காங்கிரஸ் – தவெக கூட்டணி
இதனிடையில் விஜய்யின் அரசியல் வருகையை தமிழக காங்கிரஸை சார்ந்த சிலர் வரவேற்றனர். அதோடு இந்த தேர்தலில் தவெகவுடன் கூட்டணி அமைக்க வேண்டும் எனவும் விரும்பினார்கள். இதுக்குறித்து காங்கிரஸ் கட்சியை சார்ந்த சிலர் வெளிப்படையாகவே கருத்து தெரிவித்தனர். அதோடு தமிழக வெற்றிக் கழகமும், காங்கிரஸுடன் கூட்டணி அமைப்பதற்கு பெரிதும் ஆர்வம் காட்டினார்கள். ஆனால் திடீர் ட்விஸ்ட்டாக திமுக, காங்கிரஸ் கூட்டணி உறுதியானது.
எம்பி ஜோதிமணி
இதன் பின்னரும் காங்கிரஸை சார்ந்தவர்கள் பெரியளவில் விஜய்யை விமர்சிக்காமல் இருந்தனர். குறிப்பாக காங்கிரஸ் கட்சி எம்பி ஜோதிமணி, விஜய் குறித்து சில பாசிட்டிவான கருத்துக்களை பேசி வந்தார். இது திமுக தொண்டர்கள் இடையில் அதிருப்தியை ஏற்படுத்தியது. அதோடு தவெகவினரும் உண்மையான காங்கிரஸ் கட்சியை சார்ந்தவர்கள் நம்முடன் கூட்டணி அமைகாமல் போனதால் வருத்தத்தில் இருப்பதாக பேசினார்கள்.
திமுக கூட்டணியை பாதிக்காது
இந்நிலையில் காங்கிரஸ் எம்பி ஜோதிமணி, தவெக தலைவர் விஜய்யை விமர்சித்துள்ளது அரசியல் களத்தில் கவனம் ஈர்த்து வருகிறது. சமீபத்தில் உண்மையான காங்கிரஸ் நம்ம பக்கம் தான் உள்ளது என பேசியதற்கு, அவருடைய பேச்சு முதிர்ச்சியற்றது என விமர்சித்துள்ளார் ஜோதிமணி. எடுத்தேன் கவிழ்த்தேன் என்று காங்கிரஸ் குறித்து அவர் பேசுவது சரியில்லை என கூறியுள்ளார். அதோடு திமுக கூட்டணியை விஜய்யின் ஓட்டு வங்கி பாதிக்காது. அவருக்கு நடிகர் என்பதால் கூட்டம் கூடுகிறது. திரையுலக நட்சத்திர அந்தஸ்து அவருக்கு வாக்காக மாறுமா என்பது தேர்தல் முடிவுகள் தான் தீர்மானிக்கும் என தெரிவித்துள்ளார் ஜோதிமணி.
தவெக தலைவர் விஜய் பேச்சு
முன்னதாக கடந்த நெல்லை பரப்புரை கூட்டத்தில் தவெக தலைவர் விஜய் பேசும்போது, பணம் வாங்கி கொண்டு திமுக கூட்டணியில் காங்கிரஸ் இணைந்துள்ளது. ஆனால் உண்மையான காங்கிரஸ் என்பது தமிழக வெற்றிக் கழகம் பக்கம் தான் இருக்கிறது என்றார். அவருடைய இந்த பேச்சுக்கு கடுமையான எதிர்ப்புகள் எழுந்தது. கல்லாப்பெட்டி கூட்டணி என்று விமர்சித்து விட்டு, அவர்கள் நம்ம பக்கம்தான் இருக்கிறார்கள் என்பது முரண் என அரசியல் விமர்சகர்கள் பலரும் கருத்து தெரிவித்தனர்.
காங்கிரஸ் தலைவர் தொடர் விமர்சனம்
இதனிடையில் தமிழக காங்கிரஸ் விஜய்யின் பேச்சுக்கு கடுமையான எதிர்ப்புகள் தெரிவித்து அறிக்கை ஒன்றை வெளியிட்டது. அதனை தொடர்ந்து மாநில தலைவர் செல்வப்பெருந்தகையும் விஜய்யின் பேச்சுக்கு கடுமையான கண்டனம் தெரிவித்தார். அதோடு அவரை விடவும் ரஜினி, அஜித் இருவரும் பெரிய நடிகர்கள். அவர்கள் தெருவில் இறங்கி நடந்தால் யோசிக்க முடியாத அளவுக்கு கூட்டம் வரும் எனவும் விமர்சனம் செய்தார்.
தொடர்ந்து கர்நாடக துணை முதலமைச்சர் டி.கே. சிவக்குமார், விஜய்க்கு அரசியல் முதிர்ச்சி இல்லை என விமர்சித்தார். அதே போல் நேற்றைய தினம் முன்னாள் ஒன்றிய நிதியமைச்சர் ப. சிதம்பரம் தவெக தலைவரை விமர்சனம் செய்தார். இப்படியாக உண்மையான காங்கிரஸ் நம்ம பக்கம் தான் உள்ளது என விஜய் பேசியதை தொடர்ந்து, அவர் மீதான விமர்சனங்களை காங்கிரஸ் கட்சியை சார்ந்தவர்கள் அதிகப்படுத்தியுள்ளது குறிப்பிடத்தக்கது.