பகவந்த் கேசரி கதையை அப்படியே வைத்திருக்கிறார் இயக்குநர் ஹெச். வினோத். தான் சிறையில் இருந்த போது உதவி செய்த போலீஸ் அதிகாரியின் மகள் விஜியை(மமிதா பைஜு) தன் சொந்த மகள் போன்று வளர்த்து வருகிறார் தளபதி வெற்றி கொண்டான்(விஜய்). விஜியை அவரின் அப்பா ஆசைப்பட்டது போன்று ராணுவத்தில் சேர்க்க முயற்சி செய்கிறார். ஆனால் தான் சிறுமியாக இருந்தபோது நடந்த சம்பவத்தால் பயம் பயம் என பயப்படுகிறார் விஜி. வளர்ப்பு மகளை பயத்தில் இருந்து விடுவிடுக்க தளபதி போராடுகிறார். இதற்கிடையே வில்லன் ஜான் ஹிம்லரோ(பாபி தியோல்) நாட்டில் பிரச்சனையை உருவாக்க நினைக்கிறார். படத்தின் முதல் பாதி விறுவிறுப்பாக செல்கிறது.
ஆனால் இரண்டாம் பாதி வேறு மாதிரி இருக்கிறது. வளர்ப்பு அப்பா, மகள் பாசம் ஓரங்கட்டப்பட்டு, சமூகம், நாடு என வேறு பக்கம் திரும்புகிறது கதை. அது நம்பும்படியாகவும் இல்லை. கேசரி செய்து கொண்டிருக்கும்போதே அதில் இனிப்புக்கு பதில் மசாலாவை கலந்தது மாதிரி இருக்கிறது.
கள்ளச்சாராய பிரச்சனை, தூத்துக்குடி துப்பாக்கிச்சூடு, அரசியலில் ஊழல், மத பிரச்சனை, சுற்றுச்சூழல் பாதிப்பு, துப்பாக்கி கலாச்சாரம் என பில பிரச்சனைகளை பேசுகிறது படம். டக்கு டக்குனு அந்த பிரச்சனைகளை காட்டி முடிப்பதால் அதில் வரும் கதாபாத்திரங்கள் மனதில் நிற்கவில்லை. ஆனால் அதையும் தாண்டி தனியாக தெரிகிறார் விஜய். அவரின் நடிப்பு சின்சியராக உள்ளது. அனிருத்தின் இசை ஜனநாயகனுக்கு பலம். இருப்பினும் விஜய்யின் கடைசி படம் இது என்பதால் இன்னும் சிறப்பாக இருந்திருக்கலாமே என்றே தோன்றுகிறது.
பகவந்த் கேசரி ரீமேக் என்றதுமே உங்களுக்கு வேறு படமே கிடைக்கவில்லையாணா என விஜய்யிடம் அவரின் தீவிர ரசிகர்கள் கேட்டார்கள். தனக்கு கொடுத்த வேலையை வினோத் சரியாக செய்திருந்தாலும் கூட ஜனநாயகன் படம் அதுவும் விஜய்யின் கடைசி படம் இப்படியா இருக்க வேண்டும் என்று தியேட்டருக்கு செல்பவர்களை ஏமாற்றம் அடைய வைத்திருக்கிறது.
எப்படி இருந்தாலும் எங்களுக்கு பிடித்திருக்கிறது. அவரை கடைசியாக திரையில் பார்த்ததே பெரிய விஷயம். இனியும் விஜய்ணாவை பார்க்க முடியாதே என்கிற வருத்தத்தில் கண்ணீர் வருகிறது. தியேட்டரை விட்டு வெளியே வரும்போது அழாமல் இருக்க முடியவில்லை என்கிறார்கள் விஜய் ரசிகர்கள்.
ஜனநாயகனின் முதல் பாதியில் 50 சதவீதமும், இரண்டாம் பாதியில் 20 சதவீதமும் பகவந்த் கேசரி தான் என்றார் ஹெச். வினோத். இந்நிலையில் அந்த 50 சதவீத கேசரி நன்றாக இருக்கிறது என்று மக்கள் தெரிவித்துள்ளனர்.
ஜனநாயகன் படத்தை விஜய் ரசிகர்கள் மட்டும் அல்ல அமைச்சர்களும் தியேட்டர்களில் பார்த்து கண்ணீர் சிந்தியிருக்கிறார்கள். அதிலும் அமைச்சர் பர்வேஸ் பயங்கரமாக அழ, அதை அவரை சுற்றி நின்று கொண்டிருந்தவர்கள் எல்லாம் வீடியோ எடுக்க அது தான் சோஷியல் மீடியாவில் இன்று ஹைலைட்டாகிவிட்டது.
இதற்கிடையே விஜய்க்கு ராசியான ஹீரோயின்களான த்ரிஷா கிருஷ்ணன், கீர்த்தி சுரேஷ் ஆகியோர் தியேட்டருக்கு வந்து ஜனநாயகன் படம் பார்த்துவிட்டு சென்றார்கள் என்பது குறிப்பிடத்தக்கது.