பங்குச்சந்தை முதலீடுகள் முன்பை விட இப்போது எளிதாகிவிட்டன. ஆனால், அதே நேரத்தில் போலி செயலிகள் வாயிலாக, முதலீட்டாளர்களை ஏமாற்றுவோரும் நாளுக்கு நாள் அதிகரித்து வருகின்றனர். இந்த பிரச்னைக்கு தீர்வாக, தற்போது ‘வெரிபைடு’ முத்திரை என்கிற புதிய பாதுகாப்பு அம்சத்தை ‘செபி’ அறிமுகப்படுத்தியுள்ளது.
இனி, ‘கூகுள் பிளே ஸ்டோரில்’ செபியால் அங்கீகரிக்கப்பட்ட பங்கு தரகர்களின் செயலிகளுக்கு பக்கத்தில் ஒரு வெரிபைடு முத்திரை இருக்கும்.
இதன் மூலம், முதலீட்டாளர்கள் தாங்கள் பதிவிறக்கம் செய்வது உண்மையான செயலிதானா என்பதை எளிதில் கண்டறியலாம்.
கவனிக்க வேண்டியவை
முதற்கட்டமாக 600க்கும் மேற்பட்ட பங்கு தரகர் செயலிகளுக்கு இந்த முத்திரை வழங்கப்பட்டுள்ளது
விரைவில் முதலீட்டு ஆலோசகர்கள் மற்றும் பிற அங்கீகரிக்கப்பட்ட நிறுவனங்களுக்கும் இது விரிவுபடுத்தப்படும்
இதுவரை 1.30 லட்சம் தவறான முதலீட்டு தகவல்களையும், 66 போலி வர்த்தக செயலிகளையும் செபி நீக்கியுள்ளது
கூகுள் நிறுவனத்துடன் இணைந்து ‘செபி’ இந்த முயற்சியை மேற்கொண்டுள்ளது.
கடமைக்கான முத்திரை
வெரிபைடு முத்திரையானது செயலியில் ஒட்டப்படும் வெறும் லேபிள் மட்டும் அல்ல. இது முதலீட்டாளர்களின் நம்பிக்கை மற்றும் பாதுகாப்பு சார்ந்தது. சந்தையில் காளான்கள் போல முளைக்கும் போலி செயலிகளில் இருந்து, செபியால் அங்கீகரிக்கப்பட்ட உண்மையான செயலிகளை முதலீட்டாளர்கள் எளிதில் அடையாளம் காண இந்த முத்திரை நிச்சயம் உதவும். இந்தியாவில் தற்போது 14 கோடிக்கும் அதிகமாகியுள்ள முதலீட்டாளர்களின் நம்பிக்கையை காப்பது செபியின் கடமை.
– துஹின் காந்த பாண்டே, செபி தலைவர்