இன்றைய காலக் கட்டத்தில் யு.பி.ஐ., என்.இ.எஃப்.டி., ஆர்.டி.ஜி.எஸ்., ஐ.எம்.பி.எஸ். (UPI, NEFT, RTGS, IMPS) போன்ற டிஜிட்டல் பரிவர்த்தனைகளைப் பயன்படுத்தாதவர்களே இல்லை எனலாம். ஆனால், இந்த வழிகளில் அதிகளவில் பணம் அனுப்பினாலோ அல்லது பெற்றாலோ வருமான வரித் துறையிடமிருந்து நோட்டீஸ் வருமா? என்ற பயம் பலருக்கும் உள்ளது.
இது குறித்து Tax2win நிறுவனத்தின் தலைமைச் செயலதிகாரியும் பட்டயக் கணக்காளருமான (CA) அபிஷேக் சோனி தி எகானாமிக் டைம்ஸ் நாளிதழுக்கு அளித்துள்ள தெளிவான விளக்கம் இதோ:
யு.பி.ஐ. பயன்படுத்தினாலே நோட்டீஸ் வருமா?
இல்லை! நீங்கள் யு.பி.ஐ., ஆர்.டி.ஜி.எஸ். (UPI, NEFT, RTGS, IMPS) ஆகிய எந்த முறையைப் பயன்படுத்தி பணத்தைப் பரிமாறினாலும், அந்த “முறையை” (Payment Mode) அடிப்படையாகக் கொண்டு வருமான வரித் துறை நோட்டீஸ் அனுப்புவதில்லை. அவை வெறும் பணப் பரிமாற்ற ஊடகங்கள் மட்டுமே.
வருமான வரித் துறை முக்கியமாக கவனிப்பது ஒன்றுதான்:
உங்கள் வங்கிக் கணக்கிற்கு வரும் பணம், நீங்கள் தாக்கல் செய்யும் வருமான வரி அறிக்கைக்கு (ITR) பொருந்துகிறதா?
நீங்கள் காட்டும் வருமானத்திற்கும், உங்கள் கணக்கில் நடக்கும் பரிவர்த்தனைகளுக்கும் அதிக இடைவெளி அல்லது முரண்பாடு இருக்கும்போது மட்டுமே நோட்டீஸ் அனுப்பப்படும்.
எந்தெந்த சூழ்நிலைகளில் நோட்டீஸ் வர வாய்ப்புள்ளது?
நீங்கள் ஐடிஆர் (ITR) தாக்கல் செய்யும்போது குறைந்த வருமானத்தைக் காட்டிவிட்டு, கணக்கில் லட்சக்கணக்கில் தொடர்ந்து பரிவர்த்தனைகள் நடந்தால்.
உங்கள் UPI கணக்கிற்கு வியாபாரம் அல்லது தொழில் சார்ந்த பணம் தொடர்ந்து வந்தும், அதை வருமான வரி அறிக்கையில் கணக்கு காட்டாமல் விட்டால்.
முறையான வருமான ஆதாரம் காட்டாமல் பெரிய தொகையை ரொக்கமாகவோ அல்லது ஆன்லைன் மூலமாகவோ கணக்கில் செலுத்தும் போது.
உங்கள் கணக்கிற்கு வந்த பணத்திற்குரிய முறையான ஆதாரத்தை (Source of funds) உங்களால் நிரூபிக்க முடியவில்லை என்றால்.
பெரிய தொகையை பரிவர்த்தனை செய்தால் பயப்பட வேண்டுமா?
வங்கிகள் சில குறிப்பிட்ட பெரிய அளவிலான பணப் பரிவர்த்தனைகளை (High-value transactions) வருமான வரித் துறைக்கு அறிக்கையாக அளிப்பது வழக்கம்.
ஆனால், அதற்காகவே உடனடியாக நோட்டீஸ் வந்துவிடாது.
உங்களிடம் அந்தப் பணத்திற்கான முறையான ஆதாரங்களும் ஆவணங்களும் இருந்து, அவை நீங்கள் தாக்கல் செய்த ஐடிஆர் அறிக்கையோடு சரியாகப் பொருந்தினால், நீங்கள் எதற்கும் பயப்படத் தேவையில்லை!