எழுதியவர்: லால்மணி வர்மா
15-ம் நூற்றாண்டைச் சேர்ந்த துறவி மற்றும் கவிஞரின் 650-வது பிறந்தநாள் விழாக் கொண்டாட்டத்தின் ஒரு பகுதியாக, ஜூலை 29 முதல் பிப்ரவரி 20, 2027 வரை, வாரணாசியில் உள்ள சந்த் ரவிதாஸின் பிறந்த இடத்திலிருந்து 131 கலசங்களில் மண்ணை எடுத்துச் சென்று, பஞ்சாபின் ஜலந்தரில் இருந்து உத்தரப் பிரதேசத்தின் வாரணாசி வரை ‘சமர்சதா யாத்திரை’யை பா.ஜ.க நடத்தவுள்ளது.
கடந்த காலங்களிலும் குரு ரவிதாஸ் ஜெயந்தியை பாஜக கொண்டாடியிருப்பதால், 2027 ஆரம்பத்தில் நடைபெறவுள்ள 5 மாநில சட்டமன்றத் தேர்தல்களுக்கும் இந்த யாத்திரைக்கும் எந்தத் தொடர்பும் இல்லை என்று கட்சித் தலைவர்கள் முறைப்படி மறுத்து வருகின்றனர். இருப்பினும், உ.பி மற்றும் பஞ்சாபில் குறிப்பிடத்தக்க எண்ணிக்கையில் வாழும் சந்த் ரவிதாஸைப் பின்பற்றும் தலித் மக்களைச் சென்றடைவதற்காக 7 மாத காலம் நீண்ட பிரச்சாரம் வடிவமைக்கப்படுவது இதுவே முதல் முறை என்று தகவல்கள் தெரிவிக்கின்றன.
உத்தரப் பிரதேசத்தில் தலித்துகள் மாநில மக்கள் தொகையில் 21% ஆக உள்ளனர்; மேலும் மாநிலத்தில் உள்ள 403 சட்டமன்றத் தொகுதிகளில் 84 தொகுதிகள் இச்சமூகத்திற்கு ஒதுக்கப்பட்ட தனித் தொகுதிகளாகும். 2022 சட்டமன்றத் தேர்தலில், அப்போதைய சமாஜ்வாதி கட்சி தலைமையிலான எதிர்க்கட்சி கூட்டணி வென்ற 20 தொகுதிகளுடன் ஒப்பிடுகையில், பாஜக மற்றும் அதன் கூட்டணிக் கட்சியான அப்னா தளம் (சோனேலால்) இணைந்து 63 பட்டியல் சாதிகளுக்கான (எஸ்சி) தொகுதிகளைக் கைப்பற்றின.
32% தலித் மக்கள் தொகையைக் கொண்ட பஞ்சாபில், 117 உறுப்பினர்களைக் கொண்ட சட்டமன்றத்தில் 34 தொகுதிகள் பட்டியல் இனத்தவருக்கு ஒதுக்கப்பட்டுள்ளது. 2022 சட்டமன்றத் தேர்தலில் இந்தத் தொகுதிகளில் ஒன்றில் கூட பா.ஜ.க வெற்றி பெறவில்லை.
சந்த் ரவிதாஸின் வழித்தோன்றல்களான ‘ரவிதாசியாக்கள்’ தலித் சமூகத்தைச் சேர்ந்தவர்கள். அவர்களில் பெரும்பான்மையானோர், அதாவது 12 லட்சத்திற்கும் அதிகமானோர் பஞ்சாபின் கபூர்தலா, ஹோஷியார்பூர், நவான்ஷஹர் மற்றும் ஜலந்தர் மாவட்டங்களை உள்ளடக்கிய தோவாபா பிராந்தியத்தில் வாழ்கின்றனர். உண்மையில், குரு ரவிதாஸ் ஜெயந்திக்காக ரவிதாசியாக்கள் அதிக எண்ணிக்கையில் வாரணாசிக்கு பயணம் மேற்கொள்வார்கள் என்பதால், அரசியல் கட்சிகளின் கோரிக்கையை ஏற்று 2022 சட்டமன்றத் தேர்தல் பிப்ரவரி 14 இலிருந்து பிப்ரவரி 20 வரை ஒத்திவைக்கப்பட்டது.
இது ஏன் முக்கியமானது?
2027 தேர்தலுக்கு முன்னதாக உ.பி அரசியலில் தலித்துகளின் பங்கைக் கருத்தில் கொண்டு, பிப்ரவரி 20 அன்று குரு ரவிதாஸ் ஜெயந்திக்கான பாஜகவின் பிரச்சாரம் இந்த மையப் பகுதியில் சிறப்பு கவனம் செலுத்துகிறது. அங்கு வாரணாசியில் உள்ள சீர் கோவர்தன்பூரில் உள்ள ரவிதாஸின் பிறந்த இடத்திலிருந்து மண்ணால் நிரப்பப்பட்ட 104 கலசங்கள் ஒவ்வொரு கிராமத்திற்கும் எடுத்துச் செல்லப்படும்; மேலும் 27 கலசங்கள் பிற மாநிலங்களுக்கு எடுத்துச் செல்லப்படும்.
திட்டத்தின் அட்டவணையின்படி, சீர் கோவர்தன்பூரில் ஜூலை 27 அன்று ‘மாட்டி பூஜன்’ (மண் வழிபாடு) செய்யப்படும். ஜூலை 28 அன்று நாடு முழுவதிலும் இருந்து 131 குழுக்களைச் சேர்ந்த பாஜக தலைவர்கள் வாரணாசியை அடைந்து கலசங்களில் மண்ணை நிரப்புவர்.
