இந்திய பங்குச் சந்தையிலிருந்து, கடந்த மூன்று மாதங்களில் மட்டும், முன்னெப்போதும் இல்லாத அளவாக, ரூ.1.75 லட்சம் கோடி அன்னிய முதலீடுகள் வெளியேறியுள்ளன. இது 2025-ஆம் ஆண்டு முழுவதையும் விட அதிகமான தொகையாகும்.
கவனிக்க வேண்டிய விஷயங்கள்
அமெரிக்கா – ஈரான் போர் காரணமாக ஏற்பட்டுள்ள எரிசக்தி தட்டுப்பாடு, கச்சா எண்ணெய் விலை உயர்வு ஆகியவை இந்தியாவின் பொருளாதாரத்தை பாதிக்கும் என, அன்னிய முதலீட்டாளர்கள் நினைக்கிறார்கள்
இந்தியா போன்ற நுகர்வு சார்ந்த சந்தைகளை விட, தென்கொரியா மற்றும் தைவான் போன்ற ‘ஏ.ஐ., மற்றும் செமிகண்டக்டர் சிப்’ தயாரிப்பில் முன்னணியில் உள்ள நாடுகளை நோக்கி முதலீட்டாளர்கள் தங்களது கவனத்தை திருப்பியிருக்கிறார்கள்
கடந்த மார்ச் மாதத்தில் தென்கொரியா மற்றும் தைவான் சந்தைகளிலிருந்து அன்னிய முதலீடுகள் அதிக அளவில் வெளியேறி இருந்தாலும், அமெரிக்கா – ஈரான் இடையிலான தற்காலிக போர் நிறுத்த அறிவிப்புகள், இந்த நாடுகளுக்கு புதிய வாய்ப்புகளை வழங்கியுள்ளன
நடப்பு ஏப்ரல் மாதத்தில், இதுவரை தென்கொரியாவுக்கு 30,060 கோடி ரூபாயும்; தைவானுக்கு 46,760 கோடி ரூபாயும் முதலீடாக வந்துள்ளன. ஆனால், இந்திய சந்தையில் அத்தகைய தொழில்நுட்ப பலம் இல்லாத காரணத்தால், சுமார் 25,050 கோடி ரூபாய் முதலீடுகள் வெளியேறியுள்ளன
அன்னியமுதலீடுகள் வெளியேறினாலும், உள்நாட்டு மியூச்சுவல் பண்டு நிறுவனங்கள் மற்றும் சிறு முதலீட்டாளர்கள் இந்த ஆண்டில் இதுவரை 2.58 லட்சம் கோடி ரூபாய் வரை முதலீடு செய்துள்ளனர்
‘தற்போது இந்திய பங்குகளின் மதிப்பீடு ஓரளவிற்கு சீராகியுள்ளதால், சர்வதேச பிரச்னைகள் ஓய்ந்த பிறகு, மீண்டும் வெளிநாட்டு முதலீடுகள் வர வாய்ப்புள்ளது’ என சந்தை சார்ந்த நிபுணர்கள் நம்பிக்கை தெரிவித்திருக்கின்றனர்.