ஈரான் தாக்குதலை மேலும் 10 நாளுக்கு நிறுத்திய டிரம்ப் படைகளை குவித்து வருவதால் நீடிக்கும் பதற்றம்

அமெரிக்காவின் திட்டம்! அமெரிக்க அதிகாரிகளுடனான உரையாடல்களின் அடிப்படையில், ‘ஆக்சியோஸ்’ அறிக்கையின்படி, நான்கு சாத்தியமான போர் சூழல்கள் கணிக்கப்பட்டுள்ளன. • ஈரானின் பொருளாதார வாழ்வாதாரமான கார்க் தீவை ஆக்கிரமித்து அதை கைப்பற்றுவது • ஹார்முஸ் ஜலசந்தியின் மீதான கட்டுப்பாட்டை தீர்மானிக்கும் லாரக் தீவை கைப்பற்றுவது • ஹார்முஸ் ஜலசந்தியின் நுழைவாயிலில் உள்ள அபு மூசா மற்றும் அதன் அருகே உள்ள இரண்டு சிறிய தீவுகளை கைப்பற்றுவது • ஈரானின் அணுசக்தி நிலையங்களில் உள்ள அணு பொருட்களை பாதுகாக்க ஈரானுக்குள் ஊடுருவுவது.

‘அமெரிக்க வீரர்களை ஒளித்து வைத்தால் தாக்குவோம்’ ஈரான் தாக்குதலால் ஐக்கிய அரபு எமிரேட்ஸ், சவுதி அரேபியா, குவைத், பஹ்ரைன் உள்ளிட்ட நாடுகளில் உள்ள அமெரிக்க ராணுவ தளங்கள் சேதமடைந்துள்ளன. இதனால், பல அமெரிக்க வீரர்கள் தங்கள் தளங்களை விட்டு வெளியேறி, அங்குள்ள ஹோட்டல்கள் மற்றும் அலுவலகங்களில் ஒளிந்துள்ளதாக ஈரான் குற்றஞ்சாட்டி உள்ளது. இந்நிலையில், ஈரான் வெளியுறவு அமைச்சர் சையத் அப்பாஸ் அராக்சி, சமூக வலைதளத்தில் வெளியிட்ட பதிவு: போரின் துவக்கத்தில் இருந்தே, அமெரிக்க வீரர்கள் மேற்காசிய மக்களை மனித கேடயங்களாக பயன்படுத்துகின்றனர். அவர்கள் மேற்காசிய நாடுகளில் உள்ள ராணுவ தளங்களிலிருந்து தப்பி ஓடி, ஹோட்டல்களிலும், தங்கும் விடுதிகளிலும், அலுவலகங்களிலும் ஒளிந்துள்ளனர். அவர்களுக்கு ஹோட்டல்களில் அறை வழங்கக்கூடாது. மீறி வழங்கும் ஹோட்டல்கள் மீது குறிவைத்து தாக்குதல் நடத்துவோம். இவ்வாறு அவர் குறிப்பிட்டார்.

3 எண்ணெய் கப்பல்களை திருப்பி அனுப்பிய ஈரான் அமெரிக்கா – இஸ்ரேல் உடனான மோதலால், ஹார்முஸ் ஜலசந்தியை ஈரான் முடக்கியுள்ளது. ஹார்முஸ் ஜலசந்தி திறந்திருப்பதாக நம்பி, அதை கடக்க நேற்று காலை மூன்று எண்ணெய் கப்பல்கள் வந்தன. ஈரானின் எச்சரிக்கையை தொடர்ந்து, அவை திரும்பிச் சென்றன. மேலும், எதிரி நாடுகளுடன் தொடர்புடைய துறைமுகங்களுக்கு செல்லும் மற்றும் அங்கிருந்து வரும் கப்பல்களுக்கு ஹார்முஸ் ஜலசந்தியில் அனுமதி இல்லை என, ஈரானிய புரட்சிகர காவல் படை தெரிவித்துள்ளது.