பஞ்சாப் நேஷனல் வங்கியில் கணக்கு வைத்திருக்கும் வாடிக்கையாளர்கள் நவம்பர் 10ஆம் தேதிக்குள் கேஒய்சி அப்டேட்டை முடிக்க வேண்டும். இல்லாவிட்டால் சிக்கல் ஏற்படும். வங்கிக் கணக்கு முடக்கப்படலாம். சேவைகள் கிடைக்காது.
கடந்த மூன்று ஆண்டுகளாக எவ்விதப் பரிவர்த்தனைகளும் மேற்கொள்ளப்படாத மற்றும் பூஜ்ஜிய இருப்பு கொண்ட சில கணக்குகளை மூட பஞ்சாப் நேஷனல் வங்கி முடிவு செய்துள்ளது. இக்கணக்குகள் மூடப்படுவதைத் தவிர்க்க வாடிக்கையாளர்கள் நவம்பர் 10ஆம் தேதிக்குள் தேவையான அப்டேட்டை முடிக்க வேண்டும். செயலற்ற கணக்குகள் தவறாகப் பயன்படுத்தப்படுவதைத் தடுக்கவும், அவற்றுடன் தொடர்புடைய அபாயங்களைக் குறைக்கவும் இந்த நடவடிக்கை எடுக்கப்படுவதாக பஞ்சாப் நேஷனல் வங்கி தெரிவித்துள்ளது.
எந்தெந்தக் கணக்குகள் மூடப்படும்?
பஞ்சாப் நேஷனல் வங்கி வெளியிட்டுள்ள அறிவிப்பின்படி, செப்டம்பர் 30 நிலவரப்படி, கடந்த மூன்று ஆண்டுகளாக எவ்விதப் பரிவர்த்தனைகளும் நடைபெறாத மற்றும் வைப்புத்தொகை ஏதும் இல்லாத கணக்குகள் மூடப்படலாம். வாடிக்கையாளர்கள் தங்கள் கணக்குகளைத் தொடர்ந்து வைத்திருக்க விரும்பினால் அருகிலுள்ள பஞ்சாப் நேஷனல் வங்கி கிளைக்குச் சென்று, KYC நடைமுறையை நிறைவு செய்து கணக்கை மீண்டும் செயல்பாட்டிற்குக் கொண்டு வர வேண்டும். இதனை நவம்பர் 10ஆம் தேதிக்குள் செய்ய வேண்டும். குறிப்பிட்ட காலக்கெடுவுக்குள் இந்த நடைமுறையை முடிக்கத் தவறினால் அந்தக் கணக்கு மூடப்படும்.
KYC அப்டேட் அவசியம்!
இந்திய ரிசர்வ் வங்கியின் வழிகாட்டுதல்களின்படி, KYC விவரங்களைப் புதுப்பிப்பது கட்டாயமாகும் என்பதை பஞ்சாப் நேஷனல் வங்கி வாடிக்கையாளர்களுக்கு நினைவூட்டியுள்ளது. செப்டம்பர் 30ஆம் தேதியன்று KYC புதுப்பிப்பதற்கான காலக்கெடு முடிந்த வாடிக்கையாளர்கள், அக்டோபர் 31ஆம் தேதிக்குள் இந்த நடைமுறையை நிறைவு செய்யுமாறு கேட்டுக்கொள்ளப்பட்டுள்ளனர். குறிப்பிட்ட காலத்திற்குள் KYC அப்டேட்டை முடிக்கத் தவறினால் கணக்கு முடக்கப்படலாம் அல்லது கணக்கின் செயல்பாடுகள் மீது கட்டுப்பாடுகள் விதிக்கப்படலாம் என்று பஞ்சாப் நேஷனல் வங்கி எச்சரித்துள்ளது.
வீட்டிலிருந்தே அப்டேட் செய்வது எப்படி?
பஞ்சாப் நேஷனல் வங்கி வாடிக்கையாளர்கள் தங்களுடைய KYC-ஐப் புதுப்பிக்கப் பல வழிகள் உள்ளன. ஏற்கனவே உள்ள KYC விவரங்களில் எந்த மாற்றமும் இல்லை என்றால், SMS மூலமாகவே இந்த நடைமுறையை முடிக்கலாம். இதற்கு KYCNC என்று டைப் செய்து 9264092640 அல்லது 5607040 என்ற எண்ணிற்கு SMS அனுப்ப வேண்டும். இது தவிர, PNB ONE மொபைல் செயலியில் உள்நுழைந்து My Profile > Check KYC Status > Update KYC என்ற விருப்பத்தைத் தேர்ந்தெடுக்கலாம்.
இணைய வங்கி மூலமாகவும் இதை முடிக்கலாம். அதற்கு நீங்கள் Personal Settings பகுதிக்குச் சென்று KYC நிலையைச் சரிபார்க்கலாம். மேலும், வாடிக்கையாளர்கள் தங்கள் பதிவு செய்யப்பட்ட மின்னஞ்சல் முகவரி மூலமாகவோ அல்லது தபால் மூலமாகவோ KYC புதுப்பிப்பதற்கான கோரிக்கையை அனுப்பலாம். இதற்காக, தேவையான ஆவணங்களையும், உங்கள் கோரிக்கை கடிதத்தையும் கணக்கு உள்ள கிளைக்கு அனுப்பி வைக்க வேண்டும். நீங்கள் விரும்பினால், பஞ்சாப் நேஷனல் வங்கியின் எந்தவொரு கிளைக்கும் நேரில் சென்றும் உங்கள் KYC அப்டேட்டை முடிக்கலாம்.
காலக்கெடு இதுதான்!
உங்கள் வங்கிக் கணக்கு நீண்ட காலமாகப் பயன்படுத்தப்படாமல் இருந்தாலோ அல்லது உங்கள் KYC அப்டேட்டை முடிக்க வேண்டியிருந்தாலோ, உங்கள் கணக்கின் தற்போதைய நிலையை விரைவில் சரிபார்க்க வேண்டும். உரிய நேரத்தில் தேவையான நடைமுறைகளை முடிப்பதன் மூலம் கணக்கு முடக்கப்படுவதைத் தடுக்கலாம்.
Source link