புதிய சாலைத் திட்டங்களுக்கான நிலம் கையகப்படுத்தும் பணியை வேகப்படுத்த, செயற்கை நுண்ணறிவு (AI) மற்றும் Web GIS தொழில்நுட்பத்தை பயன்படுத்தும் புதிய டிஜிட்டல் தளத்தை CUMTA உருவாக்குகிறது. இதன் மூலம் நில விவரங்கள், கையகப்படுத்தும் செலவு, பாதிக்கப்படும் பகுதிகள் உள்ளிட்ட தகவல்கள் ஒரே தளத்தில் கிடைப்பதுடன், PDF மற்றும் AutoCAD வரைபடங்களும் தானாக டிஜிட்டல் தரவாக மாற்றப்படும். இதனால் திட்டமிடல் துல்லியமாகவும், நிலம் கையகப்படுத்தும் பணிகள் விரைவாகவும் நடைபெறும் என அதிகாரிகள் தெரிவித்துள்ளனர்.
சென்னை மற்றும் புறநகர் பகுதிகளில் புதிய சாலைத் திட்டங்களை விரைவாக செயல்படுத்தும் நோக்கில், நிலம் கையகப்படுத்தும் நடைமுறையை செயற்கை நுண்ணறிவு (AI) தொழில்நுட்பத்தின் உதவியுடன் எளிமைப்படுத்த சென்னை ஒருங்கிணைந்த பெருநகரப் போக்குவரத்து ஆணையம் (CUMTA) முக்கிய நடவடிக்கை எடுத்துள்ளது. இதற்காக AI மற்றும் Web GIS தொழில்நுட்பங்களை ஒருங்கிணைக்கும் புதிய டிஜிட்டல் தளத்தை உருவாக்க டெண்டர் வெளியிடப்பட்டுள்ளது.
நிலம் கையகப்படுத்தலில் ஏற்படும் காலதாமதம்
புதிய சாலை அமைக்கும் திட்டங்கள் அறிவிக்கப்படும் போது, எந்தெந்த நிலங்கள் பாதிக்கப்படும், எவ்வளவு நிலம் கையகப்படுத்த வேண்டும், நிலத்தின் உரிமையாளர்கள் யார், சந்தை மதிப்பு என்ன என்பது போன்ற தகவல்களை அதிகாரிகள் தற்போது பல்வேறு துறைகளின் ஆவணங்கள், GIS வரைபடங்கள் மற்றும் நிலப் பதிவுகளை தனித்தனியாக ஆய்வு செய்து சேகரிக்க வேண்டியிருக்கிறது. இந்த நீண்டகால நடைமுறையால் திட்டங்கள் தாமதமடைவதோடு, செலவு மதிப்பீட்டிலும் சிக்கல்கள் ஏற்படுகின்றன.
ஒரே தளத்தில் அனைத்து நில விவரங்களும்
இந்த சிக்கல்களுக்கு தீர்வு காணும் வகையில், அனைத்து நில விவரங்களையும் ஒரே Web GIS தளத்தில் ஒருங்கிணைக்கும் திட்டத்தை CUMTA செயல்படுத்த உள்ளது. இந்த டிஜிட்டல்தளத்தில் நிலத்தின் பரப்பளவு, உரிமையாளர் விவரம், நில வகை, கையகப்படுத்த வேண்டிய பகுதி, மதிப்பீட்டு செலவு உள்ளிட்ட அனைத்து தகவல்களும் ஒரே இடத்தில் கிடைக்கும். இதன் மூலம் அதிகாரிகள் விரைவாக முடிவெடுக்கவும், திட்டங்களை துல்லியமாக வடிவமைக்கவும் முடியும்.
AI மூலம் வரைபடங்கள் டிஜிட்டல் தரவாக மாற்றம்
இந்த திட்டத்தின் முக்கிய அம்சமாக, PDF மற்றும் AutoCAD (DWG) வடிவில் உள்ள சாலை வரைபடங்களை செயற்கை நுண்ணறிவு தொழில்நுட்பம் தானாக ஆய்வு செய்து, அவற்றை டிஜிட்டல் சாலைப் பதிவேடாக மாற்றும் வசதி உருவாக்கப்படுகிறது. இதனால் கையால் தரவுகளை உள்ளிட வேண்டிய தேவையும் குறையும். பல்வேறு துறைகளின் தரவுகள் ஒரே தளத்தில் ஒருங்கிணைக்கப்படுவதால் திட்டமிடல் வேகமாக நடைபெறும் என அதிகாரிகள் தெரிவித்துள்ளனர்.
செலவு கணிப்பும் திட்டமிடலும் துல்லியமாகும்
புதிய தொழில்நுட்பம் செயல்பாட்டுக்கு வந்த பிறகு, சாலைத் திட்டங்களுக்கு தேவையான நிலத்தின் அளவு, கையகப்படுத்தும் செலவு, பாதிக்கப்படும் பகுதிகள் மற்றும் திட்டத்தின் மொத்த நிதி மதிப்பீடு போன்றவற்றை மிகக் குறுகிய நேரத்தில் துல்லியமாக கணிக்க முடியும். இதன் மூலம்திட்ட தாமதம் குறைவதோடு, நிலம் கையகப்படுத்தும் நடைமுறையில் வெளிப்படைத்தன்மையும் அதிகரிக்கும். மேலும், திட்டங்கள் தொடங்குவதற்கு முன்பே தேவையான நிதியை துல்லியமாக திட்டமிட அதிகாரிகளுக்கு இந்த அமைப்பு உதவும்.
திமுக, அதிமுக வெற்றியை தீர்மானிக்கும் தவெக!
CMDA எல்லை முழுவதும் பயன்பாடு
சென்னை ஒருங்கிணைந்த பெருநகரப் போக்குவரத்து ஆணையமான CUMTA, சென்னை மாநகர எல்லையைத் தாண்டி CMDA எல்லைக்குட்பட்ட திருவள்ளூர், காஞ்சிபுரம், செங்கல்பட்டு மற்றும் ராணிப்பேட்டை மாவட்டங்களிலும் சாலை மற்றும் போக்குவரத்து கட்டமைப்புகளை மேம்படுத்தும் பணிகளை மேற்கொண்டு வருகிறது. இந்த புதிய AI மற்றும் Web GIS தளம் நடைமுறைக்கு வந்தால், எதிர்கால சாலைத் திட்டங்கள் குறைந்த காலத்திலேயே செயல்படுத்தப்படுவதுடன், நிலம் கையகப்படுத்தும் பணிகள் துல்லியமாகவும், விரைவாகவும் நிறைவேறும் என அதிகாரிகள் நம்பிக்கை தெரிவித்துள்ளனர். மேலும், தொழில்நுட்பத்தின் பயன்பாட்டால் திட்டங்களின் செயல்திறன் உயர்ந்து, பொதுமக்களுக்கு மேம்பட்ட சாலை உள்கட்டமைப்பை விரைவாக வழங்கும் வாய்ப்பும் உருவாகும் என்று எதிர்பார்க்கப்படுகிறது.
Source link