திருச்சி: திருச்சி மாவட்டத்தில் மொத்தம் 9 சட்டப்பேரவைத் தொகுதிகள் உள்ளன. இதில் வேறு எந்த தொகுதிக்கும் இல்லாத வகையில், திமுக கூட்டணியில் உள்ள மதிமுக, தேமுதிக, காங்கிரஸ் உள்ளிட்ட கட்சிகள் மணப்பாறை தொகுதியை தங்களுக்கு ஒதுக்கும்படி கேட்டு வருகின்றன.
மேலும், இந்தத் தொகுதியில் சிட்டிங் எம்எல்ஏவாக மனிதநேய மக்கள் கட்சியின் அப்துல் சமது உள்ள நிலையில், அந்தக் கட்சியும் மீண்டும் இந்தத் தொகுதியை கேட்டுள்ளதாக தெரிகிறது.
ஆனால், 2008-ல் தொகுதி மறுசீரமைப்பில் மணப்பாறை தொகுதி உருவானது முதல் இதுவரை திமுக இங்கு போட்டியிடாததால், இந்த முறை திமுகவுக்கே ஒதுக்க வேண்டும் என அக்கட்சியினர் போர்க்கொடி தூக்கியுள்ளனர்.