பிரபல ஆடை வடிவமைப்பாளர் ஜாய் கிரிசில்டா, சமயல் கலைஞர் மற்றும் நடிகரான மாதம்பட்டி ரங்கராஜ் தன்னை திருமணம் செய்து கொண்டு கர்ப்பமாக்கி ஏமாற்றிவிட்டதாக மகளில் ஆணையரகத்தில் புகார் தெரிவித்திருந்தார். இது தொடர்பாக மாதம்பட்டி ரங்கராஜிடம் விசாரணை நடந்து வந்தது. இரு தரப்பினரும் தனித்தனியாக வழக்கு தொடர்ந்தனர். அனைத்தும் நிலுவையில் இருக்கிறது. இதனிடையே ஜாய் கிரிசில்டாவிற்கு ஆண் குழந்தை பிறந்தது. அக்குழந்தைக்கு ராகா எனப் பெயர் சூட்டியுள்ளார்.
இதனிடையே ஜாய் கிரிசில்டா தனது சமூக வலைதளப்பக்கத்தில் மாதம்பட்டி ரங்கராஜுடன் இருக்கும் வீடியோக்களையும் புகைப்படங்களையும் தொடர்ச்சியாக வெளியிட்டு அவரை குற்றம் சாட்டி வந்தார். அப்போது மாதம்பட்டி பாகசாலா நிறுவனத்தையும் இணைத்திருந்தார். இதனால் தங்களது நிறுவனத்திற்குப் பாதிப்பு ஏற்பட்டதாக மாதம்பட்டி பாகசாலா நிறுவனம் சென்னை உயர்நீதி மன்றத்தில் வழக்கு தொடுத்திருந்தது. இந்த வழக்கு விசாரணையின் போது இருவருக்கும் மத்தியஸ்தம் செய்ய ஓய்வு பெற்ற உயர்நீதி மன்ற நீதிபதி ஒருவரை நீதிமன்றம் நியமித்தது. பின்பு நடந்த விசாரணையில் ஜாய் கிரிசில்டா தனது குழந்தையின் தந்தை மாதம்பட்டி ரங்கராஜ்தான் என்பதை நிரூபிக்க மரபணு சோதனை நடத்தப்பட வேண்டும் என தெரிவித்திருந்தார். அதே போல் இந்த மரபணு சோதனைக்கு தான் தயாராக இருப்பதாகவும் மாதம்பட்டி ரங்கராஜ் தெரிவித்திருந்தார்.
இதையடுத்து இருவரது தரப்பிலும் மரபணு சோதனைக்கு அனுமதி கோரி மனு தாக்கல் செய்யப்பட்ட நிலையில் மாதம்பட்டி ரங்கராஜுக்கு சென்னை ராஜீவ் காந்தி மருத்துவமனையில் பரிசோதனை நடத்த நீதிமன்றம் அனுமதி அளித்தது. மேலும் அந்த அறிக்கையை மத்தியஸ்தராக நியமிக்கப்பட்ட நீதிபதியிடம் சமர்பிக்க ஒரு வழக்கறிஞர் ஆணையரை உருவாக்கியது. அதன்படி வழக்கறிஞர் ஆணையர், மரபணு சோதனை நடத்தப்பட்டு, அதன் முடிவுகள், மத்தியஸ்தரிடம் சீல் வைத்த கவரில் சமர்ப்பித்தார். அதில் மாதம்பட்டி ரங்கராஜ்தான் ஜாய் கிரிசில்டாவின் தந்தை என்பது உறுதிபடுத்திவிட்டதாக தகவல் வெளியானது. இதனை தற்போது ஜாய் கிரிசில்டா உறுதி செய்துள்ளார்.
