம், திருவிடைமருதூர் மற்றும் சுவாமிமலை செல்லும் பக்தர்களுக்கும் தினசரிப் பயணிகளுக்கும் போக்குவரத்துச் சேவை மேலும் தடையின்றி விரைவாகக் கிடைக்கும்.
Source link