நீங்கள் இந்தியாவில் உள்ள டீக்கடையில் யு.பி.ஐ மூலம் பணம் செலுத்துவது போலவே, வெளிநாட்டிலும் எளிதாகப் பணம் செலுத்த வேண்டும் என்று ஆசைப்பட்டிருக்கிறீர்களா? உங்களுக்கு தான் இந்த நற்செய்தி. இந்தியாவின் யு.பி.ஐ தளத்தை, ஸ்பெயின் நாட்டின் உடனடிப் பணப்பரிவர்த்தனை அமைப்பான ‘பிஸம்’ (Bizum) உடன் இணைப்பது குறித்துப் பேச்சுவார்த்தைகளை விரைவுபடுத்த இந்தியாவும் ஸ்பெயினும் ஒப்புக்கொண்டுள்ளன. இந்திய மத்திய வர்த்தகம் மற்றும் தொழில் துறை அமைச்சர் பியூஷ் கோயலின் சமீபத்திய ஸ்பெயின் பயணத்தின் போது இந்த முக்கிய முடிவு எடுக்கப்பட்டது.
14,000 நீச்சல் குளங்களை நிரப்பும் ஆசிட் ஏரி… வானம் மாதிரி இருக்கும்; கிட்ட போனா காணாம போய்ருவீங்க
உண்மையில் அங்கு என்ன நடக்கிறது?
யு.பி.ஐ- பிஸம் இணைப்பு குறித்து வணிக ரீதியிலான ஒப்பந்தமோ, சோதனை முயற்சியோ அல்லது அதிகாரப்பூர்வ தேதியோ இன்னும் அறிவிக்கப்படவில்லை.
தற்போது இரு நாடுகளுக்கும் இடையே ஆரம்பக்கட்டத் தொழில்நுட்ப விவாதங்கள் மட்டுமே தொடங்கப்பட்டுள்ளன. எனவே, நாளைக்கே பார்சிலோனாவிற்குச் சென்று கி.யூ.ஆர் (QR) கோடை ஸ்கேன் செய்து பணம் செலுத்திவிட முடியாது.
இந்த இணைப்பு நபர்க்கு நபர் பரிவர்த்தனைகளுக்கு மட்டுமா அல்லது சில்லறை விற்பனை மற்றும் பெரிய அளவிலான அந்நியச் செலவாணி மாற்றங்களுக்கும் பொருந்துமா என்பது இன்னும் முடிவு செய்யப்படவில்லை.NPCI இன்டர்நேஷனல் மற்றும் ‘பிஸம்’ கூட்டமைப்பு ஆகியவை இது குறித்துத் தொடர்ந்து ஆலோசித்து வருகின்றன. இதேபோன்ற ஆரம்பக்கட்டப் பணிகள் கத்தார், மாலத்தீவு மற்றும் இந்தியா போஸ்ட் – NPCI வாயிலாகப் பணப்பரிமாற்ற ஒப்பந்தங்களுக்காகவும் மேற்கொள்ளப்பட்டு வருகின்றன.
தற்போது யு.பி.ஐ செயலில் உள்ள 10 உலக நாடுகள்
ஸ்பெயினுடன் பேச்சுவார்த்தை மட்டுமே நடந்து வரும் வேளையில், உலகளவில் ஏற்கனவே 10 நாடுகளில் இந்தியாவின் யு.பி.ஐ சேவை வெற்றிகரமாகச் செயல்பட்டு வருகிறது.
- சிங்கப்பூர்
- ஐக்கிய அரபு அமீரகம்
- பிரான்ஸ்
- மொரீஷியஸ்
- நேபாளம்
- பூடான்
- இலங்கை
- கத்தார்
- கம்போடியா
- கிரீஸ்
இந்தப் பிராந்தியங்களில், இந்தியப் பயணிகள் வழக்கம்போல வணிகர்களின் கியூ.ஆர் கோடை சுலபமாக ஸ்கேன் செய்து, தங்களது இந்திய வங்கிச் கணக்கிலிருந்தே பணம் செலுத்த முடியும்.
முக்கிய நாடுகளின் சிறப்பம்சங்கள்
சிங்கப்பூர் & அமீரகம் : ஆரம்பத்திலேயே யு.பி.ஐ-யை ஏற்றுக்கொண்ட முன்னணி நாடுகள். குறிப்பாக அமீரகத்தில் ‘துபாய் டியூட்டி ஃபிரீ’ (Dubai Duty Free) மற்றும் ‘லூலூ ஹைப்பர்மார்க்கெட்’ (Lulu Hypermarket) போன்ற பிரபல வணிக நிறுவனங்களில் யு.பி.ஐ மூலம் கட்டணம் செலுத்தலாம்.
பிரான்ஸ் : யூரோ மண்டலத்திற்குள் யு.பி.ஐ கால்பதித்த முதல் முக்கிய நாடு பிரான்ஸ் ஆகும். ஈபிள் கோபுரம் போன்ற சுற்றுலாத் தலங்களில் இந்தியப் பயணிகள் கரன்சி மாற்றும் கவலையின்றி யு.பி.ஐ பயன்படுத்த முடிகிறது.
அண்டை நாடுகள் (நேபாளம், பூடான், இலங்கை, மொரீஷியஸ்): அதிக அளவிலான சுற்றுலா மற்றும் பணப் பரிமாற்றம் காரணமாக இவை இயல்பாகவே யு.பி.ஐ-யின் முதன்மைப் பங்காளிகளாக மாறின.
கத்தார், கம்போடியா & கிரீஸ்: இவை சமீபத்தில் இணைந்த நாடுகள். யு.பி.ஐ சேவை இந்திய அண்டை நாடுகளைத் தாண்டி வளைகுடா, தென்கிழக்கு ஆசியா மற்றும் ஐரோப்பாவிலும் வேகமாகப் பரவி வருவதை இது காட்டுகிறது.