போருக்கான பதற்ற சூழல் உருவானபோது, தினம் ஒரு உச்சத்தை தொட்டுக்கொண்டிருந்த தங்கத்தின் விலை. அப்போது பாதுகாப்பான ஒரு முதலீடாக தங்கம் கருதப்பட்டதால், அதன் விலை அதிகரித்தது. ஆனால், இப்போது நிலைமை தலைகீழாக இருக்கிறது. போர் நடந்துகொண்டிருக்கிறது. பல நாடுகள் தவிக்கின்றன. பாதுகாப்பான முதலீடாக கூறப்பட்ட தங்கம் விலை உயரவில்லை. ஏன் இந்த முரண்பாடு?
இப்படி ஒரு கேள்வி முதலீட்டாளர்கள் பலருக்கு எழுந்திருக்கும். ஆனால், கேள்வி எழுப்புவதற்கு முன் நாம் அதன் விலை நகர்வை கவனிக்க வேண்டியிருக்கிறது. போர் துவங்குவதற்கு முன்பே தங்கம் விலை பெரிதும் உயர்ந்திருந்தது.
2025ம் ஆண்டில் தங்கம் விலை கிட்டத்தட்ட 65 சதவீதம் உயர்ந்த நிலையில், 2026 துவக்கத்தில் மேலும் 20 சதவீதத்துக்கும் மேல் உயர்ந்தது. கடந்த ஜனவரி 28ம் தேதி அன்று சர்வதேச சந்தையில் தங்கம் ஒரு அவுன்ஸ் (31.10 கிராம்) 5,418 டாலர் என்ற புதிய உச்சத்தை எட்டியது.
பிறகு, விலை மெல்ல சரிவடைந்து குறுகிய வரம்பில் நகர துவங்கியது. பிப்ரவரி 27ம் தேதி விலை தங்கம் கிட்டத்தட்ட 5,244 டாலராக இருந்த நிலையில், மார்ச் முதல் வாரத்தில் அது 5,120 டாலர் அளவுக்கு குறைந்தது.