பாரா வில்வித்தை: ஷீத்தல் ஜோடி 'தங்கம்'

தாய்லாந்தின் பாங்காக் நகரில், மாற்றுத்திறனாளி நட்சத்திரங்கள் பங்கேற்கும் பாரா உலக வில்வித்தை சீரிஸ் நடக்கிறது. பெண்கள் அணிகளுக்கான ‘காம்பவுண்டு’ பிரிவு பைனலில், இந்தியாவின் ஷீத்தல் தேவி, பாயல் நாக் ஜோடி 150-147 (36-37, 39-36, 37-35, 38-39) என்ற கணக்கில் கஜகஸ்தானின் ஜானத் ஐதிமோவா, ஐசாதா செய்டான் ஜோடியை வீழ்த்தி தங்கம் வென்றது.

ஆண்கள் அணிகளுக்கான ‘காம்பவுண்டு’ பிரிவு பைனலில் இந்தியாவின் தோமன் குமார், ஷியாம் சுந்தர் சுவாமி ஜோடி 153-146 (35-35, 39-39, 40-35, 39-37) என்ற கணக்கில் சீனதைபேயின் சுங்-ஹங் வு, ஜியுன்-கெய் யாங் ஜோடியை வீழ்த்தி தங்கத்தை தட்டிச் சென்றது.

கலப்பு அணிகளுக்கான ‘காம்பவுண்டு’ பிரிவு பைனலில் இந்தியாவின் ஷீத்தல் தேவி, தோமன் குமார் ஜோடி 152-143 (38-35, 38-35. 38-36. 38-37) என்ற கணக்கில் ஜப்பானின் அயா ஷினோஹரா, யுயா ஒய் ஜோடியை வீழ்த்தி தங்கம் வென்றது.

பெண்கள் அணிகளுக்கான ‘ரிகர்வ்’ பிரிவு 3வது இடத்துக்கான போட்டியில் இந்தியாவின் பாவனா, ராஜ்ஸ்ரீ ஜோடி 6-0 (32-11, 32-28, 29-22) என்ற கணக்கில் வெற்றி பெற்று வெண்கலம் கைப்பற்றியது.