சென்னை: தே.ஜ., கூட்டணியில், பா.ஜ.,வுக்கு 27, பா.ம.க.,வுக்கு 18, அ.ம.மு.க.,வுக்கு 11 தொகுதிகளை அ.தி.மு.க., ஒதுக்கியுள்ளது. த.மா.கா.,

பால்கனியில் கை அசைத்த கோயல் மத்திய அமைச்சர் பீயூஷ் கோயல், அ.தி.மு.க., அலுவலகத்திற்கு வந்த பின், ஜெயலலிதா போல பால்கனியில் நின்று, கைகளை அசைத்து விட்டு உள்ளே சென்றார். அதேபோல், அ.தி.மு.க.,வில் இருந்து நீக்கப்பட்ட பின், ஒன்பது ஆண்டுகளுக்கு பின் நேற்று தினகரன் அ.தி.மு.க, அலுவலகத்துக்கு வந்தார். அவரும் பால்கனியின் நின்றபடி, கீழே நின்ற கூட்டணி கட்சிகளின் தொண்டர்களுக்கு வணக்கம் வைத்தார்.

பாரிவேந்தர் ஏமாற்றம் வாசன் வரவில்லை தொகுதி பங்கீட்டை இறுதி செய்ய, ஜான் பாண்டியன், பாரிவேந்தர் ஆகியோர் அ.தி.மு.க., அலுவலகம் வந்திருந்தனர். ஆனால், அவர்களுக்கான தொகுதி விபரங்களை பழனிசாமி வெளியிடவில்லை. இதனால், இருவரும் ஏமாற்றம் அடைந்தனர். அதேபோல், தொகுதி பங்கீட்டு பேச்சுக்கு, த.மா.கா., தலைவர் வாசனுக்கும் அழைப்பு கொடுக்கப்பட்டது. ஆனால், அவர் கேட்கும் ஆறு தொகுதிகளை கொடுக்க, பழனிசாமி சம்மதம் சொல்லவில்லை. இதனால், அ.தி.மு.க., அலுவலகத்துக்கு வாசன் வரவில்லை.

அ.ம.மு.க., பொதுச்செயலர் தினகரன் கூறியதாவது: அ.ம.மு.க.,வுக்கு 11 தொகுதிகள் ஒதுக்கீடு செய்யப்பட்டுள்ளன. இவற்றில் 99 சதவீதம், நான் கேட்ட தொகுதிகளே கொடுக்கப்பட்டுள்ளன. என்னென்ன தொகுதிகள் என்பதை பழனிசாமி சொல்வதே சரியாக இருக்கும். எனக்கு ஆதரவாக நின்ற முன்னாள் எம்.எல்.ஏ.,க்கள் பலருக்கு, இந்த தேர்தலில் போட்டியிட வாய்ப்பு கிடைத்துள்ளது. 11 தொகுதிகளிலும் ‘குக்கர்’ சின்னத்திலேயே போட்டியிடுவோம். தமிழகத்தில் மற்ற கட்சிகளின் கூட்டணியால், தேசிய ஜனநாயக கூட்டணிக்கு எந்தவித பாதிப்பும் இல்லை. இவ்வாறு அவர் கூறினார்.

தாமரை சின்னத்தில் போட்டியிட பீயூஷ் கோயல் வேண்டுகோள் பா.ஜ., தேர்தல் பொறுப்பாளரும், மத்திய அமைச்சருமான பீயூஷ் கோயல் நேற்று காலை சென்னை வந்தார். கிண்டியில் உள்ள நட்சத்திர ஹோட்டலில் பீயூஷ் கோயலை, வாசன், ஏ.சி.சண்முகம், பாரிவேந்தர், ஜான் பாண்டியன் ஆகியோர் சந்தித்தனர். அவர்களிடம், ‘உங்கள் கட்சிகளுக்கு ஒதுக்கப்படும் இடங்களில், பா.ஜ.,வின் தாமரை சின்னத்தில் போட்டியிட வேண்டும்’ என பீயூஷ் கோயல் வேண்டுகோள் விடுத்துள்ளார். அவர்கள் தங்கள் கட்சி நிர்வாகிகளுடன் ஆலோசித்து, ஓரிரு தினங்களில் முடிவை அறிவிப்பதாக தெரிவித்துள்ளனர். பின், வாசன் கூறுகையில், ”த.மா.கா., விருப்பத்திற்கு ஏற்ப, தொகுதிகளின் எண்ணிக்கை குறித்து பீயூஷ் கோயலிடம் பேசியுள்ளேன்,” என்றார் . ஏ.சி.சண்முகம் கூறுகையில், ”மூன்று இடங்களாவது வேண்டும் என்று கேட்டிருக்கிறோம்; ஆலோசித்து சொல்வதாக தெரிவித்துள்ளனர். இந்த தேர்தலில் தாமரை சின்னத்தில் போட்டியிட, புதிய நீதி கட்சி தயாராக உள்ளது,” என்றார். பாரிவேந்தர் கூறும்போது, ”நாங்கள் கேட்ட தொகுதிகளை ஒதுக்க சம்மதித்தனர். எங்களின் சின்னம் மைக்; அந்த சின்னத்தில் போட்டியிடுவோம்,” என்றார்.

200 தொகுதிகளில் வெற்றி பா.ம.க., தலைவர் அன்புமணி கூறியதாவது: தி.மு.க.,வின் பேச்சை, மக்கள் இனி நம்ப மாட்டார்கள். எனவே, தே.ஜ., கூட்டணி, 200 தொகுதிகளுக்கு மேல் வெற்றி பெறும். தொகுதி பங்கீடு எங்களுக்கு நிறைவாக இருந்தது. மக்களை சந்திக்க பயப்படும் முதல்வர் ஸ்டாலினும், அவரது கூட்டணி கட்சியினரும், ‘டில்லி டில்லி’ என கத்துகின்றனர். சாதனைகளை சொல்லி தேர்தலை சந்திக்க தைரியமில்லாத தி.மு.க., 28 கட்சிகளுடன் கூட்டணி அமைத்துள்ளது. இவ்வாறு அவர் கூறினார்.