மதுரை மேலூர் அருகே காணாமல் போன 7 வயது சிறுவன் சடலமாக மீட்கப்பட்ட சம்பவம் தமிழகத்தில் பெரும் அதிர்வலைகளை ஏற்படுத்தியுள்ளது. இச்சம்பவத்தைக் குறிப்பிட்டு, மாநிலத்தில் சட்டம் ஒழுங்கு சீர்குலைந்துள்ளதாக ஆளும் தமிழக வெற்றிக் கழக (TVK) அரசை திமுக நாடாளுமன்ற உறுப்பினரும், அக்கட்சியின் துணைப் பொதுச்செயலாளருமான கனிமொழி கருணாநிதி கடுமையாக விமர்சித்துள்ளார்.
இது தொடர்பாக அவர் தனது அதிகாரப்பூர்வ சமூக வலைத்தளப் பக்கத்தில் வெளியிட்டுள்ள அறிக்கையில், தற்போதைய தவெக ஆட்சியில் ஒட்டுமொத்த தமிழகமும் அச்சத்தில் உறைந்து போயிருப்பதாகக் குற்றம் சாட்டியுள்ளார்.
“விஜய் மாமா” என நம்பிய குழந்தைகளுக்குக்கூட பாதுகாப்பில்லை
தேர்தல் பிரச்சாரக் காலங்களைச் சுட்டிக்காட்டி முதலமைச்சர் விஜயை நேரடியாக விமர்சித்துள்ள கனிமொழி எம்பி, “தேர்தலின் போது உங்களை ‘விஜய் மாமா’ என்று அன்போடு அழைத்து, உங்களுக்காக ஓட்டுக் கேட்ட மழலைச் செல்வங்களுக்குக் கூட இந்த ஆட்சியில் பாதுகாப்பு வழங்க முடியவில்லை” என்று வேதனை தெரிவித்துள்ளார்.
முதலமைச்சர் வசம் உள்ள காவல்துறை மீது கேள்வி
தொடர்ந்து சட்டம் ஒழுங்கு நிலவரம் குறித்து கேள்வி எழுப்பியுள்ள அவர், “மாநிலத்தின் முதலமைச்சராக இருப்பவர் காவல்துறையைத் தன் வசம் வைத்திருந்தும் என்ன பயன்? பிஞ்சுக் குழந்தைகளின் பாதுகாப்பைக்கூட உறுதி செய்ய முடியாத பட்சத்தில், இந்தத் துறை எதற்கு?” என்று கேள்வி எழுப்பியுள்ளார்.
மேலும், சட்டம் ஒழுங்கையும் காவல்துறையையும் திறம்படக் கவனிக்க இயலவில்லை என்றால், மழலைகளின் உயிரோடு விளையாடாமல் அந்தத் துறையைத் தகுதியான வேறு ஒருவரிடம் முதலமைச்சர் ஒப்படைக்க வேண்டும் என்றும் தனது பதிவில் கனிமொழி எம்பி வலியுறுத்தியுள்ளார்.
வரலாறு படைத்த சி.எம் விஜய்…இனிமே திமுக சீன்ல இருக்காது
கனிமொழி பதிவு
விவரம் பின்வருமாறு,
மதுரை, மேலூர் அருகே நேற்றைய தினம் காணாமல் போன 7 வயது சிறுவன் இன்று சடலமாக மீட்கப்பட்ட செய்தி மிகுந்த வேதனையளிக்கிறது. தமிழ்நாட்டில் யாருக்குமே பாதுகாப்பில்லை; தவெக ஆட்சியில் தமிழ்நாடே அச்சத்தில் உறைந்து போயிருக்கிறது.
“விஜய் மாமா” என்று அழைத்து உங்களுக்கு ஓட்டுக் கேட்ட குழந்தைகளுக்குக் கூட பாதுகாப்பு வழங்க முடியவில்லை என்றால், முதலமைச்சர் காவல்துறையைக் கையில் வைத்திருந்து என்ன பயன்? உங்களால் கவனிக்க முடியவில்லை என்றால் அந்தத் துறையை வேறு யாரிடமாவது கொடுத்துவிடுங்கள்; மழலைகளின் உயிரைப் பணயம் வைக்க வேண்டாம் என பதிவு.
மதுரை சிறுவனின் மரணம் தொடர்பாக உரிய விசாரணை நடத்தி குற்றவாளிகள் மீது கடுமையான நடவடிக்கை எடுக்க வேண்டும் என்ற கோரிக்கையும் வலுத்து வரும் நிலையில், கனிமொழியின் இந்த விமர்சனம் தமிழக அரசியல் களத்தில் தற்பொழுது பெரும் பரபரப்பை ஏற்படுத்தியுள்ளது.