வடகிழக்குப் பருவமழை தீவிரமடைந்துள்ள நிலையில், நீலகிரி மாவட்டத்தில் கனமழையால் இயல்பு வாழ்க்கை பாதிக்கப்பட்டுள்ளது. பல்வேறு பகுதிகளில் ஏற்பட்டுள்ள மண்சரிவால் போக்குவரத்து முடங்கியுள்ளதுடன், பொதுமக்களின் பாதுகாப்பும் கேள்விக்குறியாகியுள்ளது.
வடகிழக்குப் பருவமழை தீவிரமடைந்து வரும் சூழலில், நீலகிரி மாவட்டத்தில் பத்துக்கும் மேற்பட்ட இடங்களில் மண்சரிவு ஏற்பட்டுள்ளதால் கடும் போக்குவரத்து நெரிசல் ஏற்பட்டுள்ளது.
நீலகிரியில் கொட்டித் தீர்த்த கனமழை
நேற்று இரவு முதல் இன்று காலை வரைநீலகிரி மாவட்டத்தில் மிக அதிக அளவில் கனமழைபெய்து வருகிறது. இந்தச் சூழலில், குன்னூர் முதல் மேட்டுப்பாளையம் வரையிலான சாலையில் பர்லியார் பகுதியில் ஒரே இரவில் 250 மில்லிமீட்டர் மழை பதிவாகியுள்ளது. இதன் காரணமாக, குன்னூரில் இருந்து மேட்டுப்பாளையம் வரையிலான சாலையில் பத்துக்கும் மேற்பட்ட இடங்களில் மண்சரிவு ஏற்பட்டுள்ளது.
பேருந்து வனப்பகுதிக்கு அடித்துச் செல்லப்பட்டது
குறிப்பாக, அந்தச் சாலையில் உள்ள செக் போஸ்ட் பகுதியில் மிகப்பெரிய மண்சரிவு ஏற்பட்டுள்ளது. இந்த மண்சரிவின் காரணமாக, ஒரு பேருந்து அருகிலுள்ள வனப்பகுதிக்கு அடித்துச் செல்லப்பட்டுள்ளது. பேருந்தில் இருந்தவர்கள் யார், எத்தனை பேர் என்பது குறித்த விவரங்கள் இதுவரை காவல்துறைக்குத் தெரியவில்லை. இதுதொடர்பான விசாரணைகள் நடைபெற்று வருகின்றன. இன்று காலையில்தான் அதிக அளவிலான மண்சரிவு ஏற்பட்டுள்ளது.
மீட்புப் பணியில் தீயணைப்புத் துறையினர்
இந்தச் சாலையில் 30க்கும் மேற்பட்ட பேரிடர் மீட்புக் குழுவினர் மற்றும்தீயணைப்புத் துறையினர்மீட்புப் பணிகளில் ஈடுபட்டு வருகின்றனர். தீயணைப்புத் துறையினர் சாலையில் குவிந்துள்ள மண்ணை அகற்றும் பணியில் ஈடுபட்டுள்ளனர். இதன் மூலம் படிப்படியாக அந்தப் பகுதியில் போக்குவரத்து சீராகும் என்று எதிர்பார்க்கப்படுகிறது.
குன்னூர் – மேட்டுப்பாளையம் சாலையில் போக்குவரத்து மாற்றம்
குன்னூரில் இருந்து மேட்டுப்பாளையம் வரையிலான சாலையில் போக்குவரத்து நிறுத்தப்பட்டு, கோத்தகிரி வழியாக வாகனங்கள் திருப்பி விடப்பட்டுள்ளன. குன்னூர் பகுதியில் உள்ள கிருஷ்ணா நதியில் வெள்ளம் பெருக்கெடுத்து ஓடுகிறது. அதேபோல், ஓட்டுப்பட்டறை பகுதியில் மரம் விழுந்ததாலும் போக்குவரத்து பாதிக்கப்பட்டுள்ளது.
6 தாலுகாக்களில் பள்ளிகளுக்கு விடுமுறை
இந்தச் சூழலில், பெரிதும் பாதிக்கப்பட்ட உதகமண்டலம், குன்னூர், கோத்தகிரி உள்ளிட்ட ஆறு தாலுகாக்களில் பள்ளிகளுக்கு விடுமுறைஅறிவிக்கப்பட்டுள்ளது.
நீலகிரியில் சுற்றுலாப் பயணிகளுக்குப் பாதுகாப்பு அறிவுறுத்தல்
ஏற்கெனவே, நீலகிரி உள்ளிட்ட பகுதிகளில் மண்சரிவு மற்றும் நிலச்சரிவு ஏற்பட வாய்ப்புள்ளதாகத் தமிழ்நாடு வெதர்மேன் பிரதீப் ஜான் எச்சரித்திருந்தார். இந்நிலையில், நீலகிரியில் பத்துக்கும் மேற்பட்ட இடங்களில் மண்சரிவு ஏற்பட்டிருப்பது கவலையை ஏற்படுத்தியுள்ளது.
அப்பகுதியில் வசிக்கும் மக்கள் பாதுகாப்பாக இருக்குமாறு அறிவுறுத்தப்பட்டுள்ளனர். மேலும், நீலகிரி மாவட்டத்திற்குச் சென்றுள்ள சுற்றுலாப் பயணிகள் உடனடியாகப் பாதுகாப்பான இடங்களுக்குச் செல்லவும், சுற்றுலாப் பயணத்திற்குத் திட்டமிட்டிருந்தவர்கள் தங்களது பயணத்தை ரத்து செய்யவும் அறிவுறுத்தப்பட்டுள்ளது.