ஜூலை 29 அன்று, பாஜக தேசியத் தலைவர் நிதின் நபீன் மற்றும் உ.பி முதலமைச்சர் யோகி ஆதித்யநாத் ஆகியோர் சீர் கோவர்தன்பூரில் இருந்து 7 மாத கால ‘ஸ்ரீ குரு ரவிதாஸ் மகாராஜ் சமர்சதா சங்கல்ப் அபியான்’ இயக்கத்தைத் தொடங்கி வைத்து, ‘சமர்சதா சங்கல்ப் சபா’வில் உரையாற்றுவார்கள். இதற்கு 25,000 பேர் திரளுவதை உறுதி செய்ய கட்சி உத்தரவிட்டுள்ளது. நாடு முழுவதும் உள்ள சந்த் ரவிதாஸ் கோயில்களில் பாஜக தீபோற்சவம், குருவாணி பாராயணம், பஜன் சந்தியா மற்றும் சமர்சதா சங்கல்ப் ஆகியவற்றை ஏற்பாடு செய்யும்.
ஜூலை 30 முதல் செப்டம்பர் 10 வரை கலசங்களை பல்வேறு கோயில்கள் மற்றும் சாதுக்கள் கூட்டத்திற்கு எடுத்துச் செல்ல ‘கலச வந்தன்’ திட்டத்திற்காக, உ.பி.யில் உள்ள 98 அமைப்பு ரீதியான மாவட்டப் பிரிவுகள், 6 மண்டலப் பிரிவுகள் மற்றும் பிற 27 மாநிலங்களைச் சேர்ந்த கட்சிப் பிரதிநிதிகளிடம் கலசங்கள் ஒப்படைக்கப்படும்.
ஜூலை 29 முதல் ஆகஸ்ட் 31 வரை துறவிகள், மகாத்மாக்கள், குருக்கள் மற்றும் மகந்துகளை கட்சி தொடர்புகொண்டு, அவர்களின் ஆசீர்வாதங்களைப் பெறுவதோடு, 7 மாத திட்டத்தின் கீழ் நடைபெறும் சந்த் ரவிதாஸ் நிகழ்வுகளில் இணையுமாறு வேண்டுகோள் விடுக்கும்.
இந்தத் திட்டத்தின் முக்கிய அம்சமாக, அக்டோபர் 5-ல் பஞ்சாபின் ஜலந்தரில் இருந்து தொடங்கப்பட்டு நவம்பர் 5-ம் தேதி வாரணாசியில் நிறைவடையும் ‘ஸ்ரீ குரு ரவிதாஸ் மகாராஜ் சமர்சதா யாத்திரை’ அமையும். அந்த யாத்திரை பஞ்சாபிலிருந்து உ.பி வரை செல்லும் வழியில் உள்ள கிராமங்கள் மற்றும் நகரங்களில் – குறிப்பாக தலித்துகள் அதிகம் வாழும் பகுதிகளில் தங்கிச் செல்லும்.
பாஜக பட்டியலின அணி தேசியத் தலைவர் லால் சிங் ஆர்யா கூறுகையில், இத்திட்டத்திற்கு ஆயத்தமாக 18 மாநிலங்களில் கட்சி ஏற்கனவே பட்டறைகளை நடத்தியுள்ளது என்றார். “சந்த் ரவிதாஸ் மனித நலன், சமத்துவம் மற்றும் சமூக நல்லிணக்கத்திற்காக உழைத்தார். அவர் மதமாற்றத்திற்கு எதிரானவர். அவரது செய்தியும் கருத்துக்களும் 650 ஜெயந்தி திட்டங்கள் மூலம் மக்களுக்கு கொண்டு சேர்க்கப்படும்” என்று ஆர்யா கூறினார், யாத்திரையின் சரியான பாதை விரைவில் அறிவிக்கப்படும் என்றும் அவர் மேலும் தெரிவித்தார்.
உ.பி பாஜக பொதுச்செயலாளரும் மாநிலத்தில் யாத்திரைக்கான பொறுப்பாளருமான ராம் பிரதாப் சிங் சவுகான் கூறுகையில், “இந்த நிகழ்வு தேர்தலுடன் தொடர்புடையது அல்ல. கட்சி கடந்த காலங்களிலும் சந்த் ரவிதாஸ் ஜெயந்தியைக் கொண்டாடியுள்ளது, ஆனால் இம்முறை பெரிய அளவில் நிகழ்ச்சிகளை ஏற்பாடு செய்து வருகிறது” என்றார்.
2024 மக்களவைத் தேர்தலுக்கு முன்னதாக, பிரதமர் நரேந்திர மோடி பிப்ரவரி 23 அன்று வாரணாசியில் சந்த் குரு ரவிதாஸின் 647வது பிறந்தநாளை முன்னிட்டு நடைபெற்ற நிகழ்ச்சியில் உரையாற்றினார்; மேலும் சீர் கோவர்தன்பூரில் உள்ள சந்த் குரு ரவிதாஸ் ஜென்மஸ்தான் கோயிலை ஒட்டிய பூங்காவில் சந்த் ரவிதாஸின் சிலையைத் திறந்து வைத்து, சந்த் ரவிதாஸ் அருங்காட்சியகத்திற்கு அடிக்கல் நாட்டினார்.