உங்களுடைய ரயில் டிக்கெட் திடீரென்று தொலைந்துவிட்டாலோ அல்லது கிழிந்துபோனாலோ நீங்கள் என்ன செய்ய வேண்டும் தெரியுமா? அதற்கு எவ்வளவு செலவாகும்?
ரயில்களில் பயணம் செய்வதற்கு டிக்கெட் எடுப்பது மிகவும் அவசியம். சில நேரங்களில் அவசரம் அல்லது கூட்ட நெரிசல் காரணமாக, ரயில் நிலையத்தில் டிக்கெட் தொலைந்து போக வாய்ப்பு உள்ளது. அப்படி நடந்தால் எப்படிப் பயணம் செய்வது அல்லது மீண்டும் புதிய டிக்கெட் வாங்க வேண்டுமா என்பது குறித்து பயணிகள் கவலைப்படுவதுண்டு. ரயில் நிலைய முன்பதிவு கவுண்டரில் வாங்கப்பட்ட உறுதி செய்யப்பட்ட டிக்கெட் தொலைந்துவிட்டால் இந்திய ரயில்வே விதிகளின்படி, சில நிபந்தனைகளுக்கு உட்பட்டு அதற்குப் பதிலாக மற்றொரு டிக்கெட் வாங்கிக் கொள்ளலாம். ஆனால் அதற்கு நீங்கள் கட்டணம் செலுத்த வேண்டியிருக்கும்.
ரயில்வே விதிகளின்படி, தொலைந்து போன டிக்கெட்டுகளுக்கும், கிழிந்த அல்லது சேதமடைந்த டிக்கெட்டுகளுக்கும் வெவ்வேறு நடைமுறைகள் உள்ளன. மற்றொரு டிக்கெட்டைப் பெறுவதற்கான கட்டணம் என்பது அந்த டிக்கெட்டின் முன்பதிவு நிலை மற்றும் ரயிலுக்கான சார்ட் தயாரிக்கப்பட்டுவிட்டதா என்பதைப் பொறுத்து அமையும்.
உறுதி செய்யப்பட்ட டிக்கெட் தொலைந்துவிட்டால் என்ன செய்வது?
நீங்கள் ரயில் நிலைய முன்பதிவு கவுண்டரில் டிக்கெட் வாங்கி அது தொலைந்து போயிருந்தால், முதலில் அந்த ரயில் நிலையத்திலுள்ள முன்பதிவு அலுவலகத்தையோ அல்லது ரயில் நிலைய மேலாளரையோ அணுக வேண்டும். டிக்கெட் தொலைந்து போன விவரத்தைத் தெரிவித்து, அதற்குப் பதிலாக மற்றொரு டிக்கெட்டை வழங்குமாறு கேட்க வேண்டும். ரயில்வே விதிகளின்படி, உறுதி செய்யப்பட்ட டிக்கெட்டுகளுக்கு மற்றொரு டிக்கெட் பெற வாய்ப்பு உள்ளது. RAC டிக்கெட்டுகளைப் பொறுத்தவரையில், சார்ட் தயாரிக்கப்படுவதற்கு முன்பு மற்றொரு டிக்கெட்டைப் பெறலாம். ஆனால், சார்ட் தயாரிக்கப்பட்ட பிறகு தொலைந்து போன RAC டிக்கெட்டுகளுக்கு மற்றொரு டிக்கெட் வழங்கப்படாது.
நகல் டிக்கெட் பெறுவதற்கான கட்டணம்!
உங்கள் டிக்கெட் தொலைந்து போனாலோ, தவறான இடத்தில் வைக்கப்பட்டாலோ, கிழிந்து போனாலோ அல்லது சேதமடைந்தாலோ, அது உறுதிப்படுத்தப்பட்ட டிக்கெட்டாகவோ அல்லது RAC டிக்கெட்டாகவோ இருந்தால் சார்ட் தயாரிக்கப்படுவதற்கு முன்பு நகல் டிக்கெட்டைப் பெறலாம். இதற்காகப் பயணிகள் குறிப்பிட்ட கட்டணத்தைச் செலுத்த வேண்டியிருக்கும். அத்தகைய சூழலில், ரயில் நிலைய மேலாளர் அசல் டிக்கெட்டிற்குப் பதிலாக நகல் டிக்கெட்டை வழங்குவார்.
சார்ட் தயாரிக்கப்பட்ட பிறகு கட்டணம்!
ரயில்வே விதிகளின்படி, உங்கள் உறுதிப்படுத்தப்பட்ட டிக்கெட் தொலைந்து போனாலோ அல்லது தவறான இடத்தில் வைக்கப்பட்டாலோ சார்ட் தயாரிக்கப்பட்ட பிறகு நகல் டிக்கெட் பெறும்போது, மொத்த கட்டணத்தில் 50 சதவீதம் வசூலிக்கப்படும். இருப்பினும், சார்ட் தயாரிக்கப்பட்ட பிறகு தொலைந்து போன RAC டிக்கெட்டுகளுக்கு நகல் டிக்கெட்டுகள் வழங்கப்படாது. உங்கள் உறுதிப்படுத்தப்பட்ட டிக்கெட் அல்லது RAC டிக்கெட் தொலைந்து போகாமல், கிழிந்து போயிருந்தாலோ அல்லது சேதமடைந்திருந்தாலோ, முன்பதிவுப் பட்டியல் தயாரிக்கப்பட்ட பிறகு நகல் டிக்கெட் பெற, மொத்த கட்டணத்தில் 25 சதவீதம் கட்டணமாகச் செலுத்த வேண்டியிருக்கும்.
உதாரணமாக, உங்களுடைய உறுதிப்படுத்தப்பட்ட டிக்கெட்டின் கட்டணம் 500 ஆக இருந்தால், அது தொலைந்து போன பட்சத்தில் சார்ட் தயாரிக்கப்பட்ட பிறகு நகல் டிக்கெட் பெற 250 ரூபாய் கட்டணமாக வசூலிக்கப்படும். ஒருவேளை டிக்கெட் கிழிந்து போயிருந்தாலோ அல்லது சேதமடைந்திருந்தாலோ, இந்தக் கட்டணம் 125 ரூபாயாக இருக்கும்.
டிக்கெட் தொலைந்து போனால் என்ன செய்வது?
உங்களுடைய ரயில் டிக்கெட் தொலைந்தவுடன் ரயில்வே முன்பதிவு அலுவலகத்தைத் தொடர்புகொள்ள வேண்டும். உறுதிப்படுத்தப்பட்ட டிக்கெட் மற்றும் RAC டிக்கெட்டுகளுக்கான விதிகளுக்கு இடையிலான வித்தியாசத்தைப் புரிந்துகொள்ள வேண்டும். சார்ட் தயாரிக்கப்படுவதற்கு முன்பே நகல் டிக்கெட்டிற்கு விண்ணப்பிப்பது நல்லது. நகல் டிக்கெட் பெறுவதற்கான கட்டணம் பயண வகுப்பு மற்றும் டிக்கெட்டின் நிலையைப் பொறுத்து மாறுபடும்.
Source link