மத்திய அரசு ஊழியர்களுக்கான அகவிலைப்படி உயர்வு தள்ளிப் போய்க்கொண்டே இருப்பதால் தீபாவளி பண்டிகை சமயத்தில் தீபாவளி பரிசாகக் கிடைக்கும் என்று எதிர்பார்க்கப்படுகிறது.
மத்திய அரசு ஊழியர்களின் காத்திருப்பு தொடர்ந்துகொண்டே இருக்கிறது. இப்போது ஜூலை மாதம் முடியப் போகிறது. ஆனால் மத்திய அரசு இன்னும் அகவிலைப்படி உயர்வு குறித்த அதிகாரப்பூர்வ அறிவிப்பை வெளியிடவில்லை. இந்த முறை அகவிலைப்படி எப்போது தங்கள் வங்கிக் கணக்குகளில் வரவு வைக்கப்படும் என்பதை அறிய அரசு ஊழியர்கள் ஆவலாக உள்ளனர். இதன் விளைவாக 50 லட்சம் மத்திய அரசு ஊழியர்களும், 65 லட்சத்திற்கும் அதிகமான ஓய்வூதியதாரர்களும் அரசின் அடுத்த முடிவை ஆவலுடன் எதிர்பார்த்துக் காத்திருக்கின்றனர்.
அதிகரித்து வரும் பணவீக்கச் சூழலில் 1 கோடிக்கும் அதிகமான மத்திய அரசு ஊழியர்கள் தங்கள் சம்பளம் மற்றும் ஓய்வூதிய உயர்வுக்காகக் காத்திருக்கின்றனர். ஜூலை மாதத்தில் அறிவிப்பு வெளியாகாவிட்டால் அகவிலைப்படி உயர்வு குறித்த செய்தி எப்போது வரும் என்பதே இப்போது உள்ள மிகப் பெரிய கேள்வியாக இருக்கிறது. இந்த ஆண்டு அரசு ஊழியர்களின் வருமானத்தில் நேரடி தாக்கத்தை ஏற்படுத்தக்கூடிய அகில இந்திய நுகர்வோர் விலைக் குறியீட்டின் (AICPI) மதிப்பீட்டு புள்ளிவிவரங்கள் மற்றும் அரசின் கடந்தகால நடைமுறைகள் எப்படி இருந்தது என்று இங்கே பார்க்கலாம்.
அகவிலைப்படி உயர்வு குறித்த முடிவு ஏன் தாமதமாகிறது?
அகவிலைப்படி உயர்வு குறித்த இறுதி முடிவு ஜூன் மாதத்திற்கான தொழிலாளர்களுக்கான அகில இந்திய நுகர்வோர் விலைக் குறியீடு தரவுகளைப் பொறுத்தே அமையும். ஜூன் மாதத்திற்கான தரவுகள் இன்னும் வெளியிடப்படாததே அரசு புதிய அகவிலைப்படியை இறுதி செய்யாததற்குக் காரணமாகும். இருப்பினும், அதிகாரப்பூர்வ தரவுகள் வெளியாவதில் ஏற்பட்டுள்ள இந்தச் சிறிய தாமதம் ஒரு கேள்வியை எழுப்பியுள்ளது. ஜூலை மாதத்தில் அறிவிப்பு வெளியாகாவிட்டால் அரசு இந்த முக்கிய சலுகைக்கு எந்த மாதத்தில் ஒப்புதல் அளிக்கும் என்ற கேள்வி இருக்கிறது.
அகவிலைப்படி எவ்வளவு அதிகரிககும்?
