முன்னாள் பள்ளிக்கல்வித்துறை அமைச்சரும், திமுகவின் முக்கிய நிர்வாகியுமான அன்பில் மகேஸ் பொய்யாமொழி கைது செய்யப்பட்டுள்ள சம்பவம் தமிழக அரசியல் களத்தில் பெரும் பரபரப்பை ஏற்படுத்தியுள்ளது. இக்கைது நடவடிக்கைக்கு திமுக தலைவர் மு.க.ஸ்டாலின் தனது அதிகாரப்பூர்வ சமூக வலைத்தளப் பக்கத்தில் கடும் கண்டனத்தைப் பதிவு செய்துள்ளார்.
தமிழகத்தில் தற்பொழுது முதலமைச்சர் விஜய் தலைமையிலான தமிழக வெற்றிக் கழகத்தின் (TVK) ஆட்சி நடைபெற்று வரும் சூழலில், திமுகவின் முக்கியப் புள்ளிகள் மீது எடுக்கப்பட்டு வரும் இந்நடவடிக்கை இரு கட்சிகளுக்கும் இடையேயான மோதலை உச்சக்கட்டத்திற்குக் கொண்டு சென்றுள்ளது.
அரசியல் காழ்ப்புணர்ச்சி நடவடிக்கை
முன்னாள் அமைச்சர் அன்பில் மகேஸ் பொய்யாமொழி கைது செய்யப்பட்டது முழுக்க முழுக்க அரசியல் காழ்ப்புணர்ச்சியால் எடுக்கப்பட்ட ஒரு நடவடிக்கை என்று மு.க.ஸ்டாலின் குற்றம் சாட்டியுள்ளார்.
இது தொடர்பாக அவர் வெளியிட்டுள்ள எக்ஸ் பதிவில், “தன் மீதான குற்றச்சாட்டுகள் குறித்த விசாரணைக்கு முழு ஒத்துழைப்பு வழங்கி வந்த திரு. அன்பில் மகேஸ் அவர்களைக் கைது செய்திருப்பதன் மூலம், சந்தி சிரிக்கும் சட்டம் ஒழுங்கின் அவலட்சணத்தையும், அழுகிக் கொண்டிருக்கும் நிர்வாகச் சீர்கேட்டையும் மறைக்க ஆளும் தவெக அரசு முயல்கிறது” என்று கடுமையாகச் சாடியுள்ளார்.
மக்களின் கவனத்தைத் திசைதிருப்பும் முயற்சி?
மாநிலத்தில் நிலவி வரும் சட்டம் ஒழுங்குப் பிரச்சினைகள் மற்றும் நிர்வாகத் தோல்விகளிலிருந்து மக்களின் கவனத்தை திசை திருப்புவதற்காகவே இத்தகைய அதிரடி கைது நாடகங்களை ஆளும் தவெக அரசு அரங்கேற்றி வருவதாக ஸ்டாலின் தனது பதிவில் குறிப்பிட்டுள்ளார். சில நாட்களுக்கு மக்களின் கவனத்தை மாற்றிவிடலாம் என்று அரசு நினைப்பது ஏமாற்றமே மிஞ்சும் என்றும் அவர் கூறியுள்ளார்.
சட்டப்படி எதிர்கொள்வோம்!
கைது நடவடிக்கை குறித்து மேலும் பேசிய அவர், “அன்பில் மகேஸ் அவர்கள் தன் மீதான குற்றச்சாட்டுகளைச் சட்டப்படி தைரியமாக எதிர்கொள்வார். அதேசமயம், இதுபோன்ற கைது நடவடிக்கைகளால் மக்களின் கோபத்தைத் திசைதிருப்பித் தப்பித்துக்கொள்ளலாம் என்று நினைக்கும் த.வெ.க. அரசின் எண்ணம் நிச்சயம் ஈடேறாது!” என்று ஆளும் அரசுக்குத் தனது எச்சரிக்கையை விடுத்துள்ளார்.
மு.க.ஸ்டாலின் பதிவு
விவரம் பின்வருமாறு,
அரசியல் காழ்ப்புணர்வோடு முன்னாள் அமைச்சர் திரு. அன்பில் மகேஸ் பொய்யாமொழி அவர்களைக் கைது செய்துள்ள த.வெ.க. அரசுக்குக் கடும் கண்டனம்!
தன் மீதான குற்றச்சாட்டுகள் குறித்த விசாரணைக்கு முழு ஒத்துழைப்பு வழங்கி வந்த திரு. அன்பில் மகேஸ் அவர்களைக் கைது செய்திருப்பதன் மூலம், சந்தி சிரிக்கும் சட்டம் ஒழுங்கின் அவலட்சணத்தையும், அழுகிக் கொண்டிருக்கும் நிர்வாகச் சீர்கேட்டையும் சில நாட்களுக்கு மறைத்து, மக்களின் கவனத்தைத் திசைதிருப்பிவிடலாம் என்று ஆளும் அரசு நினைக்கிறது.
அன்பில் மகேஸ் அவர்கள் தன் மீதான குற்றச்சாட்டுகளைச் சட்டப்படி எதிர்கொள்வார். அதேசமயம், இதுபோன்ற கைது நடவடிக்கைகளால் மக்களின் கோபத்தைத் திசைதிருப்பித் தப்பித்துக்கொள்ளலாம் என்று நினைக்கும் த.வெ.க. அரசின் எண்ணம் நிச்சயம் ஈடேறாது! என பதிவு.
அன்பில் மகேஸ் பொய்யாமொழியின் இந்த திடீர் கைது, திமுக தொண்டர்கள் மத்தியில் பெரும் கொந்தளிப்பை ஏற்படுத்தியுள்ள நிலையில், அடுத்தகட்ட அரசியல் நகர்வுகள் குறித்து இரு தரப்பிலும் ஆலோசனைகள் தீவிரமாக நடைபெற்று வருகின்றன.