இது தொடர்பாக அவர் வெளியிட்டுள்ள அறிக்கையில், “சோதனைகள் பல வந்தாலும், ஒரு தாய் இறுதியில் ஜெயிப்பாள்… இன்று அதற்குச் சாட்சி நான். பத்திரிகை மற்றும் ஊடக நண்பர்களுக்கும், எனது உற்றார் உறவினர்களுக்கும், மற்றும் எனது இன்ஸ்டாகிராம் பின்தொடர்பாளர்கள் அனைவருக்கும்,
உங்கள் எல்லையற்ற அன்புக்கும் ஆதரவுக்கும் என் இதயத்தின் ஆழத்திலிருந்து நன்றி தெரிவித்துக்கொள்கிறேன். ராகா ரங்கராஜ் மீது நீங்கள் பொழிந்த பாசமும் அக்கறையும் எனக்கு இந்த உலகமே கிடைத்ததற்குச் சமமாகும். உங்கள் ஒவ்வொருவர் மீதும் நான் அளவற்ற நன்றியுணர்வுடன் இருக்கிறேன். உங்கள் அனைவருக்கும் தெரிந்தபடி, டி.என்.ஏ (DNA) பரிசோதனை அறிக்கை தற்போது வெளியாகியுள்ளது. அந்த அறிக்கையானது, ‘மாதம்பட்டி ரங்கராஜே எனது குழந்தையான ராகா ரங்கராஜின் தந்தை’ என்பதை அதிகாரப்பூர்வமாக உறுதிப்படுத்தியுள்ளது.
நீதி வென்றுவிட்டது! ராகா வெற்றி பெற்றுவிட்டான்! ஒரு தாயாக, பலரால் கேள்விக்குள்ளாக்கப்பட்ட எனது குழந்தையின் அடையாளத்தை, இன்று என்னால் அவனுக்குப் பெற்றுத் தர முடிந்துள்ளது. பல்வேறு சந்தேகங்களுக்கும், பொதுமக்களின் விமர்சனங்களுக்கு மத்தியிலும், நான் சற்றும் தளராமல் உறுதியாக நின்றேன். குழந்தையின் தந்தை டி.என்.ஏ பரிசோதனைக்குக் கோரிக்கை விடுத்தபோது, ​​உண்மை ஒருநாள் வெளிவரும் என்று நான் முழுமையாக நம்பினேன். இன்று, அந்த உண்மை வெளிவந்துள்ளது. இந்தப் பயணம் சற்றும் எளிதானதாக இருக்கவில்லை. எனது கர்ப்பக்காலத்தின்போது நான் சந்தித்த போராட்டங்கள் முதல், இந்த வேதனையான சூழலை எதிர்கொண்டது வரை, எனக்கு மிகுந்த மன உறுதி தேவைப்பட்டது. எனது மகன் ராகா ரங்கராஜுக்காக நான் ஒரு பாறையைப் போல உறுதியாக நின்றேன். ஒரு தாயாக, அவனுக்கு நீதி கிடைக்க வேண்டும் என்பதற்காக நான் மாதக்கணக்கில் போராடினேன். இன்று, ராகா ரங்கராஜ் இறுதியாக வெற்றி பெற்றுவிட்டான்.
எத்தகைய தடைகள் என் பாதையில் வந்தபோதிலும், நான் ஒருபோதும் முயற்சியைக் கைவிடவில்லை. ஒவ்வொரு அடியிலும் எனது மகனின் கண்ணியத்தைப் பாதுகாக்கும் ஒரு போர்வீரரைப் போல நான் உறுதியாக நின்றேன். ஆனால் இன்று, கடவுள் எங்கள் பிரார்த்தனைகள் அனைத்திற்கும் பதிலளித்திருப்பதால், நான் மிகுந்த ஆசிர்வதிக்கப்பட்டவளாக உணர்கிறேன். நான் மிகவும் பலவீனமான தருணங்களில் இருந்தபோது, ​​என் பக்கபலமாக நின்ற அனைவருக்கும் எனது மனமார்ந்த நன்றி. உங்கள் அசைக்க முடியாத அன்பு, நம்பிக்கை மற்றும் ஆதரவு ஆகியவையே என்னை இந்தச் சூழலிலிருந்து மீண்டு வரச் செய்தன. என்றும் அன்போடும் நன்றியுணர்வோடும்” என்றுள்ளார்.
Madhampatty Ragha Rangaraj @MadhampattyRR#madhampattyrangaraj#chefmadhampattyrangarajpic.twitter.com/S0qRLqdG62
— Joy Crizildaa (@joy_stylist) April 1, 2026