ராயபுரம்: ''அ.தி.மு.க.,வில் பதவி, பொறுப்பு கிடைத்ததால், காலில் விழுந்து ஆசிர்வாதம் வாங்கினேன்; அது தவறில்லை.

ராயபுரம் தொகுதி வேட்பாளர் ஜெயகுமார், துறைமுகம் தொகுதி வேட்பாளர் ராயபுரம் மனோவை ஆதரித்து அ.தி.மு.க., பொதுச்செயலர் பழனிசாமி, வண்ணாரப்பேட்டை, கல்மண்டபம் சாலையில் பிரசாரம் செய்தார்.

அப்போது, அவர் பேசியதாவது:

எங்களை ஆளாக்கியவர்கள் எம்.ஜி.ஆர்., – ஜெயலலிதா தான். நாங்கள் அவர்களது காலில் விழுந்து ஆசிர்வாதம் வாங்குவதில் என்ன தவறு உள்ளது.

அ.தி.மு .க., பதவி, பொறுப்பு கிடைத்ததால் காலில் விழுந்து ஆசிர்வாதம் வாங்கினேன்; அது தவறில்லை. ஆசிர்வாதம் வாங்குவது தமிழர்களின் பண்பு.

உதயநிதி, உங்கள் தாத்தா கருணாநிதி, அப்பா ஸ்டாலின் முதல்வராக இருந்தவர்கள்; உங்களுக்கு வசதி, வாய்ப்பு இருக்கிறது. நாங்கள் கட்சியில் அடிமட்டத்தில் இருந்து படிப்படியாக உழைத்து, முன்னேறி பெரிய பதவிக்கு வந்துள்ளோம். அந்த வலி எனக்கு தெரியும்.

கட்சிக்காக 51 ஆண்டுகளாக உழைத்திருக்கிறேன். கட்சி அறிவித்த போராட்டங்களில் பங்கேற்று 7 முறை சிறை சென்றிருக்கிறேன். நாங்கள் மக்களுக்காக போராட்டம் செய்து சிறை சென்றோம்; நீங்கள் ஊழல் செய்து சிறை சென்றீர்கள்.

அ.தி.மு.க., இப்போது ‘அமித்ஷா. தி.மு.க., வாகி விட்டது’ என பேசுகின்றனர். நாட்டின் உள்துறை அமைச்சரை பார்க்க செல்வது தவறா; ஏன் அலறுகின்றனர்; பதறுகின்றனர். ஏனென்றால் தி.மு.க.,வினர் ஊழல் அதிகளவில் செய்துள்ளனர். தி.மு.க., மக்களின் செல்வாக்கை இழந்து விட்டது. அதனால் பதறுகிறது. இந்த தேர்தலில் தோல்வி ஜூரம் தி.மு.க.,வை ஒட்டி கொண்டது.

சென்னை மேயர் பொம்மையாக உள்ளார்; தகுதியான, திறமையான மேயர் இல்லை. அவர்களை பயன்படுத்தி, தி.மு.க.,வினர் கொள்ளையடித்து வருகின்றனர். தி.மு.க., அரசு கழிப்பறையை கூட விட்டு வைக்காமல் ஊழல் செய்து வருகிறது.

இவ்வாறு அவர் பேசினார்.