வாஷிங்டன்: ஈரான் மீதான தாக்குதல் குறித்து ரஷ்யா அதிபர் புடின் மற்றும் அமெரிக்க அதிபர் டிரம்ப் போனில் பேச்சுவார்த்தை நடத்தினர். இது குறித்து அதிபர் டிரம்ப் கூறியதாவது: நான் அதிபர் புடினுடன் போனில் பேச்சுவார்த்தை நடத்தினேன். நாங்கள் முடிவில்லாத சண்டை உக்ரைனைப் பற்றிப் பேசினோம்.
மத்திய கிழக்கு ஆசியாவில் நிலவும் பதற்றம் பற்றிப் பேசினோம். அவர் உதவியாக இருக்க விரும்புகிறார். உக்ரைன்-ரஷ்யா போரை முடிவுக்குக் கொண்டுவருவதன் மூலம் நீங்கள் இன்னும் உதவியாக இருக்க முடியும் என்று நான் சொன்னேன். அது மிகவும் உதவியாக இருக்கும். இவ்வாறு டிரம்ப் கூறினார்.
பாதுகாப்பாக இருக்கும்!
மேலும் நிருபர்களிடம் அதிபர் டிரம்ப் கூறியதாவது: ஹார்முஸ் ஜலசந்தி பாதுகாப்பாக இருக்கும். எங்களிடம் நிறைய கடற்படைக் கப்பல்கள் உள்ளன. கண்ணிவெடிகளை ஆய்வு செய்யும் உலகின் சிறந்த உபகரணங்கள் எங்களிடம் உள்ளன. அவர்களின் பெரும்பாலான கப்பல்கள் கடலின் அடிப்பகுதியில் உள்ளன.
ஒரு பயங்கரவாத ஆட்சி உலகின் எண்ணெய் விநியோகத்தை நிறுத்த முயற்சிக்க நான் அனுமதிக்க மாட்டேன்.
ஈரான் அதற்காக ஏதாவது செய்தால், அவர்கள் கடுமையாக தாக்கப்படுவார்கள். நாங்கள் தாக்குதல் நடத்தவில்லை என்றால், அவர்கள் நம் மீது தாக்குதல் நடத்தி இருப்பார்கள். அவர்கள் தயாராக இருந்தனர். அவர்களிடம் ஏவுகணைகள் அனைத்தும் யாரும் நினைத்ததை விட மிக அதிகமாக இருந்தன.
80 சதவீதம்
ஈரானிடம் இருந்த ஏவுகணைகளில் 80 சதவீதத்தை நாங்கள் இப்போது அழித்துவிட்டோம். அவர்களிடம் இப்போது மிகச் சில ஏவுதளங்களே எஞ்சியுள்ளன. நமது ராணுவம் சாதித்திருப்பது உண்மையிலேயே பிரமிக்கத்தக்கது. இஸ்ரேல் உடன் இணைந்து, தொழில்நுட்பத் திறமையையும் ராணுவ வலிமையையும் அபாரமாக வெளிப்படுத்தி, எதிரிகளை நாம் நசுக்கி வருகிறோம்.
ஈரானின் ஆளில்லா விமானங்கள் மற்றும் ஏவுகணைத் திறன்கள் முழுமையாகத் தகர்க்கப்பட்டு வருகின்றன. அவர்களின் கடற்படை முற்றிலுமாக அழிந்துவிட்டது; அனைத்தும் இப்போது கடலின் அடியில் மூழ்கிக் கிடக்கின்றன. நாம் எதிரிகளின் 46 கப்பல்களைச் செயலிழக்கச் செய்துள்ளோம்.
மகத்தான நாடு
ஈரானின் பயங்கரவாதத் தலைவர்கள் ஒழிக்கப்பட்டுவிட்டனர். எஞ்சியிருக்கும் தலைவர்களும் எப்போது ஒழிக்கப்படுவார்கள் என்பதற்கான நிமிடங்களை நாம் எண்ணிக்கொண்டிருக்கிறோம். எதிரிகள் முழுமையாகவும் தீர்க்கமாகவும் தோற்கடிக்கப்படும் வரை நாம் ஓயமாட்டோம். பல வழிகளில் நாம் ஏற்கனவே வெற்றி பெற்றுவிட்டோம்; இருப்பினும், அந்த வெற்றி இன்னும் முழுமை பெறவில்லை.
நீண்ட காலமாக நீடித்து வரும் இந்த ஆபத்தை ஒரே அடியாக முடிவுக்குக் கொண்டு வர அதிக உறுதியுடன் செயல்படுவோம். அமெரிக்க அதிபர்களின் வரலாற்றிலேயே, எனது முதல் ஆண்டுப் பதவிக்காலம்தான் மிகச்சிறந்ததாக அமைந்தது; இந்தச் சாதனையில் உங்கள் பங்கும் அடங்கியுள்ளது. உங்கள் உதவியுடனும் கடின உழைப்புடனும், நாம் அமெரிக்காவை மீண்டும் மகத்தான நாடாக மாற்றிக்கொண்டிருக்கிறோம்.
பிரமிக்கத்தக்கது
நாம் நினைத்ததை விட மிக விரைவாகவே இதைச் சாதித்து வருகிறோம். இப்போது அமெரிக்கா முன்பை விடச் சிறப்பானதாகவும் வலிமையானதாகவும் திகழ்கிறது; யாரும் கற்பனை செய்து பார்க்காத ஒரு உயர்ந்த நிலையை நாம் எட்டியுள்ளோம்.
சில தீய சக்திகளை ஒழிப்பதற்காக, நாம் ஒரு சிறிய ராணுவ நடவடிக்கையை மேற்கொண்டோம்.
அது அவசியமானது என்று நாம் உணர்ந்ததாலேயே அதைச் செய்தோம். அந்த நடவடிக்கை மிகக் குறுகிய காலத்திற்கு மட்டுமே நீடிக்கும் என்பதை நீங்களே விரைவில் உணர்வீர்கள் என்று நான் நம்புகிறேன். இவ்வாறு அதிபர் டிரம்ப் கூறினார்.