தமிழ்நாடு சட்டப்பேரவை வரும் ஆகஸ்ட் 5ஆம் தேதி கூடுகிறது. அன்றைய தினம் தமிழக வெற்றிக்கழக அரசின் முதல் நிதிநிலை அறிக்கையை நிதி அமைச்சர் மரிய வில்சன் தாக்கல் செய்கிறார். தொடர்ந்து ஆகஸ்ட் 6ஆம் தேதி வேளாண்துறை அமைச்சர் வினோத் வேளாண் பட்ஜெட்டை தாக்கல் செய்ய உள்ளார்.
மானியக் கோரிக்கைகள் மீதான விவாதங்கள் மற்றும் கூட்டத்தொடரின் கால அட்டவணை குறித்து, பட்ஜெட் தாக்கலுக்குப் பிறகு நடைபெறும் அலுவல் ஆய்வுக் குழுக் கூட்டத்தில் முடிவு எடுக்கப்படும் என்று சபாநாயகர் ஜே.சி.டி. பிரபாகர் தெரிவித்தார்.
சட்டப்பேரவை மரபுகளில் மாற்றம் இல்லை
மத்திய அரசு பரிந்துரைத்துள்ள “வந்தே மாதரம்”, தேசியகீதம் மற்றும் “தமிழ்த்தாய் வாழ்த்து” பாடல்கள் குறித்து சட்டப்பேரவையில் ஏதேனும் மாற்றம் இருக்குமா என்ற கேள்விக்கு பதிலளித்த சபாநாயகர், “இதுவரை பின்பற்றப்பட்ட மரபே தொடரும்; புதிய மாற்றம் எதுவும் இல்லை” என்று தெளிவுபடுத்தினார்.
மக்கள் வியக்கும் பட்ஜெட்டாக இருக்கும்
தமிழக வெற்றிக்கழக அரசின் முதல் பட்ஜெட், ஆட்சிக்கு வாக்களித்தவர்களையும் வாக்களிக்காதவர்களையும் வியக்க வைக்கும் வகையில் இருக்கும் என்ற நம்பிக்கையை சபாநாயகர் தெரிவித்தார்.
மேலும், சட்டப்பேரவை நடவடிக்கைகள் முழுமையாக நேரலையில் ஒளிபரப்ப ஏற்பாடுகள் செய்யப்பட்டுள்ளதாகவும் அவர் கூறினார்.
அமைதியான கூட்டத்தொடருக்கு அழைப்பு
சட்டமன்ற உறுப்பினர்கள் தங்கள் கருத்துகளை பதிவு செய்வதோடு மட்டுமல்லாமல், எதிர்க்கட்சியினரின் கருத்துகளையும் கேட்டு ஆரோக்கியமான விவாதத்தில் ஈடுபட வேண்டும் என்று சபாநாயகர் வலியுறுத்தினார்.
இந்த கூட்டத்தொடரும் அமைதியாகவும், ஜனநாயக முறையிலும் நடைபெற வேண்டும் என்பதே தனது விருப்பம் என்றும் தெரிவித்தார்.
மார்க்கண்டேயன் கைது: சபாநாயகர் அனுமதி தேவையில்லை
விளாத்திகுளம் தொகுதி எம்எல்ஏ மார்க்கண்டேயன் கைது செய்யப்பட்டதற்கு முன்பு சபாநாயகரின் அனுமதி பெற வேண்டுமா என்ற கேள்விக்கு, அத்தகைய கட்டாய விதி இல்லை என்று ஜே.சி.டி. பிரபாகர் விளக்கம் அளித்தார்.
எம்எல்ஏ கைது செய்யப்பட்ட விவரத்தை மாவட்ட காவல் கண்காணிப்பாளர் தமக்கு தெரிவித்ததாகவும், 24 மணி நேரத்துக்கு மேல் காவலில் இருந்தால் மற்ற உறுப்பினர்களுக்கும் தகவல் தெரிவிக்கப்படும் என்றும் கூறினார்.
சபாநாயகர் விளக்கமளித்ததாவது:
பேரவை விதி 291-ன் படி, பேரவை வளாகத்திற்குள் சபாநாயகரின் அனுமதியின்றி எந்த உறுப்பினரையும் கைது செய்ய முடியாது. பேரவை விதி 292-ன் படி, பேரவை வளாகத்திற்குள் நீதிமன்ற உத்தரவுகளையும் முன் அனுமதியின்றி அமல்படுத்த முடியாது.ஆனால், பேரவை வளாகத்திற்கு வெளியே அல்லது தனிப்பட்ட இடங்களில் எம்எல்ஏவை கைது செய்ய சபாநாயகரின் முன் அனுமதி தேவையில்லை என்று அவர் தெளிவுபடுத்தினார்.
மார்க்கண்டேயன் பேச்சு குறித்து நடவடிக்கை?
எம்எல்ஏ மார்க்கண்டேயன் பேச்சு தமிழக மக்களிடையே வருத்தம், கோபம் மற்றும் கொந்தளிப்பை ஏற்படுத்தியுள்ளதாக சபாநாயகர் குறிப்பிட்டார்.
அவர் பேசியது குறித்து எழுத்துப்பூர்வமான புகார் அளிக்கப்பட்டால், சட்டப்பேரவை விதிகளின்படி உரிய நடவடிக்கை எடுக்கப்படும் என்றும் தெரிவித்தார்.
அதிமுக எம்எல்ஏக்கள் ராஜினாமா விவகாரம்
அதிமுக முன்னாள் எம்எல்ஏக்கள் அளித்த விளக்கங்கள் எடப்பாடி கே. பழனிசாமிக்கு அனுப்பப்பட்டுள்ளதாகவும், அவரது பதிலை எதிர்பார்த்து விசாரணை தொடர்ந்து நடைபெற்று வருவதாகவும் சபாநாயகர் தெரிவித்தார்.
சட்டமன்ற குழுத் தலைவர் மற்றும் பிற அறிவிப்புகள் கூட்டத்தொடரின் போது வெளியிடப்படும் என்றும் கூறினார்.
முதலமைச்சர் விஜயின் கருத்துக்கு விளக்கம்
கரூரில் நடைபெற்ற நிகழ்ச்சியில், “சட்டப்பேரவையின் கதவுகளை மூடிவிட்டுத்தான் பேச வேண்டும் போல” என்ற முதலமைச்சர் விஜயின் கருத்து குறித்து எழுப்பப்பட்ட கேள்விக்கு பதிலளித்த சபாநாயகர், அதை நேரடி அர்த்தத்தில் எடுத்துக்கொள்ளக் கூடாது என்றார்.
ஆளுநர் உரை….ஸ்கோர் செய்த தவெக?
எதிர்க்கட்சிகள் முன்வைக்கும் குற்றச்சாட்டுகளுக்கு அரசு தரப்பின் விளக்கத்தையும் முழுமையாக கேட்க வேண்டும் என்ற நோக்கில்தான் முதலமைச்சர் அவ்வாறு பேசியிருப்பார் என்று அவர் விளக்கம் அளித்தார்.
Source link