இன்றைய காலத்தில் பெரும்பாலானவர்களை பாதிக்கும் முக்கிய பிரச்சனையாக உடல் பருமன் மாறியுள்ளது. வேகமான வாழ்க்கை முறை, துரித உணவுகள், ஒழுங்கற்ற உணவு நேரம், அதிக மசாலா உணவுகள் ஆகியவை உடல் எடை அதிகரிக்க முக்கிய காரணங்களாக உள்ளன.
உடல் எடையை குறைக்க பலரும் கடுமையான உடற்பயிற்சிகள், டயட் திட்டங்கள் போன்றவற்றை முயற்சி செய்து வருகிறார்கள். இருப்பினும், சிலருக்கு அவை தொடர்ந்து செய்ய சிரமமாக இருக்கும். ஆனால், சிலருக்கு எவ்வளவு நடந்தாலும் உடல் எடை குறையாத நிலை காணப்படுகிறது. இது ஏன் நிகழ்கிறது என்ற கேள்விக்கு, நிபுணர்கள் பல காரணங்களை சுட்டிக்காட்டுகின்றனர்.
சரியான வேகத்தில் நடக்காமல் இருப்பது, குறைந்த நேரம் மட்டுமே நடைப்பயிற்சி செய்வது, நடைப்பயிற்சிக்குப் பிறகு அதிக கலோரி உணவுகளை உட்கொள்ளுவது போன்றவை உடல் எடையை குறைக்க தடையாகின்றன. மேலும், ஒரே மாதிரியான நடைப்பயிற்சியை தொடர்ந்து செய்வதால் உடல் அதற்கு பழகி, கலோரி எரிப்பு குறையும் என்றும் கூறப்படுகிறது. இதற்கு மேலாக, தூக்கக் குறைவு, மன அழுத்தம் மற்றும் சீரற்ற உணவுமுறை ஆகியவையும் உடல் எடை குறையாததற்கான முக்கிய காரணங்களாகும். சிலருக்கு உடல்நலக் கோளாறுகளும் இதற்கு காரணமாக இருக்கலாம்.
எனவே, நடைப்பயிற்சியை சரியான முறையில் மேற்கொள்வதுடன், சீரான உணவுமுறை, போதுமான ஓய்வு மற்றும் வாழ்க்கை முறையில் மாற்றங்கள் ஆகியவற்றையும் பின்பற்றினால்தான் உடல் எடையை திறம்படக் கட்டுப்படுத்த முடியும் என நிபுணர்கள் வலியுறுத்துகின்றனர்.
தவறாக நடப்பது: நடைப்பயிற்சி செய்வதன் மூலம் உடல் எடையை குறைக்க முடியும் என்றாலும், அதை சரியான முறையில் செய்யாதது எதிர்பார்த்த பலனைத் தடுக்கிறது என நிபுணர்கள் தெரிவிக்கின்றனர். அவர்களின் கூற்றுப்படி, பலர் நடக்கும் போது கால்களை முழுமையாக அசைக்காமல், சோர்வாக அல்லது பாதி முயற்சியுடன் நடப்பது வழக்கமாக உள்ளது. இதனால் உடலில் கலோரி எரிப்பு குறைந்து, உடல் எடை குறையாமல் போகிறது.
நடக்கும் போது கைப்பேசி: மேலும், நடைப்பயிற்சியின் போது கைபேசியைப் பயன்படுத்துவது இன்னொரு பெரிய தவறாகக் கூறப்படுகிறது. பலர் நடக்கும் போது தொடர்ந்து மொபைலைப் பார்ப்பது காரணமாக, உடல் நிலை (posture) பாதிக்கப்படுகிறது. இதனால் கழுத்து மற்றும் தோள்பட்டை வலி போன்ற பிரச்சனைகள் உருவாகும் அபாயம் உள்ளது. எனவே, நடைப்பயிற்சியின் முழு பயனைப் பெற வேண்டுமெனில், சரியான உடல் நிலை, முழுமையான கால்வழி இயக்கம் மற்றும் கவனச்சிதறல் இல்லாத நடைப்பயிற்சி அவசியம் என நிபுணர்கள் வலியுறுத்துகின்றனர்.
மெதுவான நடை: உடல் எடையைக் குறைக்க நடைப்பயிற்சி செய்வோர் கவனிக்க வேண்டிய முக்கிய அம்சங்களில் ஒன்று நடை வேகம் என நிபுணர்கள் தெரிவிக்கின்றனர். மெதுவாக நடப்பது உடலுக்கு சற்று பயன் அளித்தாலும், அதிக அளவில் கலோரி எரிக்காது என்பதால், எடை குறைதலில் அது பெரிய தாக்கத்தை ஏற்படுத்தாது.
பலர் சீராக நடைப்பயிற்சி மேற்கொண்டாலும், வேகம் குறைவாக இருப்பதால் எதிர்பார்த்த பலனை அடைய முடியாமல் போகிறது. மெதுவான நடை, உடலை அதிகமாக சவாலுக்கு உட்படுத்தாது என்பதால், கலோரி எரிப்பு குறைந்த அளவிலேயே நடைபெறுகிறது.எனவே, உடல் எடையை குறைக்க விரும்புவோர் சற்று வேகமாக (brisk walking) நடப்பது அவசியம் என நிபுணர்கள் பரிந்துரைக்கின்றனர். இதன் மூலம் இதய துடிப்பு அதிகரித்து, கலோரி எரிப்பு மேம்பட்டு, எடை குறைதல் சாத்தியமாகும்.
தண்ணீரை தவிர்ப்பது: நம் உடலின் செயல்பாடுகளுக்கு தண்ணீர் அத்தியாவசியமானது. போதுமான அளவு தண்ணீர் குடிக்காமல் இருந்தால், உடலில் நீர்ச்சத்து குறைந்து, மெட்டாபாலிசம் மந்தமாகும். இதனால் கலோரி எரிப்பு குறைந்து, உடல் எடை குறைதல் தடைப்படும். எனவே, நடைப்பயிற்சி செய்பவர்கள் தினமும் போதுமான அளவு தண்ணீர் குடிப்பதுடன், இளநீர், பழச்சாறு போன்றவற்றையும் சேர்த்து எடுத்துக்கொள்வது உடலின் எலக்ட்ரோலைட் சமநிலையை பராமரிக்க உதவும் என நிபுணர்கள் கூறுகின்றனர்.
ஒரே இடத்தில் நடத்தல்: பலர் தினமும் ஒரே இடத்தில் அல்லது ஒரே பாதையில் நடப்பது வழக்கம். இதனால் உடலில் ஒரே தசைகள் மட்டுமே பயன்படுத்தப்படுகின்றன. இதன் விளைவாக, கலோரி எரிப்பு குறைந்து, எடை குறைதல் மந்தமாகிறது. எனவே, நடைப்பயிற்சியில் மாற்றம் கொண்டு வருவது அவசியம். வெவ்வேறு பாதைகள், மேடு-பள்ளமான நிலங்கள், வேக மாற்றங்கள் போன்றவற்றைச் சேர்த்தால், உடலின் பல தசைகள் செயல்படும். இது கலோரி எரிப்பை அதிகரித்து, உடல் எடையை குறைக்க உதவும். மொத்தத்தில், நடைப்பயிற்சியின் பயனை முழுமையாகப் பெற வேண்டுமெனில், தண்ணீர் குடிக்கும் பழக்கம் முதல் நடை முறை வரை அனைத்திலும் கவனம் செலுத்துவது அவசியம் என நிபுணர்கள் வலியுறுத்துகின்றனர்.