இதுவரை வெளியிடப்பட்ட AICPI-IW தரவுகளின் அடிப்படையில் இந்த முறை அகவிலைப்படியில் 3 சதவீதம் முதல் 4 சதவீதம் வரை உயர்வு இருக்கும் என்று எதிர்பார்க்கப்படுகிறது. இந்த குறியீட்டு எண் மார்ச் மாதத்தில் 149.1 ஆகவும், ஏப்ரலில் 149.9ஆகவும், மே மாதத்தில் 150.8 ஆகவும் இருந்தது. ஜூன் மாதத்தில் இது சுமார் 151.7 புள்ளியை எட்டும் என்று கணிக்கப்பட்டுள்ளது. ஜூன் மாதத்திற்கான அதிகாரப்பூர்வ தரவுகள் மற்றும் அரசின் ஒப்புதலுக்குப் பிறகே இறுதி முடிவு எடுக்கப்படும் என்றாலும், இந்த முறை அகவிலைப்படி 3 சதவீதம் முதல் 4 சதவீதம் வரை அதிகரிக்க வாய்ப்புள்ளது.
ஜூலை மாதத்தில் அறிவிப்பு வெளியாகாவிட்டால் எப்போது அறிவிப்பை எதிர்பார்க்கலாம்?
இந்த மாதம் அகவிலைப்படி உயர்வு அறிவிக்கப்படாவிட்டாலும் அரசு ஊழியர்களும் ஓய்வூதியதாரர்களும் நீண்ட காலம் காத்திருக்க வேண்டியதில்லை. கடந்த இரண்டு ஆண்டுகளைப் போலவே, பண்டிகைக் காலமான அக்டோபர் அல்லது நவம்பர் மாதங்களில் அரசு அகவிலைப்படி உயர்வை அறிவிக்க வாய்ப்புள்ளது. இந்த ஆண்டு தீபாவளி நவம்பர் மாதத்தில் வருவதால் இது ஊழியர்களுக்கு ஒரு தீபாவளிப் பரிசாக இருக்கும்.
யாருக்கெல்லாம் பலன் கிடைக்கும்?
அகவிலைப்படி உயர்வு என்பது 50 லட்சம் மத்திய அரசு ஊழியர்களுக்கும், 65 லட்சத்திற்கும் அதிகமான ஓய்வூதியதாரர்களுக்கும் நேரடியாகப் பயனளிக்கும். இதில் ரயில்வே, பாதுகாப்புத் துறை மற்றும் பிற மத்திய அரசுத் துறைகளின் ஊழியர்கள் மற்றும் ஓய்வூதியதாரர்கள் அடங்குவர். வெவ்வேறு ஊதிய நிலைகளில் உள்ள ஊழியர்கள் தங்கள் அடிப்படைச் சம்பளத்தின் அடிப்படையில் பலன்களைப் பெறுவார்கள்.
அகவிலைப்படி உயர்வால் சம்பளத்தில் என்ன தாக்கம் ஏற்படும்?
அகவிலைப்படி என்பது ஊழியர்களின் அடிப்படைச் சம்பளத்தின் ஒரு பகுதியாகும். அகவிலைப்படி உயர்வு என்பது கையில் கிடைக்கும் சம்பளத்தை மட்டுமல்லாமல், வருங்கால வைப்பு நிதி, ஓய்வூதியம், பணிக்கொடை மற்றும் பிற படிகளையும் பாதிக்கிறது. தற்போது அகவிலைப்படி 60 சதவீதமாக உள்ளது. முன்னதாக, ஏப்ரல் மாதம், ஜனவரி 1 முதல் அமலுக்கு வரும் வகையில் அரசு இதை 58 சதவீதத்தில் இருந்து 60 சதவீதமாக உயர்த்தியது.
அகவிலைப்படி உயர்வு எவ்வாறு தீர்மானிக்கப்படுகிறது?
7ஆவது ஊதியக் குழுவின் பரிந்துரைகளின்படி, AICPI-IW புள்ளி விவரங்களின் 12 மாத சராசரியின் அடிப்படையில் அகவிலைப்படி கணக்கிடப்படுகிறது. அரசு ஆண்டுக்கு இருமுறை, அதாவது ஜனவரி மற்றும் ஜூலை மாதங்களுக்காக அகவிலைப்படியை மாற்றியமைக்கிறது. இருப்பினும், இதற்கான அறிவிப்பு வழக்கமாக மார்ச் மற்றும் அக்டோபர் மாதங்களில் வெளியிடப்படுகிறது.
Source link