வங்கிக் கணக்கு தொடர்பாக ஒரு முக்கியமான அறிவிப்பு வந்துள்ளது. வங்கிக் கணக்கில் நடக்கும் டிஜிட்டல் மோசடி வழக்குகளில் பாதிக்கப்பட்டவர்களின் இழப்புகளுக்கு வங்கிகளே பொறுப்பேற்க வேண்டும் என்று உச்ச நீதிமன்றம் உத்தரவிட்டுள்ளது. மேலும், வாடிக்கையாளர்களைப் பாதுகாப்பது நிதி நிறுவனங்களின் பொறுப்பாகும் என்றும் நீதிமன்றம் சுட்டிக்காட்டியுள்ளது. வங்கியின் உரிய சோதனைகள் அல்லது கண்காணிப்புப் பணியில் ஏற்பட்ட குறைபாடு காரணமாக இந்த மோசடி நடந்துள்ளது தெரியவந்தால், டிஜிட்டல் அரஸ்ட் போன்ற குற்றங்களால் பாதிக்கப்பட்டவர்களுக்கு அவர்கள் இழந்த தொகையில் குறைந்தது ஒரு பகுதியையாவது இழப்பீடாக வழங்க வேண்டும் என்று நீதிமன்றம் வலியுறுத்தியுள்ளது.
இந்தியத் தலைமை நீதிபதி சூர்யா காந்த் தலைமையிலான இந்த அமர்வு கணக்கு வைத்திருப்பவரின் வழக்கமான பணப் பரிவர்த்தனை முறையிலிருந்து மாறுபடும் அசாதாரண பரிவர்த்தனைகளைத் தற்காலிகமாக நிறுத்துவது, சந்தேகத்திற்கிடமான நடவடிக்கைகளைத் தானியங்கு முறையில் அறிக்கை செய்வது மற்றும் பரிவர்த்தனைகளின் நம்பகத்தன்மையை உறுதி செய்வதற்கான நேரடிச் சரிபார்ப்பு போன்ற கட்டாய முன்னெச்சரிக்கை நடவடிக்கைகளின் அவசியத்தை எடுத்துரைத்தது. “பெரிய நிறுவனங்களின் பரிவர்த்தனைகளை உங்களால் தடுத்து நிறுத்த முடியாமல் போகலாம்; ஆனால், வழக்கமாக ஒரே நேரத்தில் ரூ. 10,000 அல்லது ரூ. 20,000 மட்டும் எடுக்கும் நபர் திடீரென ரூ. 50,000 எடுக்கும்போது அந்தப் பரிவர்த்தனை குறித்து எச்சரிக்கை விடுக்கப்பட வேண்டாமா?” என்று நீதிபதி கேள்வி எழுப்பினார்.
தலைமை நீதிபதி சூர்யா காந்த் மற்றும் நீதிபதிகள் ஜாய்மால்யா பக்சி, வி. மோகனா ஆகியோர் அடங்கிய அமர்வு, தாமாக முன்வந்து விசாரணைக்கு எடுத்த பொதுநல வழக்கு ஒன்றினை விசாரித்தது. நிதி நிறுவனங்கள் தங்களுடைய கடமைகளில் தவறியது கண்டறியப்பட்டால் முன்மொழியப்பட்டுள்ள ஒழுங்குமுறைச் சட்டத்தின் கீழ் பாதிக்கப்பட்டவர்களுக்குப் போதுமான இழப்பீடு வழங்கப்பட வேண்டும் என்பதை இந்த அமர்வு வலியுறுத்தியது. “எங்கு இது போன்ற மோசடிகள் நடந்தாலும் சம்பந்தப்பட்ட வங்கி பாதிக்கப்பட்டவருக்கு இழப்பீடு வழங்குவதோடு சட்ட நடவடிக்கையையும் சந்திக்க நேரிடும்” என்று தலைமை நீதிபதி சூர்யா காந்த் தெரிவித்தார்.
மேலும், தொடர்ந்து நடந்து வரும் டிஜிட்டல் அரஸ்ட் மோசடிகள் குறித்து உச்ச நீதிமன்றம் தனது கடுமையான கவலையையும் ஏமாற்றத்தையும் வெளிப்படுத்தியது. படித்த குடிமக்களும்கூட இதுபோன்ற மோசடிகளில் எப்படி தொடர்ந்து சிக்குகிறார்கள் என்று தலைமை நீதிபதி கேள்வி எழுப்பினார். அதோடு, அடுத்த விசாரணை தேதிக்குள் அங்கீகரிக்கப்பட்ட அனைத்து நிதி நிறுவனங்களின் பட்டியலைச் சமர்ப்பிக்குமாறு இந்திய ரிசர்வ் வங்கிக்கு உச்ச நீதிமன்றம் உத்தரவிட்டது. மேலும், தனிப்பட்ட வங்கிகளை வழக்கில் சேர்க்காமலேயே அனைத்து நிறுவனங்களுக்கும் பொருந்தக்கூடிய உத்தரவுகளை நீதிமன்றம் பிறப்பிக்கும் என்றும் குறிப்பிட்டது.
டிஜிட்டல் அரஸ்ட் மோசடிகளால் பாதிக்கப்படும் வாடிக்கையாளர்களின் அசாதாரண பரிவர்த்தனைகள் குறித்து அருகிலுள்ள காவல் நிலையங்களுக்கு வங்கிகள் எச்சரிக்க வேண்டியதன் பொறுப்பையும் இந்த அமர்வு வலியுறுத்தியது. இந்த விசாரணையின் போது, மத்திய அரசு மற்றும் பிற அதிகாரிகளின் தரப்பில் ஆஜரான அட்டர்னி ஜெனரல் ஆர். வெங்கடரமணி, கடந்த ஆண்டைக் காட்டிலும் டிஜிட்டல் அரஸ்ட் வழக்குகள் சுமார் 50 சதவீதம் வரை குறைந்துள்ளதாக நீதிமன்றத்தில் தெரிவித்தார். உச்ச நீதிமன்றத்தின் தலையீடு, அமைச்சகங்கள் மற்றும் துறைகளின் ஒருங்கிணைந்த நடவடிக்கைகள் மற்றும் பொது விழிப்புணர்வுப் பிரச்சாரங்கள் காரணமாகவே இந்த வீழ்ச்சி ஏற்பட்டுள்ளதாக அவர் தெரிவித்தார்.