இந்தியாவின் உள்கட்டமைப்பு மற்றும் சாலைப் போக்குவரத்துத் துறையில் மற்றொரு பிரம்மாண்ட மைல்கல்லாக, ஆந்திராவின் அடர்ந்த வனப்பகுதி மற்றும் குன்றுகளுக்கு இடையே உருவாகி வரும் பெங்களூரு – கடப்பா – விஜயவாடா புதிய விரைவுச்சாலையின் கட்டுமானப் பணிகள் உலகத் தரத்தில் அதிவேகமாக நடைபெற்று வருகின்றன.
சுற்றுச்சூழல் பாதுகாப்பு மற்றும் வனவிலங்கு நடமாட்டத்தை முன்னிறுத்தி காட்டின் நடுவே அமைக்கப்படும் இந்த சாலையின் நவீன ட்ரோன் காட்சிகள் தற்போது இணையத்தில் வெளியாகி பெரும் வியப்பை ஏற்படுத்தியுள்ளன.
8 மணி நேரமாகக் குறையும் பயண நேரம்
மத்திய அரசின் பாரத்மாலா திட்டத்தின் கீழ், சுமார் 14,000 கோடி ரூபாய் பட்ஜெட்டில் இந்த 6-வழி அதிவேக நெடுஞ்சாலை அமைக்கப்பட்டு வருகிறது. கர்நாடக தலைநகர் பெங்களூருவில் தொடங்கி ஆந்திராவின் சத்யசாய், கடப்பா, பிரகாசம், குண்டூர் வழியாக விஜயவாடாவை இணைக்கும் இந்த சாலையின் மொத்த நீளம் 518 கிலோமீட்டர்கள் ஆகும். இத்திட்டம் முழுமையடையும் போது இரு முக்கிய நகரங்களுக்கு இடையேயான பயண நேரம் 13 மணிநேரத்திலிருந்து வெறும் 8 மணிநேரமாகக் குறையும்.
காடுகளையும் வனவிலங்குகளையும் காக்கும் இரட்டைச் சுரங்கப்பாதை
ஆந்திராவின்கடப்பா மற்றும் நெல்லூர் மாவட்ட எல்லையில் அமைந்துள்ள போருமாமில்லா மற்றும் சீதாராமபுரம் இடையே மிக அடர்ந்த காடுகளும், உயர்ந்த மலைக் குன்றுகளும் அமைந்துள்ளன. வழக்கமாக இது போன்ற இடங்களில் மரங்களை வெட்டி, மலைகளை உடைத்துச் சாலை அமைப்பது வழக்கம். ஆனால், அங்குள்ள வனவிலங்குகளின் வாழ்வாதாரத்திற்கும் இயற்கைக்கும் எவ்வித பாதிப்பும் ஏற்படக் கூடாது என்பதற்காக, இந்திய தேசிய நெடுஞ்சாலை ஆணையம் புதிய தொழில்நுட்பத்தைப் பயன்படுத்தியுள்ளது.
அதன்படி, காட்டின் அடியில் சுமார் 3.68 கிலோமீட்டர் நீளமுள்ள பிரம்மாண்ட இரட்டைச் சுரங்கப்பாதைகள் குடையப்பட்டு வருகின்றன. இந்த சுரங்கப்பாதைக்கான கடினமான அகழ்வாராய்ச்சிப் பணிகள் அனைத்தும் அண்மையில் வெற்றிகரமாக முடிக்கப்பட்டு, தற்போது நவீன தரத்திலான தார்ச்சாலைகள் மற்றும் மின்விளக்குகள் அமைக்கும் இறுதிப் பணிகள் படுவேகமாக நடந்து வருகின்றன.
தமிழகத்திற்கு ஒரு பாடம் – சென்னை டூ சேலம் எக்ஸ்பிரஸ்வே ஒப்பிடு
இந்த திட்டத்தின் அசல் வீடியோ காட்சிகள் சமூக வலைத்தளங்களில் வைரலாகி வரும் நிலையில், “இயற்கையை அழிக்காமல் இப்படியும் நவீன சாலைகளை அமைக்க முடியும்” எனப் பலரும் பாராட்டி வருகின்றனர். குறிப்பாகத் தமிழகத்தில் காடுகள் மற்றும் விவசாய நிலங்கள் பாதிப்படையும் என்ற காரணத்தால் முடங்கிப் போயுள்ள சென்னை – சேலம் 8 வழிச்சாலை திட்டத்தை, இதேபோல நவீன சுரங்கப்பாதைகள் மற்றும் புதிய தொழில்நுட்ப மறுசீரமைப்பு மூலம் ஏன் செயல்படுத்தக் கூடாது என்ற விவாதத்தையும் சமூக ஆர்வலர்கள் தற்பொழுது எழுப்பியுள்ளனர்.
திட்டமிடப்பட்ட இலக்கின்படி, வருகிற 2027 ஆம் ஆண்டுக்குள் இந்த பெங்களூரு – விஜயவாடா எக்ஸ்பிரஸ்வே ஒட்டுமொத்தமாக மக்கள் பயன்பாட்டிற்குத் திறக்கப்படும் என எதிர்பார்க்கப்படுகிறது.