தமிழக முதல்வரும் நடிகருமான தளபதி விஜய் நடித்துள்ள ‘ஜன நாயகன்’ திரைப்படம் உலகம் முழுவதும் திரையரங்குகளில் வெளியாகி ரசிகர்களிடையே மிகப்பெரிய வரவேற்பைப் பெற்றுள்ளது. ரிலீஸ்க்கு முன்பே இந்தப் படம் ஆன்லைன் டிக்கெட் முன்பதிவில் 10 லட்சத்திற்கும் அதிகமான டிக்கெட்டுகள் விற்பனையாகி, விஜயின் திரைப்பயணத்தில் மேலும் ஒரு வரலாற்றுச் சாதனையை பதிவு செய்துள்ளது.
முதல் காட்சி தொடங்குவதற்கு முன்பே இந்த மாபெரும் சாதனையை ‘ஜன நாயகன்’ எட்டியது. இதனால் தமிழகம் மட்டுமின்றி இந்தியாவின் பல்வேறு மாநிலங்களிலும் விஜய் ரசிகர்கள் உற்சாகக் கொண்டாட்டத்தில் ஈடுபட்டனர். படத்தின் மீது ரசிகர்கள் வைத்திருந்த மிகப்பெரிய எதிர்பார்ப்பை இந்த சாதனை வெளிப்படுத்தியுள்ளது.
முன்னதாக ‘வாரிசு’, ‘தி கிரேட்டஸ்ட் ஆஃப் ஆல் டைம் (கோட்)’ ஆகிய படங்களைத் தொடர்ந்து, ‘ஜன நாயகன்’ திரைப்படமும் வெளியீட்டுக்கு முன்பே 10 லட்சத்திற்கும் அதிகமான டிக்கெட் முன்பதிவுகளைப் பெற்றுள்ளது. இதன் மூலம், ஒரே ஆன்லைன் டிக்கெட் முன்பதிவு தளத்தில் தொடர்ந்து மூன்று படங்களுக்கு 10 லட்சத்துக்கும் அதிகமான முன்பதிவுகளைப் பெற்ற முதல் இந்திய நடிகர் என்ற புதிய சாதனையை விஜய் படைத்துள்ளார்.
இந்த தகவல் சமூக வலைத்தளங்களில் வேகமாக பரவி, ரசிகர்கள் விஜயின் தொடர்ச்சியான பாக்ஸ் ஆபிஸ் வெற்றிக்கும், அவரது அபாரமான ரசிகர் பட்டாளத்திற்கும் பாராட்டு தெரிவித்து வருகின்றனர். ‘ஜன நாயகன்’ திரைப்படம் வெளியாகும் முன் பல்வேறு சவால்களை எதிர்கொண்டது. தணிக்கை தொடர்பான சிக்கல்கள் மற்றும் சட்டரீதியான பிரச்சினைகள் காரணமாக படத்தின் வெளியீடு தாமதமானது. மேலும், படம் வெளியாகும் முன்பே சட்டவிரோதமாக இணையத்தில் கசிந்தது படக்குழுவுக்கு அதிர்ச்சியை ஏற்படுத்தியது.
இருப்பினும், இந்த அனைத்து தடைகளையும் மீறி படம் பிரம்மாண்டமான தொடக்கத்தைப் பெற்றுள்ளது. பல்வேறு இடங்களில் திரையரங்குகள் ரசிகர்களால் நிரம்பி வழிந்ததுடன், பட்டாசு வெடித்து, பாலாபிஷேகம் செய்து ரசிகர்கள் உற்சாகமாக கொண்டாடினர். அரசியலில் கால் பதித்து முதல்வராக இருக்கும் விஜய் நடிப்பில் வெளியான கடைசி திரைப்படம் ‘ஜன நாயகன்’ என்பதால், ரசிகர்களிடையே தனித்துவமான எதிர்பார்ப்பை உருவாக்கி இருந்தது.
இயக்குநர் எச். வினோத் இயக்கியுள்ள இந்தப் படத்தில் பூஜா ஹெக்டே, பாபி தியோல், பிரகாஷ் ராஜ், பிரியாமணி, மமிதா பைஜு, கௌதம் வாசுதேவ் மேனன் மற்றும் நரேன் உள்ளிட்டோர் முக்கிய கதாபாத்திரங்களில் நடித்துள்ளனர். அனிருத் ரவிச்சந்தர் இசையமைத்துள்ளார். படம் குறித்து வெளியான ஆரம்பகட்ட விமர்சனங்களின்படி, முதல் பாதி விறுவிறுப்பான வணிகத் திரைப்படமாக அமைந்துள்ளதாக கூறப்படுகிறது.
முன்னாள் காவல் அதிகாரியான தளபதி வெற்றி கொண்டன் (விஜய்), தன்னுடைய பாதுகாப்பில் இருக்கும் விஜி (மமிதா பைஜு) என்ற இளம்பெண்ணை ராணுவ வீராங்கனையாக மாற்ற வேண்டும் என்ற வாக்குறுதியை நிறைவேற்ற போராடுகிறார். அதே நேரத்தில், இந்தியாவில் உள்நாட்டுக் கலவரத்தை ஏற்படுத்தும் நோக்கத்துடன் வரும் வில்லன் ஜான் ஹிம்லர் (பாபி டியோல்) கதையில் புதிய திருப்பத்தை ஏற்படுத்துகிறார்.
வெளியீட்டுக்கு முன்பே பல சாதனைகளைப் படைத்துள்ள ‘ஜன நாயகன்’, தற்போது உலகம் முழுவதும் திரையரங்குகளில் வெற்றிகரமாக ஓடிவருகிறது. இந்தப் படம் பாக்ஸ் ஆபிஸில் மேலும் என்னென்ன சாதனைகளை படைக்கும் என்ற எதிர்பார்ப்பு ரசிகர்கள் மத்தியில் அதிகரித்துள்ளது.